1 TIMOTEUS 2

1Ai pe on do sipaingathu parlobei humbani haganup. Sihol ma dalanhononkon pangindoan, partonggoon, pangapition ampa hatarimakasihon manghophop haganup jolma, 2manghophop raja-raja ampa haganup siparkuasa, ase boi hita sonang anjaha mardamei-damei manggoluh, daulat anjaha hormat ibagas haganup. 3Dear do in, anjaha harosuh ni Sipaluah hita, ai ma Naibata, 4na mangkarosuhkon, ase haganup jolma maluah anjaha das mananda hasintongan in. 5Ai sada do Naibata, anjaha sada do siholang ni Naibata pakon jolma, ai ma jolma Kristus Jesus in, 6na mamberehon diriNi gabe tobus manghophop haganup; in ma sisaksihononkon bani panorang na dearhonsi. 7Hujin do ahu ipabangkit gabe parambilan ampa apostel, guru bani sipajuh begu-begu ibagas haporsayaon ampa hasintongan; sintong do hatangku, seng marladung ahu. 8Ai pe iparsinta uhurhu do, sihol ma martonggo sagala dalahi bani ganup ianan, manombahkon tangan na pansing, ulang ibagas ringis atap paringoran. 9Anjaha naboru-naboru pe, hormat anjaha bulus ma pamakeini, ulang ma marjambulan na marpanjagar na malobihtu, barang irungkub dirini bani omas atap mata intan atap pakeian-pakeian na maharga-maharga, 10tapi marhitei pambahenan na madear ma, songon na patut bani naboru, na mangaku, na daulat ia i lobei ni Naibata. 11Masip ma naboru ibagas na marguru, marunduk ni uhur tumang. 12Seng hulopas naboru mangajari barang manrajai dalahi, tapi sip ma ia. 13Ai parlobei do si Adam itompa, dob ai pe ase si Hawa; 14anjaha sedo si Adam hona paoto-oto; naboru ai do hona paoto-oto, gabe manlanggar. 15Tapi maluah do ia marhitei na mantubuhkon anak, anggo totap ia ibagas haporsayaon ampa holong pakon hapansingon marhasoman hahormaton.

will be added

X\