2 JOHANNES 1

1Humbakku, sintua in, hubani inang na tarpilih in, ampa dakdanakni, na huhaholongi ibagas hasintongan, seng ahu tumang tene, tapi dihut do haganup na dob mananda hasintongan in, 2Halani hasintongan, na marianan ibagas hita, anjaha na manghasomani hita ronsi sadokah ni dokahni. 3Ihasomani idop ni uhur, parontou ni uhur ampa damei ma hita, humbani Naibata Bapa ampa humbani Jesus Kristus, anak ni Bapa in, marhitei hasintongan ampa haholongon. 4Malas tumang do uhurhu, halani jumpah ahu i tongah-tongah ni anakmu na marparlahou ibagas hasintongan domu hubani titah, na dob ijalo hita humbani Bapa in. 5Anjaha sonari, mangindo ma ahu bamu inang na pinarsangapan, sedo songon titah na baru husurathon bamu, tapi na dob dong banta humbani mulani do: Marsihaholongan ma hita samah hita. 6Anjaha on do holong ni uhur in, ase marparlahou hita domu hubani titahNi in. On ma titah in, songon na dob ibogei nasiam humbani mungkahni, ase ibagas ai nasiam marparlahou. 7Ai domma bingkat buei parpodah na kahou roh hu dunia on, na so mangakui Jesus Kristus roh ibagas daging. In ma parpodah na kahou anjaha Anti Kristus in. 8Jaga nasiam ma diri nasiam, ase ulang magou humbani nasiam na dob hinorjahon nasiam, tapi jumpahan upah na gok ma nasiam. 9Ganup na manadingkon, na so totap ibagas pangajaran ni Kristus, seng parrupei ai bani Naibata. Na totap ibagas pangajaran in, in do parrupei bani Bapa in ampa Anak in. 10Anggo adong na roh bani nasiam, na so mamboan pangajaran on, ulang ma jalo nasiam ia hu rumah, anjaha ulang ma tabi nasiam ia. 11Ai barang ise na manabisi, na dihut ma ai bani horja hajahatonni ai. 12Buei do namin na sihol surathononku bani nasiam, tapi seng marosuh uhurhu marhitei kortas ampa tinta tumang, huarap do boi ahu roh manjumpahkon nasiam, ase boi dumpar bohi bei marsahap, ase gok malas ni uhurta. 13Manongos tabi do bamu anak ni saninamu, na tarpilih in.

will be added

X\