1 Ai pe, halani na dob ijalo hanami jabatan on humbani idop ni uhur, seng marnaloja hanami. 2 Iambukkon hanami do na ponop-ponop, sihailahononkon; seng marakal-akal hanami, anjaha seng i palsuhon hanami hata ni Naibata, tapi marhitei na mambaritahon hasintongan in talar-talar, gabe ipataridahkon hanami do dirinami bani haganup uhur panimbangion ni jolma i lobei ni Naibata. 3 Anjaha anggo tartutup Ambilan Namadear, na niambilankonnami, bani na laho magou do in tartutup. 4 Ai ipapitung naibata ni dunia on do pingkiran ni na so porsaya, ase ulang iidah sidea sondang ni Ambilan Namadear pasal hasangapon ni Kristus, ai ma usihan ni Naibata. 5 Ai sedo dirinami iambilankon hanami, tapi Kristus Jesus, Tuhan in do; ia hanami juak-juak nasiam do halani Jesus. 6 Halani Naibata, na dob mangkatahon; "Marsinalsal ma na lihar humbani na golap," Ia do paliharhon uhurnami, papoltak habotohon pasal sangap ni Naibata, na ibagas bohi ni Kristus. 7 Tapi ibagas ianan na urah mabolah do iboan hanami arta on, ase Naibata simada hagogohon na sumurung in, ulang hanami. 8 Ibagas haganup do hanami hona odoh-odoh, tapi lang tarpisat; marhabiaran, tapi lang putus pangarapan. 9 Hona ayak-ayak, tapi lang itadingkon; ipatompaskon, tapi lang maropuk. 10 Tongtong do iboan-boan hanami parmatei ni Jesus bani angkulanami, ase talar homa goluh ni Jesus ibagas angkulanami. 11 Ai tongtong do hanami, na manggoluh ope, iondoskon hu hamateian halani Jesus, ase talar homa goluh ni Jesus bani dagingnami na ra matei on. 12 Ase hamateian do marhorja ibagas hanami, tapi hagoluhan do ibagas nasiam. 13 Tapi halani adong do bannami Tonduy haporsayaon in, songon na tarsurat in: "Na porsaya do ahu, halani ai do ase husahaphon," hanami pe porsaya do, ai do ase marsahap age hanami, 14 halani ibotoh hanami, paboa Sipuhoi Jesus in, papuhoonni do age hanami rap pakon Jesus in, anjaha pajongjongonni rap pakon nasiam hulobeiNi. 15 Tapi haganupan in halani nasiam do, ase lambin gandani idop ni uhur in, gabe marhitei buei jolma lambin surungni homa hatarimakasihon bahen hasangapon ni Naibata. 16 Halani ai seng marnaloja hanami, ai lambin roh burukni pe hajolmaonnami pardarat on, tapi parbagas ai, ari-ari do ipabayu. 17 Ai sitaronnami sisonari anjaha na hampung porsanon, in do manjadihon bannami hasangapon na tarsulur, na tarlobih hamuliaonNi sadokah ni dokahni, 18 halani ikawahkon hanami na so taridah in, sedo na taridah in; ai tongkin do na taridah in, tapi totap do ronsi sadokah ni dokahni na so taridah in.
