LAHOAN NI APOSTEL 15

1Tuad ma piga-piga halak hun Judea, na mangajarhon bani sanina-sanina ai: Anggo lang tarsunat nasiam mangihuthon aturan, na binahen ni si Musa, seng boi nasiam maluah. 2Jadi gogoh ma sidea isual anjaha ilawan si Paulus ampa si Barnabas, gabe isuruh ma si Paulus ampa si Barnabas ampa hasoman deba nari hu Jerusalem marayak apostel-apostel ampa pangintuai-pangintuai, laho patorangkon parsalisihan ai. 3Dob ipaingkat kuria ai sidea, idalani sidea ma tanoh Penisia ampa Samaria, ibaritahon sidea ma ijai parmubah ni uhur ni halak sipajuh begu-begu, gabe malas tumang ma uhur ni sanina-sanina ai ibahen. 4Das honsi sidea hu Jerusalem, ialo-alo kuria ai, pakon apostel-apostel ampa pangintuai ai ma sidea, gabe ibaritahon sidea na roh ai ma buei ni na binahen ni Naibata marhitei sidea. 5Tapi jongjong ma deba humbani golongan Parisei, na dob gabe porsaya, ihatahon maningon sunaton do sidea anjaha ojuron mandalankon titah ni si Musa. 6Dob ai martumpu ma apostel ai ampa pangintuai ai laho mansahapkon parsahapan ai. 7Dob dokah sidea marsual, jongjong ma si Petrus, nini ma bani sidea: Nasiam sanina, ibotoh nasiam do, na girah do ahu ipilih Naibata i tongah-tongah nasiam, laho patugahkon Ambilan Namadear in bani halak sipajuh begu-begu, ase porsaya sidea. 8Naibata, sitanda uhur in do manaksihon sidea marhitei na mambere TonduyNi bani sidea, songon na hubanta. 9Seng adong ubah ni hita pakon sidea ibahen Naibata, dob ipaborsih uhur ni sidea marhitei haporsayaon. 10Anggo sonai, mase ma lajouon nasiam nuan Naibata, marhitei na manampeihon pasangan bani tangkuhuk ni susian in, na so tarusung bapanta atap hita pe? 11Marhitei idop ni uhur ni Tuhan Jesus do, ase maluah hita ihaporsayai uhurta; sidea pe sonai do. 12Dob ai sip ma haganup na martumpu ai, manangar hata ni si Barnabas ampa si Paulus, na mambaritahon buei ni tanda ampa halongangan na binahen ni Naibata i tongah-tongah ni sipajuh begu-begu marhitei sidea. 13Ase dob salosei sidea marsahap, marbalos ma si Jakobus, nini: Nasiam sanina, tangihon nasiam ma hatangkon! 14Domma ipatugah si Simon, sonaha baru on panatap ni Naibata, mamilih bani dirini na gabe bangsani humbani halak sipajuh begu-begu. 15Anjaha mardomu do ai bani hata ni nabi-nabi, songon na tarsurat in: 16Dob salpu in mulak ma Ahu, laho patureihon use lampo-lampo ni si Daud na dob marumbak in; ulakanKu do padearhon na dob maseda in, pajongjongonKu do use in, 17ase ipindahi na tading in ma Tuhan, ampa haganup sipajuh begu-begu, na manjujung goranKu, 18nini Tuhan, sibahen in, ai ma dob binotoh humbani na basaia. 19Halani ai, mangihutkon timbanganku, lang be sisunsahan halak sipajuh begu-begu na mandompakkon Naibata. 20Tapi naaturhon ma bani sidea, ase ipantangkon ma parnaibataon na legan, parriah-riahon, mangankon daging ni pinahan na matei seng sinayat ampa daroh. 21Ai humbani na basaia pe adong do bani ganup huta na mangambilankon si Musa, ai ibasa do suratni ganup ari Sabat bani parguruan. 22Dob ai iputushon apostel-apostel, pangintuai-pangintuai ampa haganup kuria ai ma mamilih piga-piga halak hun tongah-tongah ni sidea, sisuruhon hu Antiokia rap pakon si Paulus ampa si Barnabas, ai ma si Judas, na igoran homa si Barnabas, ampa si Silas, si pambobai bani sanina-sanina ai. 23Ia hata ni surat, siboanon ni sidea ai, ai ma: Hanami saninanasiam, apostel-apostel ampa pangintuai-pangintuai, manongos tabi do bani nasiam hasoman na humbani sipajuh begu-begu, na marianan i huta Antiokia, nagori Siria ampa Silisia. 24Ibogei hanami, adong do piga-piga halak hun tongah-tongahnami, na so sinuruhnami, roh manggeori ampa mambumbangi uhurnasiam marhitei podah ni sidea. 25Halani ai sauhur do hanami mamilih halak sisuruhon bani nasiam rap pakon si Barnabas ampa si Paulus, na hinaholongan in, 26na ra marnalangkon hosahni halani Goran ni Tuhan Jesus Kristus. 27Ase isuruh hanami do si Judas ampa si Silas, ase dihut sidea padashon hata in bani nasiam. 28Dear ma nini Tonduy Napansing ampa hanami, na so paporsanonkon be bani nasiam, sobali na porlu on: 29Pantangkon nasiam ma galangan bani sisombahon, daroh, daging ni pinahan na matei seng sinayat ampa parriah-riahon. Anggo ibalosi nasiam in, dear ma in. Horas ma! 30Ase ipaingkat ma sidea, gabe das ma hu Antiokia; dob ipatumpu sidea na mabuei ai, ipadas ma surat ai bani sidea. 31Anjaha dob ibasa surat ai, malas ma uhur ni sidea, halani hata pangapohon ai. 32Ia si Judas ampa si Silas, nabi do homa; buei do marsahap sidea ampa sanina ai, laho margogohi sidea. 33Dob hundokah sidea ijai, ipaingkat sanina ai ma sidea ibagas damei, mulak hubani na marsuruh sidea. 34Ia si Silas, marosuh do uhurni tading ijai. 35Ia si Paulus ampa si Barnabas soh do lobei i Antiokia, gabe iambilankon sidea ma hata ni Tuhan in rap pakon halak na legan. 36Dob salpu piga-piga ari, nini si Paulus ma hubani si Barnabas: Laho ma hita use mangidah saninanta in, bani ganup huta na dob niambilananta bani hata ni Naibata, atap na sonaha do sidea. 37Nini uhur ni si Barnabas, sihol ma dihut arahkononkon si Johannes, na margoran si Markus. 38Tapi nini uhur ni si Paulus, seng dear be dihut ia, halani na dob itadingkon sidea i Pampilia, anjaha seng ihasomani sidea bani horja ai. 39Gabe tubuh ma paringoran i tongah-tongah ni sidea, pala sirang, gabe iarahkon si Barnabas ma si Markus marparau hu pulou Kiprus. 40Jadi ipilih si Paulus ma si Silas bahen hasomanni, gabe bingkat ma sidea, dob iondoskon sanina-sanina ai sidea, bani idop ni uhur ni Tuhan in. 41Jadi idalani sidea ma Siria pakon Kilikia, laho patoguhkon uhur ni kuria ai.

will be added

X\