Naokɛa 36

1Galada buiↄ uabeleↄ mↄ̀ Mↄizi kĩ́i. Galadapiá Makii nɛ́ɛ, Manase tↄũnaɛ, Yosɛfu buiɛ. Ɔ̃ aa ò Mↄiziɛ ń Isaili bui dↄaanaↄ 2aa mɛ̀: Baa, kɛ́ Dii ònɛ ǹ bùsu kpaalɛ Isailiↄnɛ ń gbɛlaao, a ònɛ ǹ wá gbɛ̃do Zelofada tↄↄlɛ kpá aà nɛnↄɛↄwa. 3Tó nɛnↄɛpiↄ zãkɛ̀ ń Isaili buipãleↄ, wa ń tↄↄlɛ sí wá buiↄwa wà kã́fĩ bui pↄ́ aa zãkɛ̀ńnↄↄnɛ, tↄↄlɛ pↄ́ wa kpàwá ń gbɛlaao i lao. 4Tó Kuu'ↄwɛ̃ kà sↄ̃, wa ń tↄↄlɛ sí kpaalɛ pↄ́ wá deziↄ sɛ̀ guuɛ, wi kã́fĩ bui pↄ́ aa zãkɛ̀ńnↄↄnɛ. 5Ɔ̃ Mↄizi yã́ pↄ́ Dii òɛ dìlɛ Isailiↄnɛ à mɛ̀: Yosɛfu buipiↄ yã́ naɛ. 6Yã́ pↄ́ Dii dìlɛ Zelofada nɛnↄɛↄ yã́ musun kɛ: À mɛ̀ nɛnↄɛpiↄ zãkɛ ń gↄ̃ pↄ́ kɛ̀nɛ́ maaↄ, ãma gↄ̃ pↄ́ aa zãkɛòↄ, sema aaↄ dɛ ń dezi káau Manase buiↄ ũ. 7Tↄↄlɛ pↄ́ Isailiↄ vĩ ń buiwaↄ su gɛ̃ kↄ̃ pↄ́uo. Isaili píi zɛ ń a dezi káau tↄↄlɛ pↄ́ á è túbi ũo. 8Isaili buiↄ guu, sema nↄɛ pↄ́ tↄↄlɛ vĩ túbi ũ zãkɛ ń gↄ̃ pↄ́ dɛ a dezi káau bui ũo. Beewa Isaili píi a gↄ̃ tↄↄlɛ pↄ́ wà kpaalɛ̀ a deziↄnɛ vĩ. 9Isaili buiↄ tↄↄlɛ su gɛ̃kↄ̃uo. Isaili bui píi zɛ ń tↄↄlɛ pↄ́ á è kpaalɛ guuo. 10Ɔ̃ Zelofada nɛnↄɛↄ kɛ̀ lá Dii ò Mↄiziɛwa. 11Mala ń Tiizao ń Ɔgɛlao ń Milikao ń Nↄao zãkɛ̀ ń ń desɛ̃ nɛ́ↄ. 12Aa zãkɛ̀ ń Yosɛfu nɛ́ Manase buiↄ, ↄ̃ tↄↄlɛ pↄ́ wà kpaalɛ̀nɛ́ↄ gi dɛ ń dezi káau buiↄ pↄ́ ũ. 13Ikoyãↄ ń yãdilɛa pↄ́ Dii dà Mↄiziɛ a dìlɛ Isailiↄnɛↄn we gↄↄ pↄ́ aa ku Mↄabu bùsu sɛ̃u Yuudɛ̃ baale bↄaa ń Yelikoo.

will be added

X\