1 Kɛ́ Davidi zikũ̀ táotao, ↄ̃ à Salomↄↄ kpà Isailiↄ kía ũ. 2 Davidi Isaili kíaↄ kã̀aa ń sa'onaↄ ń Levii buiↄ píi. 3 Wà Levii bui gↄ̃ɛ pↄ́ kà wɛ̃̀ baakwi ge aa dɛaↄ nào, aa gbɛ̃ↄn ↄ̀aasↄsↄo lɛɛ bla plasaiɛ (38.000). 4 Ɔ̃ Davidi gbɛ̃ↄn ↄ̀aasↄsↄo lɛɛ baasↄo mɛ̀ndosaiↄ (24.000) dìlɛ aaↄ wɛ́tɛ Dii ua yã́ↄi, à gbɛ̃ↄn ↄ̀aasↄsↄo lɛɛ sooloↄ (6.000) dìlɛ lakɛ̃naↄ ń yãgↄ̃gↄ̃naↄ ũ. 5 Ɔ̃ à gbɛ̃ↄn ↄ̀aasↄsↄo lɛɛ síiↄ̃ↄ (4.000) dìlɛ bĩ́ibↄlɛdↄ̃anaↄ ũ, mɛ́ à gbɛ̃ↄn ↄ̀aasↄsↄo lɛɛ síiↄ̃ↄ (4.000) dìlɛ Dii táasilɛnaↄ ũ, aaliↄ aà táasilɛ ń pↄ́'ↄbↄna pↄ́ Davidi kpàↄ. 6 Davidi ń kpaalɛ̀ ń buiↄwa gã ń gão, Geesↄ̃ buiↄ, Kɛata buiↄ ń Mɛlali buiↄ. 7 Geesↄ̃ nɛgↄ̃ɛↄn Ladã ń Simɛio ũ. 8 Ladã nɛgↄ̃ɛↄ àaↄ̃ɛ: A sɛ̃́ia Yeiɛli, a gbɛa Zetaũ ń Yoɛlio. 9 Simɛi nɛgↄ̃ɛↄ àaↄ̃ɛ: Selomↄ, Haziɛli ń Halanao. Ladã bui uabele káauↄn we. 10 Simɛi nɛgↄ̃ɛↄ síiↄ̃ɛ: Yaata, Ziza, Yeusi ń Bɛliao. 11 A sɛ̃́ia Yaata, a plaade Ziza. Yeusi ń Bɛliao buiↄ dasio, ↄ̃ wà ń dílɛ bui doũ zĩ doũ guu. 12 Kɛata nɛgↄ̃ɛↄ síiↄ̃ɛ: Amlaũ, Isaa, Hɛblↄ̃ ń Uziɛlio. 13 Amlaũ nɛgↄ̃ɛↄn Aalona ń Mↄizio ũ. Wà Aalona ń a buiↄ dìlɛ ń zɛ́i, aaↄ laaidↄ Lua pↄ́ↄwa, aaↄ Luapi gbagba, aaↄ tulaletikatɛaɛ̀, aaↄ zĩkɛ aà kúkĩi, aaↄ samaa'o gbɛ̃́ↄnɛ ń aà tↄ́o gↄↄpii. 14 Wà Lua gbɛ̃́ Mↄizi buiↄ dìlɛ lán Levii bui kĩniↄwa. 15 Mↄizi nɛgↄ̃ɛↄn Geesoũ ń Ɛliɛzɛɛo ũ. 16 Geesoũ nɛgↄ̃ɛ sɛ̃́ian Sebuɛli ũ. 17 Ɛliɛzɛɛ nɛgↄ̃ɛ sɛ̃́ian Lɛabia ũ. I nɛgↄ̃ɛe i lↄo, ãma Lɛabiapi nɛgↄ̃ɛↄ ì dasi maamaaɛ. 18 Isaa nɛgↄ̃ɛ sɛ̃́ian Selomi ũ. 19 Hɛblↄ̃ nɛgↄ̃ɛↄ tↄ́n kɛ: A sɛ̃́ia Yelia, a plaade Amalia, a àaↄ̃de Yaaziɛ, a síiↄ̃de Yekamaũ. 20 Uziɛli nɛgↄ̃ɛↄ tↄ́n kɛ: A sɛ̃́ia Mika, a plaade Isia. 21 Mɛlali nɛgↄ̃ɛↄn Mali ń Musio ũ. Mali nɛgↄ̃ɛↄn Ɛleazaa ń Kisio ũ. 22 Ɛleazaa gà nɛgↄ̃ɛsaiɛ, nɛnↄɛↄ a ì tɛ̃ɛtɛ̃ɛ. An desɛ̃ Kisi nɛgↄ̃ɛↄ mɛ́ ń sɛsɛ. 23 Musi nɛgↄ̃ɛↄ àaↄ̃ɛ: Mali ń Edɛɛo ń Yelemↄo. 24 Levii buiↄn we sɛa an dezi pↄ́ dɛ uabele káau ũↄwa. Lua ua zĩkɛna pↄ́ kà wɛ̃̀ bao ge aa dɛaↄ, wà ń baade tↄ́ dàlau an buipiↄwaɛ. 25 Davidi mɛ̀: Lá Dii Isailiↄ Lua a gbɛ̃́ↄ gbà ĩ́ampakĩi mɛ́ à sù Yelusalɛũ àↄ ku we gↄↄpiiɛ, 26 Levii buiↄ zwã̀akpɛ ń a zĩkɛbↄↄ sɛ táa'oò lↄo. 27 Yã́ pↄ́ Davidi ò gbɛzã yã́i ↄ̃ wì Levii bui pↄ́ kà wɛ̃̀ bao ge aa dɛaↄ naoi. 28 Levii buipiↄ líↄ dↄ Aalona buiↄlɛ ń Dii ua zĩo. Aaliↄ wɛ́tɛ Lua uai ń a kpɛ́ↄ ń gbãbↄa Lua pↄ́ↄnɛↄ ń zĩ pↄ́ wì kɛ weo 29 ń pɛ̃ɛ pↄ́ wì kpa Luawao ń pↄ́wɛnti gbao ń kàawanao ń a totoao ń a zaao ń a zↄ̃ↄ lɛ́o. 30 Aaliↄ Dii sáaukpa ń aà táasilɛao kↄↄ ń oosio 31 ń gↄↄ pↄ́ wàlɛ sa pↄ́ wì a pↄ́ kátɛu à tɛ́kũ o Diiwa kã́mabogↄↄzĩↄ ń mↄ gↄↄ sɛ̃́ia zĩ́ↄ ń dikpɛ pↄ́ wa dìlɛↄ. Aaliↄ zĩkɛ Diiɛ gↄↄpii màa, mɛ́ an dasi lí ká lá wa dìlɛnɛ́wa. 32 Ampiↄ mɛ́ aali laaidↄ kpaaũkpɛ ń a pↄkeleↄ zĩwa, mɛ́ an gbɛ̃́ Aalona buiↄ lí laaidↄ Dii kpɛ́ zĩwa.
