I Tésalonika 5

1Na, dad flanek, balù landè to smulat gamu ku kilen kagdohò i kdee ani, 2du ta gadèyu sa kakel i Du Kasfulê Amuto salngad di kel i to tmaku di kifuh. 3Too mlal kel i kalmola, salngad di libun maltien ku ta tamduk i tienan. Du di kman i dad to dun, “Too mtanak i kdee na landè samuk,” baling yé kakel i kalmola. Na là giwasla i kalmo ayé. 4Bay gamu, dad flanek, ta là mnè gamu di gukmifuhan, na yé duenam man, là makto nawayu di du ayé gambet i dad to là gatlagad di kakel i to tmaku. 5Du i kdeeyu, ta mnè gamu di gumalwan na di neng, du ta nfun Dwata gamu, na ta là mnè ato di gukmifuhan. 6Taman, dad flanek, too ato fgeye, na kloto to mnè di kagatlagad, na di ktanak fandam, là salngad di dademe. 7Yé gubong knudang i dad to di kifuh, na kifuh i lêla kaflangal. 8Bay du gito dad to mnè di gumalwan, taman là fakay ku là dnanto i ktoto. I kaftooto na i kasakdo, lsakto gambet anit. Na i kafdento i kagalwà, sukubto gambet kalù tek. 9Ise ku yé duen Dwata malék gito ku falnayaman, bay yé duenan du falwàan ato fagu ku Dyisas Krayst, i Amuto. 10Yé duen Dyisas mati du kenen i tlasto du fye masasatu ato mnè di safédan balù ku ta mati demen ku là di kasfulêan. 11Taman, satgal gamu nawa, na stabeng gamu, salngad di ta nimòyu. 12Na, dad flanek, ani fnimi di gamu, nafèyu i dad to falgad tmabeng gamu fagu di kebela na katdòla du mdà di Amuto. 13Tooyu ale nafè, na kandoyu ale du mdà di nimòla di blengyu, na sansatuyu i nawayu du fye nun ktanakyu. 14Na, dad flanek, ani lêmi fni di gamu, fanngeweyu i dad to malweh. Tan-galyu nawa i dad to mlidù, na tnabengyu i dad to mlungay. Na tooyu fantahà i nawayu di kdee. 15Na ilè ku nun to mimò sasè di gamu, nangyu bnalas. Bay yé nimòyu i fye di kat satu gamu, na di kdee dad to. 16Too gamu flehew. 17Too gamu dmasal di Dwata. 18Na balù ku dét i mkel di gamu, fasalamat gamu di Dwata fagu di ku Krayst Dyisas, du yé knayèan di gamu. 19Na nangyu nsang knayè i Mtiu Tulus. 20Na nangyu sanlen i dad tdò faglabat Dwata di dad to. 21Na tooyu neye i kdee tdò ta lingeyu, ku glut, ku demen là. Na nè i glut, busekyu di nawayu, 22bay fawag gamu di kdee sasè. 23Mulà moon i Dwata, dunan i mlé ktanak nawa, ftiu gamu, na kamlung i ktoyu - i layefyu, i nawayu, na i lawehyu - du fye landè gumaslenyu kel di kasfulê Dyisas Krayst, i Amuto. 24Du gsalig i tamlo gamu, taman nimòan i kdee ani. 25E, dad flanek, tooyu gami dnasal. 26Fiteyu di kdee dademeyu ta ftoo i mtiu kakdoyu dale. 27Na ani lêgu fni di gamu fagu di kdatah i Amuto. Bnasayu i sulat ani di kdee dad flanekto ftoo. 28Mulà moon i kafye Amuto Dyisas Krayst mnè di gamu.

will be added

X\