GALATIA 6

1Nasiam sanina, anggo dong tardapot halak ibagas sada panlanggaron, nasiam na marpartonduyon ma patorsa-torsahonsi marhitei tonduy halamlamon, tapi jaga dirimu, ase ulang dihut ham tarlajou. 2Marsiurupan ma nasiam, mamorsan na borat in, ai marhiteihon ni in idalankon nasiam do titah ni Kristus. 3Ai anggo ipajuntul-juntul halak dirini, hape aha pe lang ia, na paoto-otohon dirini do ai. 4Tapi ganup ma mamareksa horjani bei; jadi halani dirini tumang ma ia mamuji-muji diri, sedo halani na legan, 5ai ganup do adong siporsanonni bei. 6Tapi patut do na niajaran bani Hata ni Naibata mambere humbani sagala artani bani na mangajarisi. 7Ulang ma kahou nasiam, seng ra Naibata apasan! Ai ia in itidahkon halak, ai do sabionni. 8Na manidahkon bani dagingni, manabi do humbani dagingni hamagouan; tapi na manidahkon bani tonduy, manabi do humbani tonduy hagoluhan sisadokah ni dokahni. 9Tapi ulang ma marnaloja hita mambahen na madear, ai na manabi do use hita bani panorangni, anggo seng gabe galek hita sonari. 10Ai pe, halani sompat ope, horjahon hita ma na madear bani haganup halak, tapi bueinan bani hasomanta sahaporsayaon. 11Tonggor nasiam ma, sonaha banggal-banggal ni huruf na husurat bani nasiam marhitei tanganku sandiri. 12Haganup na marsura-sura sangap bani pardagingon, ai do na mamaksa nasiam ase tarsunat, pitah, ase ulang marsitaronon sidea halani silang ni Kristus. 13Ai gari sidea, siparsunat ai, seng idalankon titah in, tapi ihasiholhon sidea do, ase tarsunat nasiam, ase boi sidea mamuji diri marhitei daging nasiam. 14Tapi daoh ma humbakku na mamuji diri, anggo lang halani silang ni Tuhan Jesus Kristus! MarhiteihonSi domma tarsilang dunia on bakku, anjaha ahu bani dunia on. 15Atap na marsunat atap na so marsunat, seng dong age aha artini ai, tapi na tinompa na baru ai do. 16Anjaha haganup na marparlahouhon ruhut sisonai ai, damei ampa idop ni uhur ma bani sidea, sonai homa bani Israel ni Naibata. 17Hu lobeian on ulang adong be na manlojai ahu, ai hupaboan-boan do tanda ni ugah ni Jesus bani angkulangku. 18Idop ni uhur ni Tuhanta Jesus Kristus ma mangkasomani tonduy nasiam, nasiam sanina! Amen.

will be added

X\