HEBER 2

1Halani ai, maningon lambin poltikni do panjolomta bani hata, na dob binogeita, ase ulang mayub hita. 2Hata, na hinatahon ni malekat, totap do, anjaha sagala panlanggaron ampa pangengkaron dapot pambalason na pintor. 3Tumaram ma boi maporus hita, anggo lansei hita bani haluahon na sain banggal? Tuhan in sandiri do manghatahon haluahon ai lobei, anjaha na mambogei ai manaksihon banta hasintonganni ai, 4anjaha isaksihon Naibata ope ai marhitei tanda, halongangan, bagei-bagei ni hagogohon ampa Tonduy Napansing, na binagihonNi domu hubani rosuh ni uhurNi. 5Ai seng malekat ibahen Naibata panrajai bani dunia na sihol roh ai, ai ma dunia na sinahapkonta on. 6Tapi adong do isaksihon ibagas Surat in: Aha do jolma in, ase idingat Ham ia, barang anak ni jolma in, ase itatap Ham ia? 7Ipatoruh Ham do ia tongkin toruhan marimbang malekat; hasangapon ampa hamuliaon do isortalihon Ham bani. 8Haganup do ipatunduk Ham hutoruh ni naheiNi. Marhitei na pinatundukni ai haganup hu Bani, seng adong na tading ibahen, na so unduk hu Bani; tapi anggo sonari, lang iidah hita ope, na dob tunduk hu Bani haganup. 9Tapi Ia, na pinatoruh ai tongkin itoruh ni malekat, ai ma Jesus, iidah hita do marsortali hasangapon ampa hamuliaon, halani na dob itaron hamateian, ase marhitei idop ni uhur ni Naibata ihophop haganup marhitei hamateian na tinaronNi ai, 10Ai patut do, Ia parmulaan ampa na mandobhon haganup, ibagas na sihol boanonNi buei anak hu hasangapon, pajongjongonNi gokan dear marhitei sitaronon pambobai in, na mamboan sidea hu haluahon. 11Ai Ia, na papansingkon ai ampa na pinapansingNi ai, sada do harohanni haganup. Halani ai, seng maila Ia manggoran sidea saninaNi, 12ai nini do: Ambilanhononku do goranMu hubani saninangKu; i tongah-tongah ni kuria in do dodinghononku Ham. 13Dob ai use: "Ia do bahenonku hatengeran ni uhurhu". Ambah ni ai: "Ijon do Ahu ampa dakdanak in, na binere ni Naibata hu Bakku". 14Ase, songon dakdanak parrupei bani daging ampa daroh, sonai do homa Ia parrupei ijai, ase marhitei hamateian ai iparseda sibolis in, na markuasa bani hamateian, 15ase ipaluah haganup na pinarjabolon ni biar bani hamateian, sadokah manggoluh. 16Ai sedo malekat na sinarihonni, tapi ginompar ni si Abraham do. 17Halani ai maningon gabe dos do Ia pakon saninaNi pasal haganup, ase gabe paridop ni uhur Ia ampa Sintua ni malim hatengeran ni uhur i lobei ni Naibata, laho pasaloseihon dousa ni bangsa in. 18Ai, halani dob marsitaronon Ia anjaha tarlajou, margogoh do Ia mangurupi sagala na tarlajou.

will be added

X\