MARKUS 8

1Bani panorang ai, sanggah martumpu use buei halak, anjaha seng dong sipanganon bani sidea, jadi idilo Jesus ma susianNi anjaha nini ma dompak sidea: 2Maidop do uhurHu mangidah halak na mabuei on, ai domma tolu ari iihutkon sidea Ahu, anjaha seng dong sipanganon bani sidea. 3Anggo Husuruh sidea mulak lang palobei mangan, gayuran ma sidea i tongah dalan, ai parhuta na daoh do sidea deba. 4Jadi ibalosi susian ai ma Ia: Hunja ma boi buaton ruti, laho pabosur sidea i halimisan on? 5Jadi isungkun ma sidea: Piga do adong ruti bannima? Nini sidea ma: Pitu! 6Dob ai isuruh ma halak na mabuei ai hundul i tanoh. Ibuat ma ruti na pitu ai, anjaha dob ihatahon tonggo tarima kasih, ipartopik ma ai anjaha ipambere bani susianNi, ase iidangkon sidea ai bani halak na mabuei ai. 7Dong do homa dengke otik bani sidea. Dob ipasu-pasu, isuruh ma ase ibagihon. 8Jadi mangan ma sidea bosur bei, lanjar ipatumpu ma teba-teba ai gok pitu tapongan. 9Adong do sidea ompat ribu halak. Dob ai isuruh ma sidea mulak, 10anjaha Ia pe, masuk ma hu bagas parau rap pakon susianNi ai, gabe das ma sidea hu nagori Dalmanuta. 11Roh ma halak Parisei, jadi ipungkah sidea ma marsual pakonSi. Ipindo sidea ma tanda hun langit, laho manlajouSi. 12Marhasoman hoih-hoih humbagas uhurNi, nini Jesus ma: Mase ma mangindo tanda na sasundut on? Na sintong do Hatangkon bani nasiam: Seng porlu bereon tanda bani na sasundut on! 13Jadi itadingkon ma sidea, anjaha masuk ma use hubagas parau, lanjar laho mandipar. 14Tapi lupa do susian ai mamboan ruti, anjaha pitah sada do hansa ruti i bagas parau ai. 15Jadi ipalumba ma sidea, nini: Pangkei anjaha jaga ma hanima pasal ragi ni Parisei ampa ragi ni si Herodes. 16Jadi marsahap ma sidea samah sidea: Ai ma da, halani na so mamboan ruti ai hita. 17Jadi dob ibotoh ai nini ma dompak sidea: Mase ma isahapkon hanima, na so adong ai ruti bannima? Seng ope ibotoh hanima anjaha iarusi hanima? Tong ope mapir uhur nima? 18Ai lang marpangidah hanima, age adong mata nima? Ai lang marpambogei hanima, age adong pinggol nima? 19Ai seng idingat hanima be sanggah na Hupartopik ondi lima ruti bani na lima ribu halak ondi, anjaha piga tapongan teba-tebani ipatumpu hanima? Nini sidea ma Bani: Sapuluh dua. 20Anjaha na pitu ruti ondi bani na ompat ribu halak ondi, piga tapongan do teba-tebani ipatumpu hanima? Nini sidea ma hu Bani: Pitu! 21Jadi nini ma dompak sidea: Seng ope iarusi hanima? 22Das ma sidea hu Betsaida. Adong ma na mamboban hu Bani sada halak na mapitung, anjaha ielek-elek sidea ma Ia, ase ijamah halak ai. 23Jadi ijamah ma tangan ni halak na mapitung ai, iarahkon ma ia hu darat ni huta ai, itijuri ma matani, itampeihon ma tanganni hubani, anjaha isungkun ma: Domma adong iidah ho? 24Jadi mangkawah ma ia, nini ma: Huidah do jolma, tapi songon bona ni hayu do huidah sidea mardalan. 25Dob ai iulakkon Jesus ma mannahkon tanganNi bani matani; ia pe mangkawah ma, gabe malum ma, anjaha lihar ma ganup iidah. 26Dob ai isuruh ma ia mulak hu rumahni, nini ma: Ulang ma masuki huta in. 27Dob ai laho ma Jesus rap pakon susianNi hu huta-huta dohorhon Kesarea Pilippi. I tongah dalan Nini ma manungkun susianNi: Ise do Ahu ihatahon halak? 28Jadi ibalosi sidea ma Ia: Deba mangkatahon si Johannes Pandidi, na deba si Elias, anjaha na deba nari use, sada humbani nabi ai. 29Dob ai isungkun ma sidea: Ia hanima, ise do Ahu nini uhur nima? Nini si Petrus ma mambalosi: Ham do Kristus in! 30Jadi ipalumba ma sidea, ase ulang ipatugah-tugah pasalSi age bani ise. 31Dob ai ipungkah ma mangajari sidea: Ia anak ni jolma in, maningon buei do sitarononNi, ambukkonon ni pangintuai-pangintuai, sintua ni malim ampa sibotoh surat do Ia, anjaha bunuhonni, anjaha dob salpu tolu ari mulak manggoluh. 32Anjaha torang-torang do ipatugah hata ai. Jadi iarahkon si Petrus ma Ia, anjaha ipaingat ma Ia. 33Marhusor ma Ia, ikawahkon ma susianNi ai, anjaha ihata ma si Petrus, nini ma: Laho ma ho bolis hun lambungkon! Ai seng uhur ni Naibata iparuhurhon ho, uhur ni jolma do. 34Dob ai idilo Jesus ma na mabuei ai rap pakon susianNi ai, nini ma dompak sidea: Barang ise na sihol mangirikkon Ahu, iparnalang ma dirini, iporsan ma silangni, anjaha iirikkon ma Ahu. 35Ai barang ise na sihol paluahkon hosahni, ai do na magouan hosah, tapi barang ise na magouan hosah halani Ahu ampa halani Ambilan Namadear, ai do pagoluhkonsi. 36Ai aha ma gunani bani jolma, age ganup dunia on bani, anggo magou do tonduyni? 37Ai aha ma tarbere jolma, bahen tobus ni tonduyni? 38Ase anggo adong na maila halani Ahu barang halani Hatangkin i lobei ni bangsa parbangkis anjaha pardousa on, Anak ni jolma in pe maila do pasalsi, anggo roh ma Ia i bagas hasangapon ni BapaNi rap pakon malekat na mapansing in.

will be added

X\