Roma 9

1Krayst ta mfun do, taman glut i man-gu. Là tmulen agu kéng. I fandamgu tnuyal i Mtiu Tulus, na yé fgadè i là ktulen-gu kéng. 2Too sè klidùgu na malbà nawagu, 3du mdà di dad flanekgu, dunan i dad Dyu. Yé fandamgu baling fye ku do i falnayam Dwata, na sankahan agu mdà ku Krayst, syan galwà ale dale. 4Dale i bel Israél. Ta tnabò Dwata ale, ta fiten i kdatahan di dale, na ta mimò kenen kasafnè magin dale, na ta blén dale i uldin. Dale gutamdòan i glut kfagu mangamfù di kenen, na ta gdawatla i dad fakangan. 5Dale dad bel Abraham na i dademe gutambulla, na mdà di dad bella, sut Krayst, i Dwata magot kalbong kdee na magdayen kel di landè sen. Amén. 6Ise yé man-gu ku là gdohò i fakang Dwata du là ti kdee bel Israél ngà Dwata. 7Na ise ayé man-gu ku kdee bel Abraham i dad ngà Dwata. Bay yé man Dwata di ku Abraham, “Lo dad bel Isaak i dnilègu belam.” 8Yé gumtatekan i dad to sut di tagnè kagkah i to tanà, ise i dad ngà Dwata. Bay i dad sut mdà di fakang Dwata, dale dnilè dad glut bel. 9Du i fakang Dwata, dunan ani: “Ku ta ftoh i butang, samfulê agu, na mngà Sara lagi.” 10Na ise ku lo ayé, bay too midul i kbatengan di ksut i lwe ngà ale Rébéka na Isaak, i gutambulto. 11Di là fa sut i dad ngà ayé, na taman là fa gamgimò ale fye demen sasè du gdohò i knayè Dwata di kalékan dad to. Ise mdà di nimò, bay mdà di katlo Dwata. 12Ta manan di ku Rébéka, “I twege talbahò di twalin.” 13Man i Tnalù Dwata, “Bong nawagu ku Dyékob, tukay nawagu ku Isaw.” 14Fakayto man kè là tluh Dwata du nun nungulan? Là. 15Du ani man Dwata di ku Mosis, “Kandogu i knayègu kando, na kanbonggu nawa i knayègu kanbong nawa.” 16Taman, i kalék Dwata, là fdàan dun di knayè ku demen di nimò i dad to, bay fdàan di kakdon. 17Du man i Tnalù Dwata di harì di Idyip, “Ta nimòta ge harì du fye fitegu i kaltulusgu fagu di ge, na fye fdilègu i dagitgu di klamang banwe.” 18Taman, kando Dwata i knayèan kando, na fagéngan i knayèan fagéng. 19Keng nun tmimel i man-gu ayé gine, manan, “Kan ku dnuen Dwata i dad to? Nun kè to gamsang di knayè Dwata nimò?” 20Simto ge kè smumal di Dwata? Lo ge to. I kulang tanà, là fakayan man di to mifil dun, “Kan ku ani kibòam do?” 21I to mifil kulang, nun ktoon tamngà i tanà nifilan, i satu too mabtas, na i satu, là. 22Na salngad ayé i nimò Dwata. Yé kayèan, fiten i kalbutan, na fdilèan i kaltulusan di dad to gten falnayam, bay flon fantahà i nawan di dale. 23Kayèan lê fite i kdatahan ta kokan di gito dad kandon, dunan i dad to fatlagadan dmawat i kdatahan. 24Gito i dad to ta tlon, ise ku lo mdà di dad Dyu, bay lê man mdà di dad ise Dyu. 25Ani manan di libru Hosiya, “Dnilègu dad togu i ise dad togu di muna, na lêgu kanbong nawa i dad to là kanbonggu nawa di muna. 26Na i dad to di banwe gumanan dun dale, ‘Ise dad tota gamu,’ bay ani, ta tlo ale dad ngà i mto Dwata.” 27Ani lê fgadè Isaya gablà di dad bel Israél, manan, “Balù ku yé kdee dad bel Israél salngad falak di kilil mahin, bay là dee i galwà. 28Too mlal gdohò i kablé Dwata i ukuman di klamang banwe.” 29Too gdohò i fala man Isaya, “I Amu too maltulus, ku sandulêan falmo i dad belto, ta salngad ato moon di Sodom na Gomora.” 30Taman, ani i fakayto man. I dad to ise Dyu là fakgis mngabal i katluh di kanfe Dwata, baling gamdawat fagu di kaftoo. 31Bay i dad Dyu fakgis du fye mgimò ale tluh fagu di kimen i uldin, baling dale là gamdawat katluh. 32Kan? Du i kafakgisla, là fdàla dun di kaftoo, bay di fye nimò. Gsungkul ale di batu, 33du yé man di Tnalù Dwata, “Kahgu di Sayun i satu batu gugsungkul i dad to, i batu gafaglakob dale. Bay i ftoo di kenen, là gsalan.”

will be added

X\