LAHOAN NI APOSTEL 22

1Nasiam sanina ampa bapa, tangar nasiam ma sonari pangapition diri na huhatahon i lobei nasiam! 2Ase dob ibogei sidea, na iparsahapkon ai sidea ibagas hata Heber, lambin sip ma sidea. 3Halak Jahudi do ahu, tubuh i Tarsus na i Silisia, tapi magodang i huta on; i lobei ni si Gamaliel do ahu iajari domu hubani hatulimaton ni titah ni ompungta, pongkut do ahu mangirikkon Naibata, songon haganup nasiam sadari on. 4Huparburu do ronsi matei parugama on, husangkut anjaha hu patutupkon do dalahi age naboru, 5anjaha pasal ai, sintua ni malim ampa harungguan ni pangintuai-pangintuai do saksi bakku. Humbani sidea do hujalo surat siboanon hubani sanina-sanina ai, anjaha laho ma ahu hu Damaskus, sihol manangkapi na ijai ai homa, anjaha mamboan sidea ibagas gari hu Jerusalem, ase iuhumi. 6Tapi masa ma, sanggah i tongah dalan ahu, dohorhon Damaskus, hira-hira tongah arian, sompong ma marsinalsal hun datas, inggot hubakku, sinalsal na lihar tumang. 7Tompas ma ahu hu tanoh, anjaha hubogei ma sora na mangkatahon hubakku: Saul! Saul! Mase ma pardakdakonmu Ahu? 8Jadi ningku ma mambalosi: Ise do Ham Tuhan? Nini ma hubakku: Jesus do Ahu, na hun Nasaret, na pinardakdakmin! 9Iidah hasomanku do namin sinalsal ai, tapi anggo sora ai, na marsahap pakon ahu, seng ibogei sidea. 10Jadi ningku ma: Aha ma sibahenonku, Tuhan? Jadi ihatahon Tuhan in ma hubakku: Jongjong ma ho, laho ma ho hu Damaskus, ijai ma patugahon bam haganup na patut sihorjahononmu. 11Tapi seng marpangidah be ahu ibahen sinalsal ni sondang ai, gabe itogu hasomanku mando ahu das hu Damaskus. 12Anjaha dong ma ijai sada halak, na margoran si Ananias, halak na daulat domu hubani titah in, dear do baritani bani haganup Jahudi na marianan ijai. 13Roh do ia hubakku nini: Ambia Saul, marpangidah ma ho! Jadi mintor marpangidah ma ahu anjaha huidah ma ia. 14Dob ai nini ma: Domma ipilih Naibata ni ompungta ho, ase itanda ho rosuh ni uhurNi, iidah ho Parpintor in anjaha ibogei ho sandiri sorani, 15ase gabe saksini ho bani haganup jolma pasal na niidah ampa na binogeimu. 16Ai pe, mase ma sonai sangsi-sangsi uhurmu? Jongjong ma anjaha tardidi, paburihkon dousamu marhitei na mandilo goranNi. 17Dob mulak ahu hu Jerusalem anjaha martonggo i rumah panumbahan, marpanonggoran do ahu. 18Huidah do Ia mangkatahon bakku: Papodas ma misir hun Jerusalem, ai seng ra sidea manjalo hasaksianmu pasal Ahu. 19Jadi ningku ma: Ibotoh sidea do Tuhan, na hupatutupkon anjaha hulonsingi do na porsaya Bamu bani ganup rumah parguruan. 20Anjaha sanggah na hona duruskon daroh ni si Stepanus, saksi-Mu ondi, jongjong do au homa ijai, huhadearhon do ai, anjaha ahu manjaga pakeian ni na mambunuhsi. 21Jadi nini ma dompak ahu: Laho ma, ai hubani na daoh do ho suruhonKu, ai ma hubani sipajuh begu-begu. 22Das hubani hatani on, itangihon sidea do ia; dob ai ipagogoh sidea ma sorani, nini ma: Padaoh ma jolma sisonin hun tanoh on, seng patut ia manggoluh! 23Tapi sai mardilo-dilo do sidea, ihilap-hilapkon pakeianni anjaha ipansaburhon orbuk hu atas. 24Jadi ihatahon kapiten ai ma ia boanon hu bagas tangsi, anjaha isuruh ma pareksaon ia marhitei na manlonsingisi, ase ibotoh mase sonai parsurak-surak ni sidea dompaksi. 25Tapi dob isangkut sidea ia bani tali huling-kuling, nini si Paulus ma dompak letnan na jongjong ijai: Ai bulih do lonsingan nasiam warga negara Rom, age lape na pareksa parkarani? 26Mambogei ai letnan ai, laho ma ia bani kapiten ai, patugahkon ai, nini ma: Ai aha do na sihol bahenonmu? Halak Rom do hape halak ai. 27Jadi roh ma kapiten ai hubani, nini ma: Patugah bakku, halak Rom do ho tongon? Balosni: Ai do! 28Dob ai marbalos ma kapiten ai: Anggo ahu, buei do rugi mamboli hak warga negara in. Tapi nini si Paulus ma: Anggo ahu, humbani partubuhku do sonai. 29Jadi mintor surut ma halak na sihol mamareksa ai. Kapiten ai pe mabiar ma, dob ibotoh halak Rom do hape si Paulus, na dob sinuruhni sangkuton. 30Patarni ai sihol ma torang botohonni, aha halani mambahen na iaduhon halak Jahudi ia; ipadarat ma ia, ihatahon ma martumpu sintua ni malim ampa rapot bolon ai, anjaha si Paulus pe itogu ma hu tongah-tongah ni sidea.

will be added

X\