MATEUS 12

1Bani panorang ai mardalan ma Jesus mamontas juma-juma na marisi gandum. Halani loheian iputiki susian ai ma gandum ai lanjar iguguti. 2Mangidah ai halak Parisei, nini sidea ma dompak Jesus: Tonggor ma susianMu in! Ihorjahon susianMu do na so bulih horjaonkon bani ari Sabat. 3Jadi nini ma dompak sidea: Seng ongga gakni ibasa nasiam na binahen ni si Daud, sanggah loheian ia rap pakon hasomanni saodoran? 4Imasuki do rumah ni Naibata, gabe ipangan sidea do ruti galangan na so bulih panganonni barang panganon ni hasomanni pe, pitah malim do hansa. 5Barang na so ibasa nasiam do ibagas buku titah in, na so salah hape malim-malim sanggah ari Sabat i rumah panumbahan ai, age ilaosi titah ari Sabat in? 6Tapi Huhatahon ma bani nasiam: Lobihan humbani rumah panumbahan do on! 7Ambit iarusi nasiam, aha arti ni hata on: "Idop ni uhur do Huharosuhkon, sedo galangan," tontu seng uhumon nasiam sidea, na so marsalah in. 8Ai Anak ni jolma in do Tuan ni ari Sabat. 9Jadi dob misir Ia hunjai, imasuki ma rumah parguruan ni sidea. 10Adong do ijai sada halak, matei tanganni salopah. Jadi isungkun sidea ma Ia: Ai bulih do pamalumhon naborit ari Sabat? 11Tapi nini ma dompak sidea: Ise humbani nasiam, na marnah biri-biri sada, na so mandorab anjaha manarik ai hu atas, anggo madabuh ai hu bagas godung sanggah ari Sabat? 12Ai lang daoh do harganan jolma marimbang biri-biri? Ase, bulih do mangkorjahon na madear bani ari Sabat. 13Dob ai nini ma dompak halak ai: Papintor ma tanganmin! Jadi ipapintor ma, gabe suang ma malum songon tanganni na sada nari. 14Jadi luar ma Parisei ai, manriah ma sidea, atap sonaha do bahenon ni sidea, laho mamunuhSi. 15Dob ibotoh Jesus riah ni sidea ai, surut ma Ia hunjai. Buei do halak na mangirikkonSi, gabe ipamalum ma naborit ni sidea haganup. 16Tapi ipandang do sidea, ase ulang ipatugah-tugah pasalSi, 17ase jumpah na hinatahon marhitei nabi Jesaya, na mangkatahon: 18Tonggor ma, juak-juakKu na Hupilih in, haholonganKu anjaha harosuh ni uhurHu do Ia. NahkononKu do Tonduy Bani, anjaha ambilankononNi do habonaron hubani bangsa parbegu. 19Seng ra Ia maringor, seng ra Ia marsurak-surak anjaha seng marosuh Ia tarbogei hataNi bani dalan-dalan. 20Seng ponggolhononni arung-arung na dob marosak, anjaha seng intopkononNi sumbu na dob mirlop-irlop, paima monang bahenonNi uhum. 21Anjaha bani goranNi do marpangarapan bangsa-bangsa. 22Dob ai iboan ma hu Bani sada halak na setanon, na pitung anjaha na longah, jadi ipamalum ma ia, gabe marsahap anjaha marpangidah ma na longah ai. 23Jadi longang ma halak na mabuei ai haganup, nini sidea ma: Atap on ma Anak ni si Daud ia? 24Mambogei ai halak Parisei, nini sidea ma: Marhitei si Beelsebul, kopala ni setan-setan do ipangunsagahkon mangusir setan-setan. 25Halani ibotoh Jesus do pingkiran ni sidea, jadi nini ma dompak sidea: Ganup harajaon na marsalisih samah dirini, maseda do, anjaha ganup huta, atap rumah tangga na marsalisih samah dirini, seng totap ai. 26Ai anggo iusir setan hasomanni setan, na pabolah ma ia ai samah dirini. Sonaha ma boi totap harajaonni? 27Anjaha, anggo huusir setan marhitei Beelsebul, marhitei kuasa ni ise ma anak nasiam mangusirsi? Ai pe, sidea do na gabe panguhum bani nasiam. 28Tapi, anggo marhitei Tonduy ni Naibata do Huusir setan-setan, jadi, na dob sogop ma harajaon ni Naibata bani nasiam. 29Ai sonaha ma bulih masukan ni sada halak rumah ni sada halak na gogoh anjaha irampas ugas-ugasni, anggo seng palobei isangkut halak na gogoh ai? Dob ai pe, ase tarbuatsi ugas-ugasni. 30Na so mangkasomani Ahu, imbangKu do in, anjaha na so mangkasomani Ahu patumpuhon, na mangerap do in. 31Halani ai Huhatahon ma bani nasiam: Ganup dousa ampa panrisaion ni jolma sasapon do, tapi panrisaion dompak Tonduy in seng sasapon ai. 32Anjaha barang ise na mangkatahon hatani manlawan Anak ni Jolma in, sasapon do ai, tapi barang ise na manluarhon hatani manlawan Tonduy Napansing, seng sasapon ai, age bani dunia sonari,barang magira. 33Anggo dear sada hayu, dear ma buahni; anggo sambor sada hayu, sambor ma buahni; ai humbani buahni do tandaon hayu ai. 34Nasiam ginompar ni ulog darih! Sonaha ma tarbahen nasiam mansahapkon na madear, ai na jahat do nasiam? Ai in na manggoki uhur, ai do iluarhon pamangan. 35Halak na madear padaratkon hadearon humbani artani na madear ai, anjaha halak na masambor padaratkon na masambor humbani artani na masambor ai. 36Tapi huhatahon ma bennima, maningon marbalos do jolma magira bani ari uhum ai pasal sagala hata na so margagan, na hinatahonni. 37Ai marhitei hatamu do ho pintoranNi, anjaha marhitei hatamu do ho uhumonNi. 38Jadi marbalos ma Bani piga-piga halak sibotoh surat pakon Parisei, nini sidea ma: Guru, sihol idahonnami do sada tanda humbaMu. 39Tapi nini ma mambalosi sidea: Bangsa parjahat ampa parbangkis mangindo sada tanda, tapi seng sibereon ai bani, sobali tanda na bani si Jonas, nabi ai. 40Ai songon si Jonas tolu ari tolu borngin ibagas bituha ni dengke na banggal ai, sonai ma use Anak ni Jolma in tolu ari tolu borngin ibagas tanoh. 41Na jongjong do magira halak Ninipe bani paruhuman ai rap pakon bangsa on, anjaha uhumon ni sidea do ia, ai ipaubah sidea do uhurni mambogei ambilan ni si Jonas. Tonggor ma, lobihan do na ijon on marimbang si Jonas! 42Na jongjong do magira bani paruhuman ai raja naboru, na hun dangsina rap pakon bangsa on, anjaha uhumonni do ia, ai roh do ia hun ujung ni tanoh on laho mambogei hapentaron ni si Salomo. Tonggor ma, lobihan do na ijon on marimbang si Salomo! 43Anggo luar ma tonduy na butak ai humbani jolma, mawat-awat ma ia bani ianan dorging-dorging, laho mangindahi parsaranan, tapi lang jumpahsi. 44Jadi nini ma: Mulak ma lah ahu hubani ianan, na dob hutadingkon ondi. Dob das ia hujai, jumpahsi ma ianan ai lumei, hona sapu anjaha ipajagar. 45Dob ai misir ma ia, laho mangarahkon pitu tonduy na legan, na jahatan humbani, imasuki sidea ma ia, lanjar marianan ijai. Jadi dobni jahatan ma parlahou ni jolma ai marimbang mulani ondi. Sonai ma masa bani bangsa na jahat on. 46Jadi sanggah marsahapi ope Ia pakon halak na mabuei ai, jongjong do i darat inangNi pakon saninaNi, sihol marsahap pakonSi. 47Jadi adong ma na patugahkon Bani: Tonggor ma, jongjong do i darat inangmu pakon saninamu, sihol marsahap pakon Ham. 48Tapi nini ma dompak na patugahkon ai: Ise do inangKu ampa saninangKu? 49Jadi ipaherbang ma tanganni dompak susianNi ai, lanjar marsahap: Tonggor ma, on do inangKu ampa saninangKu. 50Ai na mangkorjahon harosuh ni BapangKu na i nagori atas ai, ai do anggingKu, ai do botouHu, ai do inangKu.

will be added

X\