LAHOAN NI APOSTEL 18

1Dob ai bingkat ma si Paulus hun huta Aten laho hu huta Korint. 2Jadi jumpahsi ma ijai sada halak Jahudi, na margoran si Akila, na tubuh i Pontus, na roh baru hun Italia rap pakon parinangonni, si Priskilla, halani iparentahkon si Klaudius, maningon haganup halak Jahudi bungkas hun huta Rom. 3Bani sidea ma ia marianan anjaha rap marhorja pakon sidea, halani sada hapandeian do sidea, ai ma martonun hiou tenda. 4Marambilan do ia ganup ari Sabat i rumah parguruan, andohar marhatongon halak Jahudi ampa Gorik. 5Ase dob roh si Silas ampa si Timoteus hun Makedonia, igogohi si Paulus ma marambilan, laho manaksihon bani Jahudi, paboa Jesus do Kristus in. 6Halani manlawan sidea anjaha manrehei, ipaspas si Paulus ma hiouni, anjaha nini ma bani sidea: Marsapata bani nasiam ma darohnasiam! Borsih do anggo ahu. Hunjon-hujanan bani halak sipajuh begu-begu ma ahu laho. 7Lanjar misir ma ia hunjai, tondok ma ia bani sada halak na margoran si Titius Justus, sihabiari Naibata; rombankon rumah parguruan ai do rumahni. 8Ia si Krispus, kopala ni rumah parguruan ai, porsaya do bani Tuhan in sonai haganup parrumahni; anjaha buei do halak Korint, dob ibogei ai, na gabe porsaya anjaha tardidi. 9Jadi nini Tuhan in ma bani si Paulus borngin-borngin marhitei sada panonggoran: Ulang ho mabiar, tapi hatahon ma, ulang ho sip! 10Ai Huhasomani pe ho, sahalak pe lang dong na mangkahua ho, na sihol mangagou ho; ai buei do halak Bakku i huta on! 11Ijai ma ia marianan satahun onom bulan dokahni, mangajarhon hata ni Naibata bani sidea. 12Tapi sanggah si Gallio panggomgomi i Akaya, sapanriah ma halak Jahudi manlawan si Paulus, anjaha iboan ma ia hu paruhuman. 13Nini sidea ma: Isahap-sahapi halak on do jolma ase mambalosi Naibata na marsilawanan bani titah in. 14Jadi sanggah sihol marsahap si Paulus, nini si Gallio ma dompak Jahudi: Nasiam halak Jahudi! Ambit halani parkara hasalahan atap hajahaton, patut do bantuanku nasiam. 15Tapi halani parsalisihan pasal podah ampa goran ampa titah nasiam do in, uhur nasiam ma ijin; seng ra ahu manguhumi na sonin. 16Jadi ipalaho ma sidea hun paruhuman ai. 17Gabe roh ma sidea haganup manangkap si Sostenes, kopala ni rumah parguruan ai, ibogbogi sidea ma ia i lobei ni paruhuman ai, tapi seng isampuri si Gallio ai. 18Tapi hundokah ope si Paulus ijai; dob ai mamuhun ma ia humbani sanina-sanina ai, anjaha marparau ma ia hu Siria, rap pakon si Priskilla ampa si Akilla. I Kenkerea, ipasuhurhon do jambulanni halani adong bagah-bagahni. 19Das ma sidea hu Epesus, anjaha itadingkon ma sidea ijai; ia sandiri, laho do hu rumah parguruan, laho marsahap pakon halak Jahudi. 20Ipindo sidea do, ase hundokah ia ijai, tapi seng ra ia. 21Tapi sanggah na laho marsirang humbani sidea, ihatahon do: Anggo marosuh Naibata, mulak do ahu bani nasiam. Dob ai misir ma ia marparau hun Epesus. 22Dob das hu Kesarea, tangkog ma ia hu Jerusalem, anjaha dob itabi kuria ai, tuad ma ia hu Antiokia. 23Ase dob hundokah ia ijai, bingkat ma ia; ibontas ma nagori Galatia ampa Prigia, laho patoguhkon uhur ni haganup susian ai. 24Tapi roh ma hu huta Epesus sada halak Jahudi, na margoran si Apollos, tubuh i huta Aleksandria; halak na pentar do ia, na torang mambotoh surat in. 25Domma iajari ia pasal dalan ni Tuhan in, hinsah do uhurni marsahap anjaha torang do pamodahionni pasal Jesus; tapi pitah pandidion ni si Johannes do ibotoh. 26Ipungkah ma ibagas hinsah ni uhur marsahap i bagas rumah parguruan. Ibogei si Akilla ampa si Priskilla ma ai, gabe iarahkon sidea ma ia, anjaha ipatorang sidea ma bani tulimat pasal dalan ni Naibata. 27Jadi sanggah na sihol laho ia hu Akaya, ihadearhon sanina-sanina ai do ai, anjaha manongos surat do sidea, mangkatahon, ase ijalo sidea ia. Anjaha dob das ijai, gabe pangurupi na banggal do ia bani halak na porsaya, marhitei idop ni uhur ni Naibata, 28ai torang-torang do italuhon halak Jahudi i lobei ni halak na mabuei, marhitei na mambuktihon humbani surat in, paboa Jesus do Kristus in.

will be added

X\