1 In ma ihatahon Jesus. Dob ai mangkawah ma Ia dompak babou, nini ma: Ham Bapa, domma jumpah panorangni, pasangap Ham ma AnakMu, ase ipasangap AnakMu Ham. 2 Ai domma ibere Ham kuasa Bani manrajai sagala jolma, laho mamberehon hagoluhan na sadokah ni dokahni bani haganup jolma, na binerehonMu Bani. 3 Ia hagoluhan sisadokah ni dokahni, in ma, anggo itanda sidea Ham, Naibata sisada-sada in, na sintong in, ampa Jesus Kristus, na sinuruhMu. 4 Domma Hupasangap Ham i tanoh on, ai domma Hudobkon horja, na binerehonMu Bakku, sihorjahononKu. 5 Sonari pe Bapa, pasangap Ham ma Ahu hu lambungMu, songon sangapHu sanggah i lambungMu Ahu, sanggah lape adong dunia on. 6 Domma Hupatalar GoranMu bani jolma na binereMu in Bakku hun dunia on. Ham hinan do simada sidea, anjaha ibere Ham do sidea Bakku; iramotkon sidea do hataMu. 7 Sonari, domma ibotoh sidea, na hum Bamu do haganup na binereMu in Bakku. 8 Ai domma Huondoskon bani sidea hata na binereMu in Bakku; domma ijalo sidea hata in, anjaha torang ibotoh sidea Ahu bingkat hum Bamu, anjaha domma porsaya sidea, Ham do marsuruh Ahu. 9 Hutonggohon do sidea. Sedo dunia on Hutonggohon, sidea on do, na bineremu in Bakku, ai Ham do simada sidea. 10 Anjaha sagala na adong Bakku, na adong Bamu do in, anjaha na adong Bamu, na adong Bakku do in, anjaha domma marsangap Ahu ibagas sidea. 11 Seng be i dunia on Ahu, tapi i dunia on ope sidea, anjaha na roh ma Ahu marayak Ham. Ham Bapa na mapansing, ramotkon Ham ma ibagas goranMu, sidea na binereMu in Bakku, ase sada sidea songon Hita. 12 Sadokah rap Ahu pakon sidea, Ahu do manramotkon ibagas goranMu, sidea na binereMu in Bakku, anjaha Hujagai, gabe seng dong na magou humbani sidea, sobali jolma magou in, ase saud hata ni Surat in. 13 Tapi na roh ma Ahu nuan marayak Ham, anjaha ganupan in Husahapkon sanggah i dunia on ope Ahu, ase gok bani sidea malas ni uhur na Bakku in. 14 Domma Huondoskon hataMu bani sidea; sogam do uhur ni dunia on bani sidea, ai seng humbani dunia on sidea, songon Ahu na so hun dunia on. 15 Seng Hupindo, ase buatonMu sidea hun dunia on, tapi ase iramotkon Ham do sidea dompak pangagou. 16 Seng hun dunia on sidea, songon Ahu na so hun dunia on. 17 Papansing Ham ma sidea ibagas hasintongan; hataMu do hasintongan. 18 Songon parsuruhMu Bakku hu dunia on, sonai do Husuruh sidea hu dunia on. 19 Hupapansing do diringKu mangkopkop sidea, ase gabe pansing sidea ibagas hasintongan. 20 Sedo pitah sidea Hutonggohon, tapi dihut do na sihol porsaya Bakku, halani hata ni sidea, 21 ase sada sidea haganup, songon Ham Bapa i bagas Ahu, anjaha Ahu i bagas Ham, sonai ma age sidea i bagas Hita, ase porsaya dunia on, Ham do marsuruh Ahu. 22 Domma Huberehon bani sidea hasangapon na binereMu in Bakku, ase sada sidea, songon Hita na sada. 23 Ahu ma ibagas sidea, anjaha Ham i bagas Ahu, ase gok dear ni hasadaon ni sidea, gabe ibotoh dunia on, Ham do na marsuruh Ahu anjaha na holong do uhurMu bani sidea, songon holong ni uhurMu Bakku. 24 Ham Bapa, sihol do uhurHu, ia ijin Ahu,ijin ma pakon na binereMu in Bakku, ase iidah sidea hasangaponKu, na binereMu in Bakku, ai domma holong uhurMu Bakku, paima tombei dunia on. 25 Ham bapa na bonar, ia lang pe itanda dunia on Ham, anggo Ahu Hutanda do Ham, anjaha ibotoh sidea on, Ham do marsuruh Ahu. 26 Domma Hupabotohkon bani sidea goranMu, anjaha pabotohkononKu do ope, ase i bagas sidea holong ni uhurMu na hu Bakku in, anjaha ase Ahu i bagas sidea.
