2 PETRUS 3

1Nasiam na hinaholongan: On ma surat na paduahon, na husurat bani nasiam, laho mamuhoi uhur na borsih bani nasiam marhitei hata sipaingat, 2ase idingat nasiam hata na dob hinatahon ni nabi-nabi na mapansing in ampa titah ni Tuhan anjaha Sipaluah in marhitei apostel nasiam. 3On ma na parlobei botohon nasiam; Na roh ma bani ari parpudi sipanrisai, na mansahapkon risa-risa, na mambalosi hisap-hisapni sandiri, 4na mangkatahon: Ija do bagah-bagah pasal parrohni ai? Ai dob matei ompung-ompungta, totap do haganup songon humbani panompaon ni dunia on. 5Tapi ponop do bani sidea, ibagas na sonai pingkiran ni sidea ai, paboa marhitei hata ni Naibata do ase adong langit sapari, anjaha tanoh on humbani bah anjaha marhitei bah, 6lanjar marhitei ai do magou ijia tanoh on, manongnong ibahen bah ai. 7Anjaha langit pakon tanoh sisonari, iramothon do marhitei hata nongkan ai bahen panganon ni apuy, iramothon do das hubani ari paruhuman pakon hamagouan bani halak parjahat. 8Tapi na sada on, ulang ma ponop humbani nasiam, na hinaholongan: Sada ari bani Tuhan in ai ma doshon saribu tahun, anjaha saribu tahun doshon sadari. 9Seng ipadokah-dokah Tuhan in bagah-bagahNi, songon hinatahon ni na deba; tapi lumbang do uhurNi mangidah nasiam, ai ipangindo uhurNi ulang ma magou namin atap ise pe, tapi das ma haganup tene hu hamubahon ni uhur. 10Tapi na roh ma ari ni Tuhan in songon panangko; mardorob ma ijai langit in laho maseda, anjaha masarsar ma unsur ni tanoh on halani apuy ai: sonai age tanoh in ampa horja na i atasni mosog ma. 11Ai pe, anggo na sihol maseda do hape haganupan in, ai lang patut ma goluh nasiam lambin pansing anjaha daulat, 12bani na paima-imahon anjaha na siholan nasiam bani parroh ni ari ni Naibata, bani na masarsar ai langit ibahen apuy, anjaha na malala ai unsur-unsur ai ibagas hamilason ai? 13Tapi na paima-imahon do hita bani langit na baru pakon tanoh na baru, ianan ni hapintoran in, domu hubani bagah-bagahNi. 14Ai pe, nasiam na hinaholongan, halani ai do na pinaima-ima nasiam, porluhon nasiam ma, ase jumpahSi nasiam seng martikas, lang dong sihataon, ibagas damei. 15Hira nasiam ma lumbang ni uhur ni Tuhanta in haluahon bani nasiam, songon na dob sinurathon ni si Paulus, hasoman haholonganta ai bani nasiam, domu hubani hapentaran na dob binere bani. 16Isahapkon do pasal on, ibagas haganup suratni. Adong do tongon deba ibagas ai na payah arusan; ai ma na pinalepak ni deba na so maruhur anjaha na so toguh, sonai age bani surat na legan; gabe hamagouanni sandiri do pambahenanni ai. 17Ai pe, nasiam na hinaholongan, halani domma ibotoh nasiam hinan in, jaga ma nasiam, ase ulang taruyun nasiam halani hakahouon ni halak na so martitah in, anjaha madabuh humbani hajongjongan nasiam na toguh hinan. 18Tapi lambin marbanggal ma nasiam ibagas idop ni uhur ampa panandaion bani Tuhanta Jesus Kristus, Sipaluah in. Bani ma hasangapon, sonari age ronsi sadokah ni dokahni!

will be added

X\