2 KORINT 10

1Ahu, si Paulus, hupodahi ma nasiam marhitei halamlamon ampa hasabaron ni Kristus, ahu na toruh maruhur dompak nasiam anggo dumpar bohi bei, tapi na barani anggo padaoh-daoh, 2ahu mangindohon, ase anggo padumpar bohi holi, ulang pala tarpaksa ahu patuduhkon habaranionku, songon na dob husurahon martindak koras dompak deba halak, na manghira hanami manggoluh mangihutkon pardagingon. 3Tongon ibagas daging ope hanami, tapi seng mangihutkon pardagingon hanami marporang. 4Ia sinjatanami marporang sedo sinjata pardagingon, tapi gok hagogohon do humbani Naibata, laho manrumbakkon benteng-benteng. 5Irumbakkon hanami do sura-sura ampa uhur hagijangon na manlawan habotohon na humbani Naibata, anjaha itaban hanami do sagala pingkiran, ase pambalosi ai bani Kristus. 6Anjaha sirsir do hanami maminsang sagala naso mambalosi, anggo domma gok pambalosion nasiam. 7Tonggor nasiam ma na talar i lobei nasiam in! Anggo adong na mangahap, Kristus do simadasi, iuhurhon ma on homa, paboa songon Kristus simadasi, sonai do homa hanami. 8Ai anggo hutambahi pe pamujingku bani kuasa, na binere ni Tuhan in bannami, laho pauli-ulihon do, sedo laho parsedahon nasiam, seng maila ahu ibagas ai. 9Ulang ma adong na mangagan, na mambiar-biari nasiam do ahu marhitei surat in. 10Ai adong do na mangkatahon: Koras anjaha margogoh do suratni in, tapi anggo dumpar, galek do ia anjaha seng maharga hatani. 11Ipingkiri halak ai ma on, paboa sonin hadirionnami ibagas hatanami marhitei surat sanggah daoh, sonai do homa ibahen hanami sanggah dumpar. 12Seng barani hanami padoskon atap pausihkon dirinami bani halak na pajuntul-juntulhon dirini, na mangukur dirini marhitei ukuran ni sidea sandiri, na pausihkon dirini marhitei dirini sandiri homa. Seng dong pangarusion ni sidea. 13Tapi seng ra hanami mamuji-muji dirinami ibagas na so marukuran, tapi mangihutkon ukur-ukuran na dob tinontuhon ni Naibata do bannami, na das ronsi bani nasiam homa. 14Seng na manalpui hawajibannami hanami, songon na so ongga bani nasiam. Ai lang hanami do, na roh mamboan Ambilan Namadear pasal Kristus bani nasiam? 15Anjaha seng tarlanjur hanami, gabe ipuji hanami dirinami marhitei buah ni horja ni halak na legan. Tapi arap do uhurnami lambin toguhni ma haporsayaon nasiam ibagas nasiam, ase lambin bolagni ma parhorjaan, na itotapkon bannami, 16laho mangambilankon Ambilan Namadear bani nagori-nagori sidaohan ope humbani nasiam, tapi lang pala manalpui balog parhorjaan ni halak na legan, anjaha manghamegahkon buah ni horja ni sidea. 17Tapi na mamuji dirini, marhitei Tuhan in ma ia mamuji! 18Ai sedo halak na mamuji dirini, na totap botul, tapi na niuji ni Tuhan in do.

will be added

X\