JAKOBUS 4

1Hunja do roh ni parmunsuhon ampa partinggilon, na bani nasiam? Ai lang humbani hisap-hisap nasiam do, na marsilawanan ibagas pagori nasiam? 2Na marsura-sura do nasiam, tapi lang dapotan; mamunuh nasiam anjaha marsimburu, lanjar seng marulih nasiam. Na marsiimbangan do nasiam anjaha marporang, tapi seng dong bani nasiam, halani seng ipindo nasiam. 3Mangindo do namin nasiam, tapi seng manjalo, halani salah pangindo nasiam, ai sihol parbois-boiskonon nasiam do ai marhitei hisap-hisap nasiam. 4Nasiam parbangkis, ai lang ibotoh nasiam, ia parhuan-huanon dompak dunia on hamunsuhon dompak Naibata do in? Ase, na sihol huan-huan ni dunia on, ipajongjong do dirini gabe munsuh ni Naibata. 5Atap iagan nasiam, gurou-gurou do na hinatahon ni Surat in: Parsimburu do Tonduy in, na dob ibahen marianan ibagas hita? 6Tapi lambin bueini do idop ni uhur ibere. Halani ai do ase ihatahon: Ilawan Naibata do sigijang uhur, tapi ibere do idop ni uhur bani na toruh maruhur. 7Ai pe, ondoskon nasiam ma diri nasiam bani Naibata; lawan nasiam ma sibolis in, jadi maporus ma ia humbani nasiam. 8Padohor nasiam ma bani Naibata, jadi padohoronNi ma bani nasiam. Paborsih nasiam ma tangan nasiam, nasiam pardousa, anjaha papitah nasiam ma uhur nasiam, nasiam na mardua uhur! 9Marhoru ma nasiam, tangis anjaha doruh-doruh. Mubah ma tawa nasiam gabe partangison, malas ni uhur nasiam gabe pusok ni uhur! 10Patoruh nasiam ma uhur nasiam i lobei ni Tuhan in, jadi pagijangonni ma nasiam. 11Ulang ma nasiam marsipahata-hataan, nasiam sanina! Barang ise na manghatai anjaha na manguhum-uhumi hasomanni, na manghatai anjaha na manguhum-uhumi titah in do ia ai. Tapi anggo iuhumi ham titah in, seng be sihorjahon titah in ham ai, tapi panguhum do. 12Sada do Sibere titah anjaha Panguhum, na boi paluahkon ampa mangagou. Tapi, ise ma ham, ase uhumonmu hasomanmu? 13Ee nasiam, na mangkatahon: Sadari on atap patar laho ma hanami hu kota ai, ase ijai hanami soh pala satahun on, martiga-tiga ampa mansari-sari. 14Hape pasal ari patar pe seng ibotoh nasiam. Ai aha do goluh nasiam in? Usih do nasiam bani timus, na taridah tongkin, dob ai seng taridah be. 15Gantih ni ai, sonon ma patut hatahonon nasiam: Anggo marosuh Tuhan in anjaha manggoluh hanami, bahenonnami ma on atap ai. 16Hape mangenjeng do nasiam anjaha sombong; na jahat do pangenjengon na sonai ai. 17Ase, na mambotoh mambahen na madear, hape seng ihorjahon, na mardousa do ia ijai.

will be added

X\