LAHOAN NI APOSTEL 11

1Jadi ibogei apostel ampa sanina na i Judea ma, na dob dihut do hape sipajuh begu-begu manjalo hata ni Naibata. 2Gabe ihata na porsaya humbani Jahudi ma si Petrus, daskonsi ia i Jerusalem, nini sidea ma: 3Masuk do ham hape hu rumah ni halak na so marsunat, anjaha rap mangan do ham pakon sidea! 4Jadi jojor ma humbani mulani ipatorang si Petrus na masa ai, nini ma: 5Sanggah martonggo ahu i huta Joppe, huidah ma ibagas panonggoran sada ianan songon hiou na bolag, martali haompatsi suhi-suhini, turun hun langit, itantan hu lobeihu. 6Jadi sanggah na hukawahkon ai, laho papangkeihon, huidah ma binatang siompat nahei ni tanoh on, binatang sipanjulur ampa na liar ampa manuk-manuk na i awang-awang. 7Anjaha hubogei ma sora na mangkatahon hubakku: Jongjong ma, Petrus, sayati ma anjaha pangan ma! 8Tapi ningku ma: Lang, Tuhan! Ai lang ongga ope na butak atap na so pansing masuk hu pamanganku. 9Jadi marbalos ma sora ai paduahalihon hun langit: Na dob pinapansing ni Naibata, ulang hatahon ai butak! 10Tolu hali do masa na sonai, dob ai itarik ma haganupan ai hu langit. 11Bani panorang ai jongjong ma tolu halak i lobei ni rumah ianan nami, ai ma na sinuruh hun Kesarea, marayak ahu. 12Anjaha ihatahon Tonduy in do bakku, ase ulang sangsi uhurhu mangirikkon sidea. Sanina na onom halak on do mangkasomani ahu, gabe masuk ma hanami hu rumah ni halak ai. 13Ibaritahon do bannami sonaha pangidahni bani malekat ai jongjong i rumahni, na mangkatahon bani: Suruh ma hu Joppe na mangalopi si Simon, na margoran si Petrus. 14Hatahononni do bamu hata na sihol paluahkon ham ampa haganup sinrumahmu! 15Tapi sanggah mulai ope ahu marambilan ijai, sogop ma Tonduy Napansing bani sidea, songon na hubanta mungkahni ondi. 16Jadi taringat ma ahu bani hata ni Tuhan in, na mangkatahon: Bah do ididihon si Johannes, tapi Tonduy Napansing do didihononkon bani nasiam! 17Jadi, anggo ibere Naibata do bani sidea sibere-bereni songon na hubanta, dob porsaya sidea bani Tuhan Jesus Kristus, sonaha ma boi ahu manlanglangi Naibata? 18Ase dob ibogei sidea ai, sip ma sidea. Ipuji sidea ma Naibata, nini ma: Ase dihut do hape bani sipajuh begu-begu ibere Naibata hamubahon ni uhur, ase manggoluh. 19Ia halak na merap ai, pangkorhon ni parburuon marhalanihon ni si Stepanus, laho ma hu Penesia, hu pulou Kiprus ampa hu Antiokia, anjaha marambilani do sidea, tapi pitah hubani halak Jahudi do hansa. 20Tapi adong do deba humbani sidea, na marasal hun Kiprus ampa Kirene, na roh hu Antiokia, gabe ibaritahon sidea do homa ijai Tuhan Jesus hubani halak Gorik. 21Anjaha ihasomani tangan ni Tuhan in do sidea; gabe buei do na gabe porsaya, na mandompakkon Tuhan in. 22Tarbogei ma pasal ai hu kuria na i Jerusalem, gabe isuruh sidea ma si Barnabas hu Antiokia. 23Das ma ia hujai, iidah ma idop ni uhur ni Tuhan in, gabe malas ma uhurni; iojur ma sidea haganup, ase poltik uhur ni sidea marsijoloman bani Tuhan in, 24ai halak sidear uhur do ia, gok Tonduy Napansing ampa haporsayaon; buei do halak na gabe tartogu bani Tuhan in. 25Jadi laho ma ia hu Tarsus, mangindahi si Saulus, anjaha dob jumpahsi iboan ma ia hu Antiokia. 26Anjaha adong do sidea, na rap ai pakon kuria ai, satahun dokahni; buei do halak na iajari sidea. I Antiokia do mulai igoran susian ai halak Kristen. 27Bani panorang ai roh ma nabi-nabi hun Jerusalem hu huta Antiokia. 28Jadi roh ma sada halak humbani sidea, na margoran si Agabus, gabe ipatugah ma marhitei Tonduy in pasal lohei maningting, na sihol sogop hu sab tanoh on, ai ma na tongon masa sanggah panrajaion ni si Klaudius. 29Jadi sapanriah ma susian ai manongos tumpak, domu hubani na tarbahensi bei, hubani sanina na i Judea. 30Saud ma ibahen sidea ai, itongos ma ai hubani sintua-sintua na ijai ai marhitei si Barnabas ampa si Saulus.

will be added

X\