2 KORINT 12

1Maningon mamuji diri, age seng marguna namin; ase patugahonku ma panonggoran ampa pangungkabon na humbani Tuhan in. 2Hutanda sada jolma ibagas Kristus; sapuluh ompat tahun ma dob salpu ai (atap na ibagas angkula ia seng hubotoh, atap na idarat ni angkula ia seng hubotoh, Naibata do mambotohsi), na tarangkat do halak ai ronsi lapis patoluhon ni nagori atas. 3Anjaha hutanda do jolma ai (tapi atap na ibagas angkula ia ijia, atap sirang humbani angkula, seng hubotoh, Naibata do mambotohsi), 4na tarangkat do ia ronsi Paradeiso, anjaha ibogei do hata, na so tarhatahon, na so boi tarsahaphon jolma. 5Pasal halak ai mamuji-muji ma ahu, tapi pasal diringku seng mamuji-muji ahu sobali halani hagalekonkin. 6Ai anggo hupapuji-puji pe diringku, seng na so maruhur ahu ijai, ai na sintong do hatangku. Tapi huhorom mando ai, ase ulang lobih ahu ihira halak humbani na niidahni bakku ampa na binogeini humbakku. 7Anjaha, ase ulang huhagijangkon pangungkabon na tarsulur na hubakku ai, ibere do bakku sada duri ibagas dagingku, ai ma suruhan ni sibolis, na manghantam ahu, ase ulang hupagijang diringku. 8Tolu hali ma hupangindo humbani Tuhan in, ase tanggal in humbakku. 9Jadi nini ma hubakku: Sungkup do idop ni uhurHu bam, ai ibagas hagalekon do gabe gok hagogohon. Ase dearan ma hupuji diringku halani hagalekon, ase sogop bakku hagogohon ni Kristus. 10Halani ai sonang do uhurhu ibagas hagalekon, hahirion, hasunsahan, parburuon ampa hasosakan halani Kristus, ai sanggah galek ahu, iuji do ahu margogoh. 11Na dob gabe maoto ahu hape! Nasiam do na mamaksa ahu sonai. Patut do namin palobeion nasiam ahu. Ai seng adong tadingku humbani apostel na banggal in, age pe na lang ahu. 12Napamasa do namin tanda ni apostel i tongah-tongah nasiam ibagas sagala hasabaron, marhitei tanda ampa halongangan pakon hagogohon. 13Ai aha ma adong hatadingan nasiam marimbang kuria na legan in, sobali ni na so husunsahi in nasiam? Sasap nasiam ma hasalahankin! 14Tonggor nasiam ma, domma pala patoluhalihon sirsir ahu marayak nasiam, anjaha sedo na laho manunsahi ahu. Ai sedo na adong bani nasiam sihol pindahanku, tapi nasiam sandiri do. Ai seng patut anak patumpu-tumpu arta bani namatorasni, tapi namatorasni do bani anakni. 15Tapi malas do uhurhu mambere, lanjar mamberehon diringku manghophop tonduy nasiam. Anggo lobih panghaholongingku bani nasiam, mase ma hurang ahu ihaholongi? 16Sonai pe ai, seng husunsahi nasiam, tapi halani parakal ahu, gabe hubuat do uhur nasiam ibagas akal. 17Ai adong mambuat untung ahu humbani nasiam, marhitei halak na husuruh bani nasiam? 18Huojur do tongon si Titus, anjaha husuruh sanina in manghasomanisi. Ai adong do mambuat untung si Titus humbani nasiam? Ai lang ibagas sada Tonduy do hanami marparlahou? Ai lang sada do bokas iirikkon hanami? 19Domma ipingkir uhur nasiam hinan, na mamintori diri do hanami i lobei nasiam? I lobei ni Naibata, ibagas Kristus ihatahon hanami: Haganupan ai, nasiam hinaholongan, laho pauli-ulihon nasiam do. 20Ai mabiar do ahu, atap lang dapot ahu nasiam bani parrohku, domu hubani na pinindo ni uhurhu, anjaha ahu pe seng jumpah nasiam songon na pinindo ni uhur nasiam, anjaha mabiar do ahu, atap adong do i tongah-tongah nasiam paringoran, parsimburuon, ringis, uhur haut, hata tundal, panrisaon, uhur hagijangon ampa hageoron. 21Sai ulang ma ipatoruh Naibatangku ahu i tongah-tongah nasiam bani parrohku use, gabe pala tangis ahu halani buei halak na mardousa hinan, na so manolsoli uhurni pasal habutakon, parriah-riahon ampa hasumsamon, na hinorjahon ni sidea.

will be added

X\