LAHOAN NI APOSTEL 6

1Bani panorang ai, dob lambin martambah buei ni susian ai, tubuh ma ungut-ungut ni halak parsahap Gorik dompak parsahap Heber, halani hurang panatapan bani na mabalu humbani sidea ibagas pangurupion ari-ari. 2Jadi ipahumpul na sapuluh dua ai ma haganup susian ai, nini ma: Seng patut iahap hanami papudionnami parambilanon bani hata ni Naibata, halani na patorsa-torsa idop ni uhur. 3Ai pe nasiam sanina, pindahi nasiam ma hun tongah-tongah nasiam pitu halak, na dear baritani, na ginokan ni Tonduy anjaha na pantas maruhur, sipabangkitonta bani horja in. 4Tapi, anggo hanami, tonggo ampa horja parambilannon ai ma horjahononnami. 5Jadi rosuh ma uhur ni na sakuria ai bani hata ai, gabe ipilih sidea ma si Stepanus, sada halak na gok haporsayaon ampa Tonduy Na pansing, dob ai si Pilippus, si Porkorus, si Nikanor, si Timon pakon si Parmenas, ambah ni ai si Nikolaos, sada parguru hun Antiokia. 6Ipajongjong ma sidea i lobei ni apostel ai, anjaha dob martonggo sidea, itampeihon sidea ma tanganni bani sidea. 7Jadi lambin rarat ma hata ni Naibata, anjaha tambah bilangan ni susian ai i huta Jerusalem; buei do age malim, na gabe porsaya. 8Ia si Stepanus gok idop ni uhur do ampa hagogohon; boi do ia mambahen halongangan ampa tanda na banggal i lobei ni na mabuei ai. 9Jadi roh ma deba halak marsual dompak si Stepanus, ai ma halak na humbani parguruan, na margoran Libertini, ampa na hun Kirene, hun Alexandria, hun Kilikia ampa Asia. 10Tapi seng tarimbang sidea hapentaranni ampa Tonduy ai, na mangajarisi. 11Jadi ijuljul sidea ma deba halak, na mangkatahon: Ibogei hanami do halak on mangkatahon hata apas-apas dompak si Musa ampa Naibata. 12Ipajobu-jobu sidea do halak na mabuei ai ampa pangintuai ampa sibotoh surat, gabe idorab sidea ma si Stepanus, anjaha isarad hu lobei ni Rapot Bolon ai. 13Ipajongjong sidea do saksi siparladung, na mangkatahon: Seng na marnamaronti halak on mangkatai ianan na pansing in age titah in, 14ai ibogei hanami do ihatahon: Parsedaon ni Jesus na hun Nasaret ma rumah panumbahan in, anjaha paubahonni do adat, na ijalo hita humbani si Musa. 15Anjaha ganup do parrapot ai mannonoisi; songon bohi ni malekat do bohini iidah sidea.

will be added

X\