LAHOAN NI APOSTEL 5

1Adong ma ijia sada halak na margoran si Ananias, rap pakon parinangonni, na manjualhon tanohni. 2Ibagas botoh ni parinangonni, iponopkon do deba bolini ai, deba iboan anjaha iberehon i lobei ni apostel ai. 3Tapi nini si Petrus ma: Ale Ananias, mase ma igoki sibolis uhurmu, gabe iladungi ham Tonduy Napansing, anjaha iponophon ham deba boli ni tanoh ai? 4Anggo ijolomi ham in, ai lang saguru bamu do, anjaha ijual ham pe in, ai lang tong do saguru bamu? Mase ma tubuh uhurmu mambahen na sonin? Sedo jolma na niladunganmu ijin, Naibata do! 5Tapi ijin ibogei si Ananias hata ai, tompas ma ia lanjar rotap hosahni. Jadi mabiar tumang ma haganup na mambogeisi. 6Jadi roh ma halak siposonan, ibaluti sidea ma bangkeini ai, dob ai iusung ma hu darat laho mananom. 7Dob salpu hira-hira tolu jam roh ma parinangonni ai, tapi lape ibotoh na masa ai. 8Jadi iparsahapkon si Petrus ma ia: Hatahon ma bakku, na sa on do ijual nasiam tanoh ai? Eak, na sa in do, nini. 9Tapi nini si Petrus ma hubani: Mase ma sauhur nasiam manlajou Tonduy ni Tuhan in? Tonggor ma, bokas ni nahei ni na mananom paramangonmu, ham pe usungon ni sidea ma hu darat! 10Jadi mintor tompas ma ia i lobei ni nahei ni si Petrus, lanjar rotap ma hosahni. Jadi sanggah masuk halak siposonan ai, domma matei ia jumpah sidea, iusung sidea ma ia hu darat, anjaha itanom ma hu lambung ni paramangonni. 11Jadi mabiar tumang ma haganup na sakuria ai ampa haganup na mambogei ai. 12Jadi masa ma buei tanda ampa halongangan marhitei tangan ni apostel ai bani na mabuei ai; sauhur do sidea haganup, martumpu do sidea i surambih ni si Salomo. 13Tapi humbani na legan ai, seng dong na pag pasaorhon dirini hubani sidea; sangap do sidea iidah jolma simbuei. 14Anjaha lambin tambah do na porsaya bani Tuhan in, buei dalahi sonai age naboru, 15pala ipamboan sidea na boritan hu alaman, anjaha ipatibal bani podoman ampa apei, andohar hona halinoh ni si Petrus sidea sanggah montas ia. 16Dihut do hun huta-huta na inggot ai roh buei halak hu Jerusalem, mamboan na boritan ampa na niodar-odar ni tonduy na mabutak, gabe malum ma sidea haganup. 17Jadi martindak ma sintua ni malim ai ampa haganup na mangkasomanisi, ai ma golongan Sadukei, igoki ringis do simburu ni uhur ni sidea, 18itangkap sidea ma apostel ai anjaha imasukkon ma sidea hu tutupan umum. 19Tapi bornginni ai, ibuha sada malekat ni Tuhan in ma labah ni tutupan ai, iboan ma sidea hu darat lanjar nini ma: 20Laho ma nasiam hu rumah panumbahan, hatahon nasiam ma bani halak na mabuei ai pasal hata hagoluhan in! 21Mambogei ai, jadi sogod ma sidea misir hu rumah panumbahan ai laho mangajari. Ia sintua ni malim ampa na mangkasomanisi, iadongkon sidea ma rapot bolon rap pakon pangintuai-pangintuai ni bangsa Israel, anjaha isuruh ma hu tutupan na mangalop sidea. 22Tapi dob das hujai juak-juak ai, seng adong jumpah sidea ijai, gabe mulak ma sidea patugahkon ai, nini ma: 23Tutup tumang do namin tutupan ai jumpah hanami, anjaha parjaga jongjong i lobei ni labah ai; tapi dob iungkab hanami, ise pe lang jumpah hanami i bagas. 24Ase dob ibogei kopala ni rumah panumbahan ampa sintua ni malim ai hata ai, haru ma uhur ni sidea mamingkiri, atap na sonaha do holi dobni ai. 25Tapi roh ma sada halak na patugahkon bani sidea: Tonggor nasiam ma, i rumah panumbahan do halak na pinatutupkon nasiam ondi mangajari halak na mabuei! 26Jadi laho ma kopala ni rumah panumbahan ai rap pakon juak-juak ai mangalop sidea, tapi seng marhasoman paksa, halani mabiar sidea ipargijig halak na mabuei ai. 27Iboan ma sidea anjaha ipajongjong i lobei ni Rapot Bolon ai. Jadi ipareksa sintua ni malim ai ma sidea, nini ma: 28Gomos do ilarang hanami hanima mangajari marhitei Goran ai, hape lambin igoki hanima do huta Jerusalem marhitei podah nima, ase marsapata bannami daroh ni Halak ondi, nini uhur nima. 29Jadi nini si Petrus ampa apostel-apostel ai ma mambalosi: Maningon balosan do diri bani Naibata ase bani jolma! 30Ipapuho Naibata ni ompungta do Jesus, na binunuh nasiam marhitei na manggantungkonsi bani hayu na marsilang. 31Ipagijang Naibata do Ia hu siamunNi gabe Pambobai anjaha Sipaluah, laho mambere hubani Israel hamubahon ni uhur ampa hasasapan ni dousa. 32Hanami do saksi pasal ai ampa Tonduy Napansing, na binere ni Naibata bani na mambalosiSi. 33Tapi mambogei ai marah tumang ma sidea, gabe iputushon sidea ma sihol mambunuh sidea. 34Tapi jongjong ma bani rapot ai sada halak Parisei, na margoran si Gamaliel, sada sibotoh titah, na sangap bani uhur ni bangsa ai, jadi ihatahon ma, ase isuruh sidea hu darat tongkin. 35Dob ai nini ma hubani sidea: Nasiam halak Israel, pangkei ma nasiam pasal sibahenon nasiam bani halak on! 36Jongjong do ijia si Toidas, ipabanggal do dirini, pala adong ompat ratus halak na mangirikkonsi. Tapi tarbunuh do ia, gabe merap do ganup na mangirikkonsi, anjaha seng dong be. 37I pudini ai, jongjong do use si Judas, halak Galilea ai, sanggah panorang sensus ondi, anjaha buei do halak na mamberontak iarahkon; tapi ia pe tarbunuh do, anjaha merap do na mangirikkonsi ai. 38Ase ai pe, ulang ma kahua nasiam halak on, paturut nasiam ma sidea, ai anggo humbani jolma do sura-sura ampa horja on, sai na maseda do in. 39Tapi anggo humbani Naibata do, seng tarkahua nasiam sidea, ulang gabe siimbang Naibata nasiam holi. Jadi iparhatongon sidea ma hatani ai. 40Dob ai idilo sidea ma apostel ai; isuruh ma na manlonsingi sidea anjaha ilarang ma sidea mansahapkon Goran ni Jesus; salpu ai ipaluah ma sidea. 41Tapi malas do uhur ni sidea luar hun rapot ai, halani boi sidea manaron hiri-hiri mangkopkop Goran ni Jesus. 42Anjaha seng marnamaronti sidea i rumah panumbahan age marrumah-rumah pe, mangajari ampa mangambilankon Kristus Jesus.

will be added

X\