1 TESSALONIKA 4

1Ambah ni ai, nasiam sanina, ipangindo anjaha ipodahi hanami ma nasiam ibagas Tuhan Jesus; songon na dob ibogei nasiam humbennami, ai ma pasal sonaha nasiam patut manggoluh anjaha gabe harosuh bani Naibata, anjaha songon na nidalankon nasiam nuan ai, lambin martambah ma nasiam ibagas Ia. 2Ai ibotoh nasiam do aturan na binerenami bani nasiam marhitei Tuhan Jesus. 3On do harosuh ni Naibata, ase pansing ma nasiam, ase daoh ma nasiam humbani parriah-riahon, 4ase ganup ma nasiam mambotoh marbinuat ibagas hapansingon ampa hahormaton, 5ulang ma mangihuthon hisap-hisap na garang, songon sipajuh begu-begu, na so mananda Naibata, 6ase ulang adong na manlanggar, anjaha irugii saninani ibagas pahara ai (pansarian), ai parlulu do Tuhan in pasal haganupan ai, songon na dob ipatugah anjaha isaksihon hanami hinan bani nasiam. 7Ai seng hu habutakon hita idilo Naibata, tapi bani hapansingon do. 8Halani ai, barang ise na manulak ai, sedo jolma na tinulakni, tapi Naibata do, na mambere TonduyNi Napansing bani nasiam. 9Tapi pasal holong ni uhur dompak sanina, seng pala porlu be pasingaton nasiam marhitei surat, ai Naibata sandiri do mangajari nasiam marsihaholongan, 10anjaha tongon idalankon nasiam do sonai bani haganup sanina na i Makedonia. Tapi ipodahi hanami do, nasiam sanina, ase lambin sonai ibahen nasiam. 11Anjaha haporluhon nasiam ma ase parsip nasiam marsiurus urusanni bei anjaha marhorja ma tangan nasiam, songon na dob iparentahkon hanami bani nasiam. 12Ase marparlahou na patut ma nasiam idahon ni pardarat, anjaha ulang mangarap humbani halak. 13Seng marosuh hanami, nasiam sanina, seng dong pambotoh nasiam pasal halak na dob modom in, ase ulang pusok uhur nasiam songon halak na legan, na so marpangarapan. 14Ai anggo porsaya hita, na dob matei do Jesus anjaha puho, sonai ma homa marhitei Jesus, arahkonon ni Naibata do na dob modom in rap pakonSi. 15Ai hata ni Tuhan in do na ihatahon hanami bani nasiam: Hita, na manggoluh, na tading ronsi parroh ni Tuhan in, seng lobeianta sidea, na dob modom in. 16Ai Tuhan in sandiri ma tuad hun nagori atas marhasoman surak-surak, parentah pakon hata ni raja ni malekat, anjaha tarbogei ma tarompit ni Naibata. Jadi puho ma parlobei na matei ibagas Kristus. 17Dob sonai, hita na manggoluh in, na tading in ope, tarikonNi ma hita rap pakon sidea ibagas hombun, laho mangalo-alo Tuhan in hu awang-awang, jadi tongtong ma hita rap pakon Tuhan in. 18Ase marsiapohan ma nasiam marhitei hata in.

will be added

X\