LUKAS 21

1Sanggah mangkawah Ia, iidah ma halak na bayak mandabuhkon sibere-bereni hubagas poti parartaan. 2Iidah ma homa naboru na mabalu, na masombuh, mannahkon dua rimis. 3Jadi ihatahon ma: Sintong do na huhatahon on bani nasiam: Bueinan do na ninahkon ni na mabalu na masombuh on marimbang haganupan ai. 4Ai haganup sidea humbani lobih-lobihni bei do inahkon sidea gabe sibere-bereni, tapi ia parinangon on, humbani hahuranganni do inahkon haganup na adong bani, na sahira goluhni. 5Adong ma deba halak, na manarsingati rumah panumbahan ai, na dob pinajagar marhitei batu na majenges ampa siluah ni halak, gabe nini Jesus ma: 6Iidah hanima pe haganupan in, na roh ma arini, seng paturuton be ijin dua batu patindih, na so rosakkononkon. 7Jadi isungkun sidea ma Ia, nini ma: Andigan ma masa ai, Guru? Anjaha aha ma tandani, laho masa ai? 8Jadi Nini ma: Jaga ma hanima, ulang ma kahou hanima! Ai buei ma na roh manoluk goranKu, na mangkatahon: Ahu do Ia, ampa, "Domma jumpah panorangni". Ulang ma iirikkon hanima sidea. 9Tapi anggo ibogei hanima barita ni hamunsuhon ampa hageoron, ulang ma hanima tarsonggot, ai maningon masa do ai lobei, tapi lang ope mintor dapot ujungni. 10Nini ope bani sidea: Marsiporangan do holi bangsa hu bangsa, harajaon hu harajaon. 11Masa ma lalou na maparah, sampar marsasanagori ampa lohei sonai homa panonggoti ampa tanda na banggal hun langit. 12Tapi paima masa ai, tangkapon anjaha pardakdakon ni sidea do hanima. Ondoshonon do hanima hu parguruan anjaha masukkonon hubagas tutupan, boanon do hanima hu lobei-lobei ni raja-raja ampa siparkuasa halani goranKu. 13Lanjar in ma dalan bennima, laho manaksihon Ahu. 14Ingat hanima ma: Seng pala sarihonon nima pasal sihatahonon nima ijai. 15Ai Ahu do mamberehon bannima kuasa marsahap ampa hapentaron, na so boi imbangon atap jabapon ni munsuh nima. 16Gari namatoras ampa sanina, sindohor ampa huan-huan mangondoshon hanima; anjaha bunuhonni do deba hanima. 17Domdoman ni haganup jolma do hanima halani goranKu. 18Tapi sada jambulan pe lang bulih magou humbani ulu nima. 19Marhitei hasabaron do maluah hosah nima. 20Tapi anggo iidah hanima huta Jerusalem iinggoti tentara, botoh hanima ma, dohor ma parsedani. 21Ai pe maporus ma hu dolog na i Judea, na ibagas huta in kaluar ma hunjin, anjaha na i juma ulang mulak hu huta in. 22Ai ari pambalasan do in, ase saud ganup na tarsurat in. 23Sunsah ma na boratan rumah ampa ni painumhon bani panorang ai, ai sogop ma hasosakan banggal hu tanoh on ampa ringis bani bangsa on. 24Ragei ma sidea bunuhon ni mata ni podang, anjaha hona boan tartaban hu tongah-tongah ni sagala bangsa. Dogei-dogeian ni halak parbegu ma huta Jerusalem, paima gok panorang ni parbegu. 25Dob ai masa ma tanda bani mata ni ari, bani bulan ampa bani bintang pe, anjaha rusak ma sagala bangsa i tanoh on anjaha bajoraon halani hasak ni laut in ampa gilumbangni. 26Tarhatos ma jolma in halani biarni managam na sihol masa hu atas tanoh on, ai dugur ma hagogohon ni parlangitan. 27Dob ai idahon ni sidea ma Anak ni jolma in roh marhitei hombun ibagas hagogohon ampa hasangapon banggal. 28Anggo mamungkah masa ma ganupan ai, jongjong ma nasiam, padirgak ma ulu nasiam, ai dohor ma haluahonnasiam. 29Jadi ihatahon ma sada limbaga bani sidea: Tonggor hanima ma hayu ara in ampa hayu na legan in! 30Anggo marpusuki ma iidah hanima, botoh hanima ma, na dohor ma partahunan milas. 31Usih hujai ma, dob iidah hanima masa ganupan ai, botohon nima ma na dohor ma harajaon ni Naibata. 32Tongon do na Huhatahon on bannima: Seng anjai salpu na sansundut on, anggo lape masa ganupan ai. 33Langit ampa tanoh salpu do, tapi anggo hatangKai seng anjai salpu. 34Tapi jaga ma hanima bani diri nima, ulang ma boratan uhur nima halani parminum-minumon ampa parmabukon ampa holsoh-holsoh bani na i dunia on, gabe sompong songon tirangkap roh ari ai mandorab hanima. 35Ai maningon roh do ai bani haganup na marianan iatas tanoh on. 36Tapi jaga ma hanima anjaha martonggo ma tongtong, ase margogoh hanima manimbili sagala na sihol roh ai, laho jongjong i lobei ni Anak ni Jolma in. 37Arian i rumah panumbahan ai do Ia mangajari, tapi borngin luar do Ia, marborngin i dolog, na margoran Jetun. 38Anjaha girah sogod roh ma halak na mabuei ai manjumpahkonSi i rumah panumbahan laho manangar hataNi.

will be added

X\