2 TIMOTEUS 4

1Huparentahkon ma bam i lobei ni Naibata ampa Kristus Jesus, na sihol manguhumi na manggoluh ampa na matei, ampa halani partalarni ampa harajaonni: 2Ambilankon ma hata in, haringgashon ma bani panorang na dear atap na lang dear pe, pinsang, paingat, podahi marhitei lumbang ni uhur banggal ampa pangajarion. 3Ai roh ma panorangni, seng tartahan halak be ijai pangajaran na sintong in, tapi domu hubani rosuh ni sidea diloonni ma buei guru bani sidea, laho mambogei na mantin-mantin tangaron, 4anjaha pagolingon ni sidea ma pinggolni humbani hasintongan hubani turi-turian. 5Tapi anggo ho, torang ma uhurmu pasal haganup, tahan ibagas hasunsahan, dalankon horja parambilanon anjaha gok dalankon tugasmu. 6Ia ahu, galanghononkon ma; domma roh panorangku laho matei. 7Domma hudobkon parlawanan na madear in, hupaujung parlumbaonku anjaha ramot hubahen haporsayaon in. 8Domma sirsir i lobeihu sortali hapintoran in, sibereon ni Tuhan, Panguhum na pintor in bakku bani ari simagira; tapi seng pitah bakku, bani haganup do, na manghasiholi partalarni ai. 9Papodas ma roh marayak ahu! 10Ai domma itadingkon si Demas ahu, halani na dob holong uhurni bani dunia on, lanjar laho hu Tessalonik; si Kreskens laho do hu Galatia, si Titus hu Dalmatia. 11Sahalak si Lukas mando hasomanku. Arahkon si Markus, boan ia hasomanmu, ai porlu do ia marugas bakku. 12Si Tikikus, husuruh do hu Epesus. 13Anggo roh ho, boan ma baju panas, na hutadingkon bani si Karpus, huta Troas; sonai homa buku-buku in, siporlunan ai ma pustaha (perkamen) in. 14Buei do hajahaton ibahen si Aleksander, tukang bosi ai, bakku; Tuhan in ma mambalashon bani domu hubani pambahenanni ai. 15Ho pe, jaga ma ho bani, ai gomos do panlawanni bani hatanami. 16Bani na mampartahankon diringku na parlobei ahu, sahalak pe lang adong na mangurupi, haganup do manadingkon ahu; ulang ma ibalaskon in bani sidea. 17Tapi Tuhan in do mangkasomani anjaha margogohi ahu, ase mardalan parambilanon in marhitei ahu, gabe haganup sipajuh begu-begu mambogeisi; anjaha maluah do ahu humbani babah ni singa ai. 18Paluahon ni Tuhan in do ahu humbani haganup hajahaton, anjaha pamasukonni ahu hu bagas harajaonNi na i nagori atas ai. Bani ma hasangapon ronsi sadokah ni dokahni. Amen. 19Padas ma tabingku bani si Priska ampa si Akila, sonai hubani keluarga ni si Onesiporus. 20Tading do si Erestus i Korint; tapi boritan do hutadingkon si Tropinus i Milete. 21Podas ma ho roh paima musim borgoh. Tabi bam humbani si Oibulus, si Pudens, si Linus, si Klaudia ampa haganup sanina. 22Ihasomani Tuhan in ma tonduy nasiam! Idop ni uhur ma bani nasiam!

will be added

X\