1 PETRUS 1

1Humbani si Petrus, apostel ni Jesus Kristus, hubani sagala panginsolat, na merap i Pontius, Galatia, Kappadosia, Asia ampa Bitinia, na dob tarpilih in, 2domu hubani panandaion ni Naibata Bapa hinan, marhitei na pinapansing ibagas Tonduy Napansing, ase pambalosi bani Jesus Kristus, anjaha iuras marhitei pamispison bani darohNi in. Sai martambah-tambah ma idop ni uhur ampa damei bani nasiam. 3Pinuji ma Naibata, Bapa ni Tuhanta Jesus Kristus, na dob manubuhkon hita paduahalihon, domu hubani banggal ni idop ni uhurni, marhitei parpuhoon ni Jesus Kristus humbani na matei, ase marpangarapan na manggoluh hita, 4ase banta siteanon na so ra seda, na so martikas, na so ra melus, na sinimpan banta i nagori atas. 5Iramotkon do hita hinorhon ni gogoh ni Naibata, marhitei haporsayaon, ase das hita hu haluahon, na dob sirsir sipatalaron bani panorang parpudi. 6In do ihamalashon nasiam, age pe marhoru nasiam tongkin sonari, anggo porlu ibagas bagei ni parlajouan, 7ase taridah ma pitah ni haporsayaon nasiam, na harganan marimbang omas na ra seda, age pe domma iuji ibagas apuy, bahen puji-pujian, hasangapon ampa hamuliaon bani partalar ni Jesus Kristus. 8Ihaholongi nasiam do Ia, age pe seng iidah nasiam Ia; ihaporsayai nasiam do Ia, age pe seng iidah nasiam Ia sonari, gabe marolob-olob do nasiam ibagas malas ni uhur na marhasangapon, na so tarpajojor pamangan, 9halani dapot nasiam tujuan ni haporsayaon nasiam, ai ma haluahon ni tonduy nasiam. 10In ma haluahon, na pinindahan anjaha na pinapangkei-pangkei ni nabi-nabi, na dob manjahai pasal idop ni uhur, na bani nasiam in. 11Ipapangkei-pangkei sidea do barang sadihari panorangni ai, anjaha sonaha do ai, domu hubani na pinatalar ni Tonduy ni Kristus, na ibagas sidea, na manaksihon hinan pasal sitaronon, na sihol sogop bani Kristus, ampa hamuliaon na i pudi ni ai. 12Ipatalar pe ai bani sidea, sedo bani sidea sandiri, nasiam do na sinarihon ni sidea ijai. Lanjar in do na pinatugah ni par Ambilan Namadear nuan bani nasiam marhitei Tonduy Napansing, na sinuruh hun nagori atas. Masihol do malekat-malekat mangkawah hu bagas ai. 13Halani ai, gonditi nasiam ma uhur nasiam; torang ma uhur nasiam, anjaha sabonar mangarap ma nasiam bani idop ni uhur, na sihol bereon bani nasiam bani partalar ni Jesus Kristus. 14Songon dakdanak sipambalosi, ulang be paihut-ihut nasiam hisap-hisap, na binalosan nasiam hinan sanggah haotoon nasiam, 15tapi songon Sipandilo nasiam pansing, sonai ma homa nasiam pansing ibagas haganup parlahou nasiam. 16Ai tarsurat do: Pansing ma nasiam, ai na pansing do Ahu! 17Anggo Bapa igoran nasiam Ia, na so siidah-idah bohi manguhumi ganup jolma pasal pambahenanni bei, marhasoman biar ma nasiam marparlahou sanggah panginsolatan nasiam on. 18Ai ibotoh nasiam do: Sedo marhitei arta na ra maseda, omas barang pirak, ase maluah nasiam humbani pargoluhon nasiam na so margagan in, na tinean nasiam humbani bapa nasiam, 19tapi marhitei daroh ni Kristus na maharga in do, na songon daroh ni biri-biri na so martikas, na so marsining. 20Na dob ipilih do Ia, sanggah lape jonam dunia on, anjaha ipatalar bani ujung ni panorang halani nasiam. 21MarhiteihonSi do nasiam porsaya bani Naibata, na papuhohonSi humbani na matei, anjaha na mamberehon hasangapon Bani, ase bani Naibata nasiam porsaya anjaha marpangarapan. 22Halani domma ipapansing nasiam diri nasiam marhitei na mambalosi hasintongan in, laho mandalankon holong na so sipakulah-kulah bani hasoman, sai marsihaholongan ma nasiam humbani gok ni uhur. 23Ai domma mangulaki tubuh nasiam, sedo humbani bonih na ra maseda, tapi humbani na so ra maseda do, ai ma marhitei hata na manggoluh anjaha na totap in, na humbani Naibata. 24Ai sagala daging songon poyon-poyon do, anjaha sagala hasangaponni ai songon bunga ni poyon-poyon ai. Melushonsi poyon-poyon ai, bungani pe marurus ma. 25Tapi anggo hata ni Tuhan in, totap do ronsi sadokah ni dokahni. In ma hata, na niambilankon bani nasiam.

will be added

X\