2 KORINT 2

1Domma hupaputus ibagas uhurhu, na so ulakanku be roh bani nasiam ibagas pusok ni uhur. 2Ai anggo hupusoki uhur nasiam, ise ma na boi pamalas uhurhu, ai lang na hupusoki in do? 3Anjaha husurat pe on, ase ulang, anggo roh ahu, marpusok ni uhur ahu humbani na patut pamalas uhurhu; ai tenger do uhurhu bani nasiam haganup, paboa malas ni uhurhu, malas ni uhur nasiam do homa ai. 4Ai ibagas buei sitaronon ampa pusok ni uhur do hubahen surat on bani nasiam, marhasoman buei iluh-iluh, sedo ase pusok uhur nasiam, tapi ase ibotoh nasiam do holong ni uhurhu na tarlobih in bani nasiam. 5Tapi na mambahen pusok ni uhur ai, sedo ahu tumang pinusokanni, tapi hinaotikni, ase ulang salputu parsahaphu, nasiam haganup do tene. 6Sungkup ma bani halak sisonai ai pinsang-pinsang humbani halak simbuei. 7Tapi suharni ai, dearan ma sasap nasiam salahni, anjaha apoh nasiam ma ia, ase ulang ibondut pusok ni uhur na tarlobih in ia. 8Halani ai huojur ma nasiam, manotapkon holong ni uhur bani. 9Lanjar in do tujuan ni surathu bani nasiam, laho manguji nasiam, ase hubotoh atap pambalosi do nasiam bani haganup. 10Barang ise na dob isasap nasiam salahni, ahu pe husasap do. Anjaha ahu pe, barang aha na husasap, halani nasiam do husasap ai, i lobei ni Kristus, 11ase ulang iakali sibolis in hita, ai sedo na so ibotoh hita uhurni ai. 12Tapi dob das ahu i Troas, laho mangambilankon Ambilan Namadear ni Kristus, mungkab do labah bakku ibagas Tuhan in, 13tapi seng sonang uhurhu, halani seng jumpah ahu si Titus, sanina in ijai. Jadi mamuhun ma ahu hubani sidea, anjaha laho ma ahu hu Makedonia. 14Tapi tarima kasih ma bani Naibata, na tongtong manogu-nogu hanami ibagas hamonanganNi marhitei Kristus, anjaha ipatalar do misbou ni habotohon pasalSi marhitei hanami bani haganup ianan. 15Ai uap na misbou ni Kristus do hanami i lobei ni Naibata bani halak na maluah, age bani halak na laho magou, 16bani na deba ai uap hamateian hu hamateian, bani na deba nari uap hagoluhan hu hagoluhon. Anjaha ise do na talup hujai? 17Ai seng usih hanami songon na mabuei in, na mambuat untung bani diri sandiri marhitei hata ni Naibata, tapi humbani pitah ni uhur do, sinuruh ni Naibata, ihatahon hanami in i lobei ni Naibata, ibagas Kristus.

will be added

X\