HEBER 11

1Ia haporsayaon, ai ma tenger ni uhur bani siaraphononkon, ampa na mambahen torang pasal na so niidah. 2Marhitei haporsayaon ai do dapotan hasaksian na madear ompung-ompungta hinan. 3Marhitei haporsayaon do tararusi hita, paboa marhitei hata ni Naibata do ijadihon dunia on, gabe manjadi na taridah on humbani na so taridah. 4Marhitei haporsayaon do igalangkon si Abel hubani Naibata galangan sidearan marimbang si Kain, gabe isaksihon ia parpintor marhitei ai, ai isaksihon Naibata do galangan ai sanggah na ijalo ai; matei do ia, tapi marsahap ope ia marhitei haporsayaonni ai. 5Marhitei haporsayaon do tarangkat si Henok, gabe seng iidah hamateian; seng jumpah be ia, halani domma iangkat Naibata. Ai paima tarangkat ia, isaksihon do pasalsi, paboa rosuh do uhur ni Naibata bani. 6Tapi anggo seng porsaya halak, seng tarbahen harosuh ia bani Naibata, ai halak na sihol mandohori Naibata, maningon porsaya do ia adong Naibata, anjaha Ia mambere upah bani na mangindahiSi. 7Marhitei haporsayaon do ipauli si Noak ibagas biar parau bahen haluahon ni sidea na sajabu, dob ijalo pangungkabon pasal na so boi idahon ope; marhitei ai iuhum si Noak do dunia on, anjaha gabe itean ma hapintoran na humbani haporsayaon. 8Marhitei haporsayaon do mambalosi si Abraham, sanggah na idilo ia, bungkas hu tanoh sijaloonni gabe tean-teanan; anjaha bungkas do ia, age pe lang ibotoh siparayakonni ai. 9Marhitei haporsayaon do ia manginsolat i tanoh, na dob pinarbagah in, songon i tanoh na legan, marianan ibagas tenda rap pakon si Isak ampa si Jakob, hasomanni panean bani bagah-bagah na sada in. 10Ai ipaima-ima do huta na maronjolan na totap, na niranggi ampa na pinauli ni Naibata. 11Marhitei haporsayaon do ijalo si Sara gogoh manubuhkon, age pe domma matua ia, halani hatengeran ni uhur do ihira na marbagahkonsi. 12Halani ai tubuh do humbani na sada halak ai, na dob matei tarhatahon, ansa buei ni bintang na i langit, ansa buei ni horsik ni na i topi ni laut, na so tarbilangi. 13Ibagas haporsayaon do sidea matei haganup, seng sompat ijalo na pinarbagah ai; humbani na daoh mando itatap anjaha ihamalaskon sidea ai, anjaha iparhatongon sidea: Halak na legan anjaha panginsolat do sidea i tanoh on. 14Ai marhitei na mangkatahon sisonai ai, ipatuduhkon do, na mangindahi do sidea bani tanoh hasusuran. 15Ambit idingat sidea tanoh habungkason ni sidea ai, sompat do sidea mulak hujai. 16Tapi sidearan do ihasiholhon sidea, ai ma na i nagori atas ai. Halani ai, lang maila Naibata bani sidea, ra do Ia goranon Naibata ni sidea, ai domma ipauli bani sidea sada huta. 17Marhitei haporsayaon do igalangkon si Abraham si Isak, sanggah na tarlajou ai ia, tongon anakni na sasada ai do igalangkon, sijalo bagah-bagah ai. 18Hubani do ihatahon hinan: Ibagas si Isak do targoran bam ginompar! 19Ihira uhurni do, markuasa Naibata mamuhoi age dob matei, anjaha halani ai do ia ijalo, songon usihan. 20Marhitei haporsayaon do ipasu-pasuhon si Isak hubani si Jakob ampa hubani si Esau pasal na sihol masa ope. 21Marhitei haporsayaon do, sanggah laho matei ia, ipasu-pasu si Jakob anak ni si Josep sada-sada; marsijoloman bani tungkotni marsombah do ia bani Naibata. 22Marhitei haporsayaon do itarsingathon si Josep, bani na laho matei ia, pasal parluar ni halak Israel, anjaha martonah ia pasal holi-holini. 23Marhitei haporsayaon do si Musa, dob tubuh ia, iponophon namatorasni, tolu bulan dokahni, halani anak na jenges ia iidah, anjaha seng mabiar sidea bani parentah ni raja ai. 24Marhitei haporsayaon do, dob magodang, manjua si Musa goranon anak ni boru ni Parao. 25Rahanan do ia manaron na marsik rap pakon bangsa ni Naibata, humbani na marsonang-sonang tongkin ibagas dousa. 26Manaron hadorunon ni Kristus, ai do ihira habayakon sibanggalan humbani arta na i tanoh Masir, ai pambalason ai do itonggor. 27Marhitei haporsayaon do itadingkon tanoh Masir, seng mabiar bani ringis ni raja ai; ai totap do ia marsijoloman bani na so taridah ai, songon na dob iidah. 28Marhitei haporsayaon do idalankon Paska ai ampa na mamispishon daroh ai, ase ulang mahua bunga tubuh ni sidea ibahen sipangagou ai. 29Marhitei haporsayaon do ibontas laut Sigerger songon tanoh na horah; iuji halak Masir ma ai, gabe matei mogap ma sidea. 30Marhitei haporsayaon do mareong tembok ni huta Jeriko, dob pitu ari dokahni iinggoti. 31Marhitei haporsayaon do ase lang matei si Rahab, boru jalang ai, rap pakon na so mambalosi; ai ibagas damei do ijalo parkahap ai. 32Aha ope hatahononku? Seng dong be panorang bakku, laho mambaritahon pasal si Gideon, si Barak, si Simson, si Jepta, si Daud, si Samuel pakon nabi-nabi ai. 33Marhitei haporsayaon do italuhon sidea harajaon, ihorjahon hapintoran, ijalo bagah-bagah, itutup babah ni singa, 34iintopi gogoh ni apuy, maluah humbani mata ni podang, suang margogoh humbani hagalekon, gabe margogoh i parporangan anjaha ibahen maporus tentara ni bangsa na legan. 35Ijalo puang-puang do na mateini mulak manggoluh. Tapi deba na legan ai iarsik-arsik do, seng saud maluah, ase marulih bani parpuhoon sidearan. 36Na deba nari manaron risa-risa ampa lonsing-lonsing, seng pitah sonai, tapi isangkut do anjaha itutup, 37ipargijig, ilajou koras, igargaji, matei hona bunuh ibahen podang, minsah-insah marhiou bobak ni biri-biri atap hambing pe, marhahurangan, hona odoh-odoh ampa hona jahatan. 38Seng maharga be dunia on bani sidea, gabe laho sidea hu halimisan, hu dolog, hu liang-liang ampa lombang-lombang ni tanoh on. 39Anjaha haganup sidea, age pe dapotan hasaksian na madear marhitei haporsayaon ni sidea, seng ijalo ope na pinarbagah-bagah ai, 40ai sidearan do isurahon Naibata bereonni banta, ase ulang das sidea hubani na gokan dear, anggo lang rap pakon hita.

will be added

X\