MATEUS 24

1Dob ai laho ma Jesus luar hun rumah panumbahan ai. Jadi iparayak susianNi ai ma Ia, anjaha ipatuduhkon sidea ma Bani rumah-rumah na masuk hu rumah panumbahan ai. 2Tapi nini ma hubani sidea: Iidah hanima do ganupan in? Sintong do na Huhatahon on bennima: Seng paturuton ijai dua batu patindih na so rosakkononkon. 3Sanggah hundul Ia i dolog Jetun ai, roh ma pulig susian ai hu Bani, nini ma: Patugah Ham ma bennami, antigan ma masa ai, anjaha aha ma tanda ni parohMu ampa ajal ni dunia on? 4Jadi nini Jesus ma mambalosi sidea: Jaga ma, ulang ma ipakahou halak hanima! 5Ai buei do halak na roh marhitei goranKu, na mangkatahon: "Ahu do Kristus" jadi buei ma na kahou bahenon ni sidea. 6Tapi bogeionnima ma pasal porang ampa barita ni porang. Jaga, ulang tarsonggot hanima, ai maningon masa do ai, tapi seng ope ai ujungni. 7Ai marsilawanan do bangsa dompak bangsa, anjaha harajaon dompak harajaon, masa ma lohei ampa lalou bani buei nagori. 8Tapi haganupan ai mungkah ni pangarouon ai ope. 9Ondoskonon ni halak do hanima, ase iarsik anjaha ibunuh; anjaha domdoman ni sagala bangsa do hanima halani goranKu. 10Jadi buei ma halak na marbalik, gabe marsitahi-tahian anjaha marsidomdoman ma. 11Buei ma marrohan nabi sipakulah-kulah, anjaha buei do na kahou ibahen. 12Jadi halani martambah-tambah hajahaton, lambin borgohni ma holong ni uhur ni jolma bueinan. 13Tapi barang ise na tahan das hu ujung, ai do na maluah. 14Anjaha ambilankononkon do Ambilan Namadear on pasal Harajaon in i sab dunia on, laho manaksihon bani haganup bangsa, dob ai pe ase roh ujungni. 15Halani ai, anggo iidah hanima ma bani ianan na mapansing in hasamboron na majangin ai, na dob nilumbahon ni nabi Daniel (iparuhurhon na mambasa on ma ai), 16jadi maporus ma halak na i Judea hu dolog. 17Halak na i atas ni rumahni, ulang pala be tuad mangalop ugas-ugasni hun rumah ai. 18Na i juma ulang be mulak hu rumah mangalop pakeianni. 19Tapi bursik ma na boratan rumah ampa na painumhon dakdanak bani panorang ai. 20Tapi martonggo ma hanima ase ulang ma sanggah musim borgoh atap ari Sabat hanima na maporus ai. 21Ai banggal tumang do haparngiton ai, humbani mungkah ni dunia on ronsi sonari seng ongga masa ope na sonai ai, anjaha seng masa be na sonai. 22Anjaha, ambit seng ipapondok ari ai, sahalak pe seng adong na maluah. Tapi halani na tarpilih in do, ase ipapondok ari ai. 23Anjaha anggo adong na mangkatahon bennima: "Tonggor ma, ijon do Kristus in", atap: "Ijai do Ia," ulang ma porsaya hanima. 24Ai na roh do Kristus siparladung ampa nabi siparladung, mambahen tanda na banggal ampa halongangan, laho pakahouhon na dob tarpilih in, ambit na tarbahen. 25Tonggor ma, domma Hupalumba hinan hanima. 26Halani ai, anggo adong na mangkatahon bennima: "I halimisan do Ia," ulang ma laho hanima hujai. Atap ihatahon sidea: "I kamar do Ia," ulang ma porsaya hanima! 27Ai songon hilap na mardejeb i hapoltakan anjaha marsinalsal das hu hasundutan, sonai do parroh ni Anak ni Jolma in. 28Ai ija adong bangkei, hujai do roh marurup haluhuy. 29Tapi sompong, salpuhonsi haparngiton na bani panorang ai, manggolapi ma mata ni ari, seng be ibere bulan sinalsalni, mardabuhan ma bintang-bintang hun langit, anjaha dugur ma hagogohon ni parlangitan. 30Jadi taridah ma i langit tanda ni Anak ni Jolma in, gabe mandoruhi ma ganup bangsa na i tanoh on, ai idahon ni sidea ma Anak ni Jolma in roh i atas ni hombun ni langit, marhasoman hagogohon ampa hasangapon banggal. 31Anjaha suruhonNi ma malekatNi martarompet na gogoh parsorani, jadi patumpuon ni sidea ma halak na dob pinilih ai humbani desa na ualuh in, hun ujung ni langit na sada das hubani na sada nari. 32Tapi humbani hayu ara an ma hanima marguru: Anggo martunasi ma anjaha marbulungi ibotoh hanima do, paboa dohor ma partahunan milas. 33Sonai ma homa, anggo iidah hanima ma masa ai, botoh hanima ma, paboa dohor ma ai. 34Sintong do na Huhatahon on bannima: Seng anjai salpu na sasundut on paima masa haganupan ai. 35Ai na laho salpu do langit pakon tanoh on, tapi anggo hatangKu seng anjai salpu. 36Tapi anggo pasal arini ampa panorangni, seng dong na mambotohsi, age malekat na i nagori atas, age Anak in; pitah Bapa in do. 37Ai songon sanggah panorang ni si Noak, sonai do parroh ni Anak ni Jolma in. 38Ai sanggah lape roh bah na sumbang ai, marmangan-mangan anjaha marminum-minum do sidea, marunjuk anjaha palahohon, paima jumpah ari parmasuk ni si Noak hu bagas parau ai, 39anjaha lanjar do seng mambotoh sidea pasal ai, ronsi na roh bah na sumbang ai mangogapkon sidea haganup. Usih hujai do parroh ni Anak ni jolma in. 40Bani panorang ai adong ma dua halak i juma, na sada ijalo, na sada nari itadingkon. 41Dua halak rap manduda, na sada ijalo, na sada nari itadingkon. 42Ai pe, jaga ma hanima, ai seng ibotoh hanima ari parroh ni Tuhannima! 43Tapi ingat hanima ma on: Ambit ibotoh tuan rumah pukul piga borngin roh panangko, tontu marjaga-jaga do ia, anjaha lang palopasonni rumahni hona bongkar. 44Halani ai tagam ma hanima, ai na roh ma Anak ni jolma in bani panorang na so niagaknima. 45Ai ise do juak-juak na bujur anjaha na maruhur, na pinabangkit ni tuanni, laho mambere jabolonni mangan bani panorangni? 46Martuah ma juak-juak, na mangkorjahon sonai jumpah tuanni bani parrohni ai. 47Sintong do na Huhatahon on bennima: Pabangkitonni ma ia manramotkon haganup na dong bani. 48Tapi anggo juak-juak na jahat do ia, na marsahap ibagas uhurni: "Dokah ope ase roh tuankai", 49gabe ipungkah ma mangarsik hasomanni juak-juak anjaha mangan minum rap pakon parmabuk, 50jadi rohkonsi tuanni bani panorang na so niagakni, anjaha bani panorang na so binotohni, 51gabe agouhononni ma ia, anjaha bereonni ma bani parbagianan dos pakon sipakulah-kulah. Ijai ma masa partangison ampa na patungosngoson.

will be added

X\