LAHOAN NI APOSTEL 23

1Jadi ikawahkon si Paulus ma rapot bolon ai, nini ma: Nasiam hasoman, na marparlahou do ahu humbani gok ni uhurhu i lobei ni Naibata ronsi sadari on. 2Tapi ihatahon sintua ni malim Ananias ma halak na jongjong ijai mamastap babahni. 3Jadi nini si Paulus ma hubani: Pastapon ni Naibata ma ho, ale dingding na hinapur! Na hundul do ho manguhumi ahu marguru hubani titah, hape ihatahon ho do ahu pastapon marlawan bani titah! 4Dob ai nini halak na jongjong ijai ma: Ai pahirion do sintua ni malim ni Naibata? 5Jadi nini si Paulus ma: Lang na hubotoh, ale hasoman, ia sintua ni malim. Ai tarsurat do: Seng bulih pahirionmu sintua ni bangsamu. 6Tapi ibotoh si Paulus ma deba humbani sidea, ai ma Sadukei, na deba nari halak Parisei, gabe idilohon ma i rapot ai: Nasiam sanina! Halak Parisei do ahu, anjaha anak ni Parisei. Halani pangarapan ai ampa parpuhoon humbani na matei do, ase hu paruhuman on ahu. 7Jadi dob ihatahon sonai, marsalisih ma halak Parisei pakon halak Sadukei, gabe marbolah ma rapot ai. 8Ai ihatahon Sadukei do, paboa seng dong parpuhoon humbani na matei, sonai age malekat, age tonduy. Tapi anggo Parisei, iparhatongon do haduasi. 9Gabe lutu tumang ma. Tapi jongjong ma deba sibotoh surat humbani golongan ni Parisei manlawan, nini ma: Seng dong jumpah hanami na jahat bani halak on. Atap na tongon do iparsahapkon Tonduy ia atap malekat ni Naibata? 10Tapi lambin banggalni ma paringoran ai, jadi mabiar ma kapiten ai, atap sonaha iparsirak sidea si Paulus, gabe ihatahon ma tuad tentara ai laho manariksi hun tongah-tongah ni sidea, anjaha ase iboan hu tangsi. 11Anjaha bornginni ai jongjong do Tuhan in i lambungni, nini ma: Tenger ma uhurmu! Songon na dob sinaksihonmu Ahu i Jerusalem, sonai do saksihononmu Ahu i huta Rom. 12Dob siang ari, mambahen panriahan ma halak Jahudi, marbulawan ma sidea, seng mangan atap minum sidea, anggo lape hona bunuh si Paulus. 13Adong do lobih ompat puluh halak sidea, na mambahen parbulawanan ai. 14Iparayak sidea ma sintua ni malim ampa pangintuai-pangintuai, nini ma: Domma marbulawan hanami, na so bulih daionnami age aha, anggo seng ibunuh hanami ope si Paulus. 15Ai pe, rap ma nasiam pakon rapot in mangindohon bani kapiten ai, ase iboan ia hu lobei nasiam, songon na laho mamareksa parkara ai hun torang, anjaha hanami pe marsiap-siap ma mambunuhsi sanggah i tongah dalan ope. 16Tapi tarbogei do partahi-tahian ai bani panogolan ni si Paulus, gabe laho ma ia hu tangsi, patugahkon ai bani si Paulus. 17Jadi idilo si Paulus ma sada letnan, anjaha ihatahon ma dompaksi: Arahkon ham lobei parana on bani kapiten ai, ai adong do sipatugahonni bani. 18Jadi iarahkon ma ia, anjaha iboan ma bani kapiten ai, nini ma: Na idilo si Paulus na tartutup ai do ahu; ipindo hubakku, ase huboan parana on bamu, halani adong sihatahononni bamu. 19Ijolom kapiten ai ma tanganni, iarahkon ma ia bani na suhi, anjaha isungkun ma ia: Ai aha do sipatugahonmu bakku? 20Jadi nini ma: Na dob manriah do halak Jahudi, mangindohon bamu, ase boanon patar si Paulus hu lobei ni rapot bolon, songon na laho mamareksa parkarani in huntorang. 21Ai pe, ulang ma balosi ham sidea, ai lobih do ompat puluh halak humbani sidea, na dob marbulawan, seng mangan atap minum pe, anggo lape ibunuh sidea ia; domma marsiap-siap sidea, pitah na paimahon hatamu mando. 22Dob sonai isuruh kapiten ai ma parana ai mulak, ihatahon ma bani: Ulang patugah atap bani ise pe, na dob ipadas ho on bakku. 23Jadi idilo ma dua letnan hu lobeini, nini ma: Pasirsir nasiam ma dua ratus tentara laho hu Kesarea, rap pakon pitu puluh halak tentara siajak huda, ambah ni ai dua ratus sipartanja, pukul tolu borngin. 24Pasirsir homa huda siajakon ni si Paulus, laho mamboansi horas-horas hubani gubernus Feliks. 25Lanjar ibahen ma surat sonon isini: 26Klaudius Lisias hubani na pinarsangapan gubernur Feliks. 27Na itangkap halak Jahudi do halak on; sanggah sihol bunuhon ni sidea ia, roh do ahu ampa tentera paluahkonsi, dob hubotoh halak Rom do ia. 28Laho mambotoh atap halani aha do, ase isalahkon sidea ia, gabe huarahkon ma ia hulobei ni rapot ni sidea. 29Jadi jumpah ahu ma, halani parsalisihan pasal titah ni sidea do ase iaduhon sidea ia; seng dong alasan mambahen marutang hosah ia atap tartutup. 30Tapi adong ma na patugahkon bakku pasal partahi-tahian ni sidea dompak halak on, gabe mintor ma husuruh ia bamu, anjaha huhatahon homa bani sipangadu, ase bamu ma isahapkon sihatahononni. 31Ase iboan tentara ai ma si Paulus domu hubani parentah ai, iarahkon ma ia bani na saborngin ai das hu Antipatris. 32Patarni ai isuruh ma siparhuda manaruhkonsi torus; mulak hu tangsi ma anggo sidea. 33Jadi das ma sidea hu Kesarea, ipadas sidea ma surat ai hubani gubernur ai, anjaha si Paulus pe iarahkon ma hu lobeini. 34Jadi dob ibasa surat ai, isungkun ma, barang hun nagori ja do ia. Anjaha dob ibotoh na hun Silisia do ia, nini ma: 35Hupareksa pe ho, anggo roh na mangaduhon ho ai. Jadi ihatahon ma, ase itahan ia i rumah paruhuman ni raja Herodes.

will be added

X\