1 PETRUS 5

1Ase, hupaingat ma sintua-sintua na i tongah-tongah nasiam, songon hasoman sintua anjaha saksi pasal sitoronon ni Kristus, homa siparrupei bani hasangapon na sihol sipatalaron ope: 2Parmahani nasiam ma hulanan ni Naibata na bani nasiam, ulang songon paksaan, tapi humbani malas ni uhur ma, domu hubani rosuh ni Naibata; ulang ma halani uhur haut, tapi humbani porlu ni uhur ma. 3Ulang ma songon na mamaksa dompak hasoman, na niondoskon bani nasiam, tapi gabe siusihan ma bani na pinarmahan in. 4Jadi, jaloon nasiam ma sortali hasangapon na so ra melus ai, talarhonsi Parmahan Bolon in. 5Lanjar sonai ma homa nasiam na maposo, unduk ma nasiam bani partua-partua. Haganup ma nasiam margondithon toruh ni uhur samah nasiam, ai iimbang Naibata do sigijang uhur, tapi ibere do idop ni uhur bani na toruh maruhur. 6Halani ai patoruh nasiam ma diri nasiam hu toruh ni tangan ni Naibata na gogoh in, ase ipagijang nasiam bani panorangni. 7Ompashon nasiam ma haganup na hinolsohkon nasiam hu Bani, ai isarihon do nasiam. 8Torang ma uhur nasiam anjaha puho ma nasiam, ai mawat-awat do imbang nasiam, sibolis in, songon singa na maraum, mangindahi sibondutonni. 9Imbang nasiam ma ia marhitei haporsayaon na toguh, ai ibotoh nasiam do, age haganup sanina nasiam na i sab dunia on ihonai sitaronon na sonai do. 10Tapi Naibata, paridop ni uhur in, na mandilo nasiam ibagas Kristus Jesus hu hasangaponNi na manongtong in, pauli-ulionNi, patotaponNi, pargogohanNi anjaha pajonamonNi do nasiam, dob manaron nasiam tongkin. 11Bani ma hagogohon ronsi sadokah ni dokahni. Amen. 12Marhitei humbani si Siluannus, na huhira hasoman hatengeran ni uhur, hubahen do surat na pondok on bani nasiam, laho pagolpahon anjaha manaksihon, in do tongon idop ni uhur ni Naibata na sintong in, hajongjongan nasiam in. 13Manongos tabi do bani nasiam kuria na i Babel, na tarpilih songon nasiam; sonai homa anakku si Markus. 14Marsitabian ma nasiam marhitei summah holong ni uhur. Damei ma bani nasiam haganup na ibagas Kristus.

will be added

X\