II Tésalonika 3

1Na di gusenan, dad flanek, ani fnimi di gamu, tooyu gami dnasal du fye mlal mbel i Tnalù Dwata, na nafè i dad to lminge dun salngad di gamu nimò. 2Lêyu gami dnasal, fye falwà Dwata gami di dad to sasè du là ti sdulê ftoo i kdee dad to. 3Bay too gsalig i Amuto, na kenen fambagal na kamlung gamu di ku Satanas. 4Na mdà di Amuto, gadèmi na nimòyu i dad manmi gamu, na fanlesyu mimò dun. 5Mulà moon too faglabat Amuto i kakdo Dwata na i ktahà nawa mdà ku Krayst. 6Na dad flanek, fagu di kdatah i dagit Amuto Dyisas Krayst, dekmi gamu fawag di dademeyu ftoo malweh, du là mimen ale di ta tdòmi gamu. 7Du ta gadèyu na là fakay ku là ganbetyu i nimòmi, na ta teenyu sa, là ti myà gami talbahò di lammi mnè di safédyu. 8Là ti tadè gami mni di gamu, bay bnayadmi i kdee gulandèmi. Falgad gami talbahò di mdu na di kifuh du fye là maflayam gamu mifat gami. 9Balù nun ktoomi mni di gamu i dad gulandèmi, bay knèan, baling gami fagtuh talbahò du fitemi gamu i guflingen fye ganbetyu. 10Di lammi mnè déé di safédyu, ta galmi man di gamu, “Nangyu fankaan i to malweh.” 11Na ani duenmi man ani du gadèmi na nun kun dad to déé di gamu too malweh, na lo yé nimòla lmabet di nimò dademe dad to. 12Di kdatah i dagit Amuto Dyisas Krayst, ani dekmi na fngewemi di dad to ayé. Kudung ale talbahò fye nun wèla dad gulandèla. 13Na gamu, dad flanek, nang gamu ftakas mimò fye. 14Na ku nun to di gamu là nimenan i manmi di sulat ani, tnandàyu i to ayé, na nang gamu sgalak di kenen du fye too myà. 15Na nangyu kenen knuntra, bay fanngeweyu kenen salngad kafngeweyu i flanekyu. 16Mulà moon i Amuto, dunan i gutambul i ktanak nawa, klonto mlé gamu ktanak di kdee kfagu, na i Amuto magin di kdeeyu. 17Do Pol, smulat ani - kumusta di gamu. Ani ilè di kdee dad sulatgu na do gumdàan, du ani sa i dalan-gu smulat. 18Mulà moon i kafye Amuto Dyisas Krayst magin di kdeeyu.

will be added

X\