EPESUS 2

1Nasiam pe, na dob matei hinan halani panlanggaron ampa dousa nasiam, 2ai ma na hinorjahon nasiam hinan mangihutkon panorang ni dunia on, mangihutkon rosuh ni na markuasa i awang-awang ai, ai ma tonduy na marhorja nuan ibagas jolma na so siat hata. 3Raphon sidea do hinan age hita haganup manghorjahon hisap-hisap ni dagingta, ai ma ibagas na ipaihut-ihut hita sura-sura ni daging in hinan ampa rosuh-rosuhni; jadi jolma sigilaan do hita humbani biakta hinan, songon na legan ai. 4Tapi Naibata, na bayak bani idop ni uhur, halani holongNi na banggal in banta, 5ipagoluh do hita raphon Kristus, sagala na dob matei ibagas panlanggaron (halani idop ni uhur do, ase maluah nasiam). 6Anjaha rap pakon Kristus Jesus do hita ipapuho, anjaha ipabangkit do hita hu gomgoman nagori atas ibagas Kristus Jesus, 7ase ipatuduhkon bani panorang na sihol roh ope, surung ni habayakonNi marhitei banggal ni habasaronni banta ibagas Kristus Jesus. 8Ai humbani idop ni uhur do ase maluah nasiam, marhitei haporsayaon; sedo binahen nasiam, sibere-bere ni Naibata do. 9Sedo humbani horja, ase ulang adong na mamuji diri. 10Ai jadi-jadianNi do hita, na tinompa ibagas Kristus Jesus, bani horja na madear; hujai do hita ipasirsir Naibata hinan, ase ibagas ai hita marparlahou. 11Halani ai, nasiam sipajuh begu-begu hinan ibagas pardagingon, nasiam "na so siparsunat" igoran halak siparsunat ibagas daging marhitei tangan, ingat nasiam ma: 12Ijia sirang do nasiam humbani Kristus; idarat ni warga Israel do nasiam, seng marulih bani padan bagah-bagah, seng marpangarapan, anjaha seng adong Naibata bani nasiam i tanoh on. 13Tapi anggo sonari, ibagas Kristus Jesus do nasiam; anjaha daoh pe nasiam ijia, gabe ipadohor daroh ni Kristus do nasiam sonari. 14Ai Ia do pardameian banta, na pasadahon na dua ai, anjaha na parsedahon dingding bolat-bolat ai, ai ma hamunsuhon ai. 15Ai ibagas dagingNi do iparseda titah in rap pakon tonah-tonah ampa aturan-aturanNi, ase itompah ibagas diriNi na dua ai, gabe sada jolma na baru, bani na pinajongjongNi damei. 16Anjaha ipadear do na dua ai ibagas angkula na sada ai bani Naibata marhitei silang ai; ai ijai do ibunuh hamunsuhon ai. 17Dob roh Ia, ibaritahon do damei bani nasiam na daoh, damei homa bani na dohor. 18Ai marhiteihonSi adong do dalan marayak Bapa in, banta haduasi ibagas sada Tonduy. 19Ase lang be panginsolat atap partoloh nasiam, tapi hasoman saharajaon ni halak na mapansing do, anjaha hasoman sarumah ni Naibata. 20Ipauli do nasiam iatas ni onjolan ni apostel ampa nabi; Kristus Jesus sandiri do batu parsuhi ijin. 21Ibagas Ia do mardomu ganup rumah in anjaha lambin banggalni, gabe rumah panumbahan na mapansing ibagas Tuhan in. 22Ibagas Ia do homa nasiam ipauli-uli, gabe ianan ni Naibata ibagas Tonduy in.

will be added

X\