GALATIA 5

1Ase mardeka hita, ai do ase imardekahon Kristus hita. Totap ma nasiam jongjong, anjaha ulang be ra nasiam patundukon ni pasangan parjabolonon! 2Ahu si Paulus manghatahon bani nasiam: Anggo ipasunathon nasiam diri nasiam, otik pe lang marguna be Kristus bani nasiam. 3Huulaki ma manaksihon bani haganup jolma: Na pasunathon diri, maningon horjahononni do haganup titah in. 4Na dob sirang do nasiam humbani Kristus, anggo sihol pintor nasiam marhitei na mangkorjahon titah, domma madabuh nasiam humbani idop ni uhur. 5Ai na paima-imahon do hita bani hapintoran siaraphonon ai marhiteihon Tonduy, maronjolan bani haporsayaon. 6Ai ibagas Kristus Jesus marsunat atap lang marsunat, seng dong gogoh ni ai, tapi haporsayaon sihorjahon holong ai do. 7Dear hinan do pardalan nasiam, ise do na manlanglangi nasiam, gabe seng be pambalosi nasiam bani hasintongan in? 8Pangojur-ojuron na sonai, seng humbani na mandilo nasiam roh ni ai. 9Ragi na otik mambahen migar ganup itak na niagu. 10Tenger do uhurhu bani nasiam marhitei Tuhan in, seng na margoling uhur nasiam. Tapi barang ise pe na manggeori nasiam, sai porsanonni do uhum na hubani. 11Anjaha ahu, nasiam sanina, ambit huambilankon parsunaton, mase ma pala parburuon ahu? Ambit sonai, maronti ma parsangsian halani silang in. 12Ikasih ma namin na manggeori nasiam. 13Ai hu hamardekaan do nasiam tardilo, nasiam sanina, tapi ulang ma pakei nasiam hamardekaon nasiam in gabe bonsir mambalosi daging, tapi marsibalos-balosan ma nasiam ibagas holong. 14Ai haganup titah in ibagas hata na sangkababah on do rimpunni: Haholongi ma hasomanmin songon dirimu! 15Tapi anggo marsiharatan anjaha marsipanganan nasiam samah nasiam, jaga ma nasiam, ase ulang marsisedaan nasiam. 16Tapi on do na huhatahon: Marguru bani Tonduy in ma nasiam marparlahou, anjaha ulang ma suhun-suhuni nasiam hisap-hisap ni daging in. 17Ai na mangimbang tonduy do sura-sura ni daging, anjaha na mangimbang daging do sura-sura ni tonduy; na marsilawanan do in, ase lang tarpasaud nasiam, pinindo ni uhur nasiam. 18Tapi, anggo Tonduy do na mambobahon nasiam, seng be ginomgoman ni titah in nasiam. 19Tapi talar do horja ni daging, ai ma: Parriah-riahon, habutakon, goluh na so marrantei, 20marnaibata na legan, hadatuon, parmunsuh-munsuhon, partinggilon, parsimburuon, ringis, uhur haut, parbolah-bolahon, parlegan-leganon, 21subil, parmabukon, marpoya-poya ampa na usih hujai. Songon na dob huhatahon bani nasiam ijia, sonai do age sonari: Sihorjahon na sonai, seng teanon ni ai harajaon ni Naibata. 22Tapi on do buah ni Tonduy: Holong, malas ni uhur, damei, lumbang ni uhur, habasaron, halayakon, haporsayaon, halamlamon ampa panrajaion diri. 23Seng marlawan titah dompak na sonai ai. 24Tapi halak na ginomgoman ni Kristus Jesus, iparsilangkon do dagingNi, hisap-hisapni ampa rosuh-rosuhni. 25Anggo domma ipagoluh Tonduy in hita, mardalan ma hita homa mangihuthon Tonduy in. 26Ulang ma parayak hita hasangapon na lumei, ulang ma marsipagila-gilaan, anjaha ulang ma marsilateian.

will be added

X\