LUKAS 10

1Dob salpu ai ipilih Tuhan Jesus ope pitu puluh halak nari, anjaha isuruh ma sidea mardua-dua gabe parlobeiNi hubani ganup huta ampa ianan, na sihol siparayakonNi. 2Ihatahon do bani sidea: Bolag do namin sabion, tapi otik do siparhorja. Ai pe pindo hanima ma bani Simada sisabion in, ase isuruh siparhorja bani sisabionni in. 3Laho ma hanima. Songon biri-biri do hanima hasuruh hu tongah-tongah ni begu. 4Ulang boan hanima parduitan, barang tas barang sipatu; anjaha ulang tabi hanima halak i tongah dalan. 5Laho masuk hu sada rumah, parlobei ma hatahon hanima: Damei ma bani nasiam i rumah on! 6Anjaha anggo adong ijai anak hadameion, sogop ma bani damei nima; tapi anggo seng dong, mulak ma ai bennima. 7I rumah ai ma hanima tondok, mangan anjaha inum hanima ma humbani na adong bani sidea, ai patut do dapotan upah siparhorja; ulang ma mosor-osor tondokan nima. 8Anggo masuk hanima bani sada huta, anjaha ijalo do hanima, pangan hanima ma na niidangkon bennima. 9Pamalum hanima ma na boritan, na adong ijai, anjaha hatahon hanima ma bani sidea: Domma dohor harajaon ni Naibata bani nasiam! 10Tapi anggo imasuki hanima sada huta, hape seng ijalo sidea hanima, laho ma hanima hu alaman ni sidea, anjaha hatahon hanima ma: 11Age orbuk ni huta nasiam on, na longkot bani nahei nami, ipirpirhon hanami ma mulak bani nasiam; tapi botoh nasiam ma, domma dohor parroh ni harajaon ni Naibata. 12Huhatahon ma bannima: Hampungan do sitaronon ni Sodom bani ari ai marimbang sitaronon ni huta sisonai. 13Bursik ma ho Korasin. Bursik ma ho Betsaida! Ai ambit i huta Tirus ampa Sidon ipamasa hagogohon, na dob pinamasa bannima, girah do paubahon ni sidea uhur ni sidea, marhiou guni, hundul bani orbuk. 14Ase hampungan do sitaronon ni Tirus ampa Sidon bani ari uhum ai, marimbang sitaronon nima. 15Anjaha ho Kapernaum, ai sipagijangon do ho ronsi langit? Sidabuhkononkon do ho das hu nagori toruh! 16Na manangihon hanima, Ahu do tinangihonni, anjaha na manulak hanima, Ahu do tinulakni; tapi na manulak Ahu, na marsuruh Ahu do tinulakni ijai. 17Ibagas malas ni uhur do mulak sipitu puluh halak ai, nini sidea ma: Tuhan, tunduk do age setan-setan bannami halani goranMu. 18Tapi nini ma dompak sidea: Huidah do sibolis in madabuh hun langit songon hilap. 19Tonggor ma, domma Hubere bannima kuasa mandogei ulog ampa gansip golang, sonai kuasa manlawan sagala hagogohon ni munsuh in; anjaha seng tarkahua sidea hanima. 20Tapi ulang ma malas uhur nima, halani na tunduk ai setan-setan bannima, tapi malas ma uhur nima, halani domma tarsurat goran nima i nagori atas. 21Anjaha bani panorang ai marolob-olob ma Ia ibagas Tonduy Napansing, nini ma: Hupuji Ham Bapa, Tuhan sigomgom nagori atas ampa tanoh on, halani iponophon Ham do in humbani halak na pentar ampa na maruhur, hape ipatalar Ham do in hubani na saluju maruhur. Eak Bapa, sonin do iharosuhkon uhurMu. 22Haganupan do iondoskon Bapa Bakku, anjaha seng dong na mananda Anak in, sobali Bapa in, anjaha Bapa in pe, seng dong na manandasi sobali Anak in, ambah ni ai na pinodahan ni Anak in mangihutkon rosuh ni uhurNi. 23Dob ai idompakkon ma pulin susianNi ai, nini ma: Martuah ma mata, na mangidah na niidah nima. 24Ai Huhatahon ma bannima: Buei do nabi-nabi ampa raja-raja, na masihol mangidah na niidah nima, hape seng iidah, anjaha na sihol, mambogei na dob binogei nima, hape seng ibogei. 25Dob ai jongjong ma sada sibotoh titah manlajouSi, nini ma: Guru, aha do sibahenonku, ase tartean ahu hagoluhan sisadokah ni dokahni? 26Gabe nini Jesus ma hubani: Aha do tarsurat bani titah in? Sonaha do ibasa ham? 27Jadi nini mambalosi: Maningon haholonganmu do Tuhan Naibatamu humbani putih ni atei-ateimu, humbani gok ni tonduymu, humbani bois ni gogohmu ampa humbani gok ni uhurmu, anjaha hasomanmin songon dirimu! 28Dob ai nini ma hubani: Sintong do balosmu in; bahen ham ma sonai, gabe manggoluh ma ham! 29Tapi sihol do pintoranni dirini, gabe nini ma dompak Jesus: Ai ise do goranon hasomanku? 30Jadi nini Jesus ma mambalosi: Adong ma sada halak na tuad hun Jerusalem, laho hu huta Jeriko, gabe isamun panamun ma ia. Irampas sidea do ia, ibalbali, dob ai laho, itadingkon ia tarhatos. 31Tudu ma mamontas sada malim hun dalan ai, iidah do ia, tapi ilaosi do. 32Sonai homa sada halak Lepi, das do bani ianan ai, iidah do ia, tapi ilaosi do homa. 33Tapi mamontas ma hujai sada halak Samaria; dob iidah ia, idop ma uhurni bani, 34idohori ma ia, ibaluti ma ugahni ai, anjaha idaisi ma ai bani minak ampa anggur. Dob ai ipahundul ma ia bani halodeni sandiri, iboan ma ia hu parbornginan, lanjar ipatorsa-torsa. 35Patarni ai ibuat ma dua dinar, ibere ma ai bani simada rumah ai, anjaha nini ma: Patorsa-torsa ham ma ia, anjaha anggo lobih hunjon harugianmu, hugalari pe sanggah mulak ahu. 36Ise do humbani sitolu halak ai, hasoman bani na tarsamun ai, nini uhurmu? 37Jadi nini ma: Na maridop ni uhur bani. Gabe nini Jesus ma hubani: laho ma ham, bahen ma sonai! 38Sanggah na mardalani sidea, masuk ma Jesus hubagas sada huta, anjaha dong ma ijai sada naboru, na margoran si Marta, na manjalosi hu rumahni. 39Ia anggini, na margoran si Maria, hundul-hundul do i lobeini Tuhan in manangihon hataNi, 40tapi anggo si Marta, hosei tumang do marugas. Jadi ipadohor ma bani Jesus anjaha nini ma: Tuhan, ai lang iidah Ham, na ipaturut anggingkin do sahalak ahu marugasi? Hatahon Ham ma ia mangurupi ahu! 41Jadi nini Tuhan in ma mambalosisi: Marta! Marta! Buei do isarihon anjaha isunsahkon uhurmu! 42Sada do na porlu! Ipilih si Maria do rupei sidearan, seng sibuaton ai humbani.

will be added

X\