Nɛɛmii 11

1Isaili dↄaanaↄ zↄ̃̀lɛ Yelusalɛũ, ↄ̃ gbɛ̃́ kĩniↄ gbɛlà an gbɛ̃́ↄ kwide mↄ zↄ̃lɛa Lua wɛ̃́lɛpi guu yã́ musu, an gbɛ̃́ kĩniↄ i gↄ̃ zↄ̃ɛwiaↄ guu. 2Wà uabele pↄ́ dↄ̀aa zɛ̀ ń kua Yelusalɛũoↄ sáaukpà. 3Yuda bùsu dↄaana pↄ́ zↄ̃̀lɛ Yelusalɛũↄ tↄ́ↄn kɛ: Isaili kĩniↄ, sa'onaↄ ń Levii buiↄ ń Lua ua zĩkɛnaↄ ń Salomↄↄ zↄ̀blen buiↄ zↄ̃̀lɛ Yuda bùsu wɛ̃́lɛↄ guu, baade ń a tↄↄlɛo, 4ↄ̃ Yudaeↄ ń Bɛ̃yãmɛɛ buieↄ zↄ̃̀lɛ Yelusalɛũ. Yudaↄ dↄaanaↄ tↄ́n Ataia ń Maaseao. Pɛlɛzi Maalalee ì, Maalalee Sefatia ì, Sefatia Amalia ì, Amalia Zakali ì, Zakali Uzia ì, ↄ̃ Uzia Ataiapi ì. 5Sela Zakali ì, Zakali Yoialibu ì, Yoialibu Adaia ì, Adaia Azaia ì, Azaia Kↄloze ì, Kↄloze Baluku ì, ↄ̃ Baluku Maaseapi ì. 6Pɛlɛzi bui gↄ̃gbãa pↄ́ kú Yelusalɛũↄ gbɛ̃ↄn ↄ̀aa pla ń bàaↄ̃kwi plasaioɛ (468). 7Bɛ̃yãmɛɛ buiↄ dↄaana Salu. Yesaia Itiɛli ì, Itiɛli Maasea ì, Maasea Kolaia ì, Kolaia Pedaia ì, Pedaia Yoedi ì, Yoedi Mɛsulaũ ì, ↄ̃ Mɛsulaũ Salupi ì. 8Aàpi gbɛa Gabai ń Salaio. Ampii gbɛ̃ↄn ↄ̀aa síiↄ̃ ń basoolokwi plasaioɛ (928). 9Zikeli nɛ́ Yoɛli mɛ́ ń gbɛ̃zↄ̃ↄ ũ, mɛ́ Asenua nɛ́ Yuda mɛ́ wɛ̃́lɛ gbɛ̃zↄ̃ↄ plaade ũ. 10Sa'on dↄaanaↄ Yoialibu nɛ́ Yedaia ń Yakɛ̃o 11ń Selaiao. Lua ua dↄaana Aitubu Mɛlaio ì, Mɛlaio Zadoki ì, Zadoki Mɛsulaũ ì, Mɛsulaũ Ilikia ì, ↄ̃ Ilikia Selaiapi ì. 12An gbɛ̃́ pↄ́ aalɛ Lua kpɛ́ zĩ kɛↄ gbɛ̃ↄn ↄ̀aa síiↄ̃ ń bao ń plaoɛ (822). Sa'on dↄaana Adaia. Malakia Pasuu ì, Pasuu Zakali ì, Zakali Amɛzi ì, Amɛzi Pelalia ì, Pelalia Yolaũ ì, ↄ̃ Yolaũ Adaiapi ì. 13Aà gbɛ̃́ pↄ́ aa dɛ uabeleↄ ũↄ gbɛ̃ↄn ↄ̀aa do ń bla ń plaoɛ (242). Sa'on dↄaana Amasai. Imɛɛ Mɛsilemↄ ì, Mɛsilemↄ Azai ì, Azai Azalɛli ì, ↄ̃ Azalɛli Amasaipi ì. 14Aà gbɛ̃́ↄá gↄ̃sa gbãaↄnɛ, aa gbɛ̃ↄn basoolokwi plasaiɛ (128). Agedoliũ nɛ́ Zadiɛli mɛ́ ń gbɛ̃zↄ̃ↄ ũ. 15Levii buiↄ dↄaana Semaia. Buni Asabia ì, Asabia Azikaũ ì, Azikaũ Asubu ì, ↄ̃ Asubu Semaiapi ì. 16Levii buiↄ dↄaanaↄ Sabetai ń Yozabao mɛ́ Lua ua gbɛ̃zↄ̃ↄↄ ũ. 17Lɛ̀sin dↄaana Matania pↄ́ dɛ lousisin dↄaana ũ. Asafa Zabedi ì, Zabedi Mise ì, ↄ̃ Mise Mataniapi ì. Babukia mɛ́ aà plaade ũ. Bee gbɛa Samua nɛ́ Abeda, Galali tↄũna, Yedutu bui. 18Levii bui pↄ́ kú Lua wɛ̃́lɛuↄ gbɛ̃ↄn ↄ̀aa do ń basiiↄ̃sↄo mɛ̀ndosaioɛ (284). 19Bĩ́ibↄlɛdↄ̃anaↄ Akubu ń Talemↄo ń ń gbɛ̃́ↄ gbɛ̃ↄn baswaaↄ̃kwi ń plaoɛ. 20Isaili kĩniↄ ń sa'onaↄ ń Levii buiↄ ku Yuda bùsu wɛ̃́lɛↄ guu, baade ń a tↄↄlɛo. 21Lua ua zĩkɛnaↄ ku Ofɛli sĩ̀sĩ musu. Ziha ń Gisepao mɛ́ ń gbɛ̃zↄ̃ↄↄ ũ. 22Levii bui pↄ́ kú Yelusalɛũↄ dↄaanan Uzi ũ. Mise Matania ì, Matania Asabia ì, Asabia Bani ì, ↄ̃ Bani Uzipi ì. Aàpi mɛ́ Asafa bui pↄ́ aaì dↄaa ń lɛsiyão Lua uaↄ gbɛ̃do ũ. 23Pɛɛsiↄ kía mɛ́ yãdìlɛ lɛ̀sinaↄnɛ, à yã́ pↄ́ aa kɛ lá gu lɛ́ dↄ dànɛ́. 24Mɛsezabɛli nɛ́ Petaia pↄ́ dɛ Yuda nɛ́ Zela bui ũ ku kíapi kĩ́i Isailiↄ yã́gↄ̃gↄ̃a yã́i. 25Yudaeↄ zↄ̃̀lɛ zↄ̃ɛwiaɛ beeↄ guu ń ń fã́anio: Kiliataaba ń a bualoũↄ, Dibↄ̃ ń a bualoũↄ, Kabazee ń a bualoũↄ, 26Yesua, Mↄlada, Bɛpele, 27Azaasuali, Bɛɛsɛba ń a bualoũↄ, 28Zikilaga, Mɛkona ń a bualoũↄ, 29Ɛnilimↄ, Zↄla, Yaamu, 30Zanↄa, Adulaũ ń a zↄ̃ɛwiaↄ, Lakisi ń a fã́anio ń Azekao ń a bualoũↄ. Aa bɛkpà za Bɛɛsɛba e Bɛninↄũ guzulɛu. 31Bɛ̃yãmɛɛ buiↄ bɛkpà wɛ̃́lɛɛ beeↄ guu: Gɛba, Mimasa, Ai, Bɛtɛli ń a bualoũↄ, 32Anato, Nↄbu, Anania, 33Azoo, Lama, Gitaiũ, 34Adida, Zeboiũ, Nɛbala, 35Lodi, Onↄ ń Siaↄ guzulɛo. 36Levii bui gãli pↄ́ kú Yuda bùsuu yãaeↄ bɛkpà Bɛ̃yãmɛɛ buiↄ bùsuu.

will be added

X\