Nita Kapiloho 2

1Muri i ta tabu, i ta maea, “O here lakea na agelo ne huriki a tara na Vure o Epesus, o here maea: A ngava iea i valai na Bakovi i nugu a hada i polorua na limana a kanena, ra viri i laho na kurukuruna maka butu na nipara i polorua ni rata na gol. 2Iau a lohoka vona a narone mua. A lohoka na maka maregoa mu bole pali. A lohoka vona a hini mu hatenono na tahuna e huriki ri vakamadihi mua. A matakilaka vona mu koi ne huriki a bakovi hale. Mu toha e huriki ri taki ta ria a apostolo. Mu matai pali ria ri tatami. 3Mu hatenono, mu pesi tora na tahuna mu bole a maregoa a vuhuna mu luhoi torea a ragu. I uka ma mu tuha malulu, mu tabana ni kinigao. 4Pali iau a tahoka a ngava ne mua. I muga mu ngaru hateka iau. Pali ngane mu pe pali a naro ni ngaru hateka iau. 5I mavonga, a ngaru mu gu luhoi mule a naro kamumu ne mua hosi, mu matakilaka vona a hini mu boru valai meli, mu puru liu. Mu pulo a vilone mua, mu rata tabu a maka naro kamumu mu rata hosi na tahuna mu luhoi tora karaba. Ge uka, bara valai, a bole vurokia a butu na nipara ne mua. 6Pali a naro kamumu tara ne mua i maea, mu marikoi a narone huriki a murimuri ne Nikolas, i manga iau tara a marikoi a narone ria. 7E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure. E huriki ri mulangi na vabinga, ga taki ria ri gi kani a kanena kai na nimahuri, ra i pesi na hania na Vure.” 8Muri a bakovi iea i ta tabu, i ta maea, “O here lakea na agelo ne huriki a tara na Vure o Smerna, o here maea: A ngava iea i valai na viri ia a nitubuna maki lobo, a nilobona maki lobo, ra viri i mate, i mahuri mule. 9Iau a lohoka vona, mua ni vakamarego, mu bala a maki na malala, pali mu tahoka a mahala. A lohoka ne huriki ri taki ta ria a Iuda muholi, pali ria a tara ne Satan, ri padi a kidune mua. 10I popote mu gu bole a maregoa, pali naha ni mangenge. Mu longo, e Satan i popote ge ru dili ranga ne mua na bavi, ge toha mua, bara mu tahoka a maregoa na parava i ravulu. Mu pesi tora ni luhoi tora iau, ge vano ge harena na tahuna mu mate, lakea iau bara habi ne mua a mapane mua, ra a nimahuri vakaroro, i manga a viri i mulangi na rihiva i bole a tama. 11E rei a viri i ngaru ni longokilala, ge longo kamumu, ge luhoi kado a ngava a Hanuna Vure i taki virihi e huriki a tara na Vure. E huriki ri mulangi na vabinga, a ruana matenga i uka ma ge padoi ria.” 12“O here lakea na agelo ne huriki a tara na Vure o Pergamum, o here maea: A ngava iea i valai na viri i tahoka a bainat i tahoka a ngina i rua i vere hateka. 13Iau a lohoka vona mu made vai. A gula hariki ne Satan i tabuli na tanga iea. Pali mu tabana ni pesi tora na ragu. E Antipas, ra bakovi ne mua i kinigao ni taki tala a nitagu, ni rabalaki vonga na tanga ne Satan. Pali i uka ma mu lobo ni luhoi tora iau. 14Pali iau a tahoka a ngava ne mua. E huriki ranga ne mua ri muri mai a nitovo ne Balam. Re Balam hosi, i takia e Balak ge tami e huriki a Israel ri gi puru na hoa. I taki ria ri gi kani a kinani ni habi ne huriki a nitamina vure. I taki ria ri gi mole lae. 15I mavonga, mua ranga, e huriki ranga ri muri mai a nitovo ne huriki a murimuri ne Nikolas. 16I mavonga, mu pulo a vilone mua. Ge uka, bara valai malaviriri, ga vaubi turane ria na bainat, ra i toro toro tala na ngavagu. 17E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure. E huriki ri mulangi na vabinga, ga habi ne ria ranga mana, ra i tabuli kapiloho. Ga habi ne ria a kedo keakea, a rane ria karaba ni here vona. A rana karaba iea, i uka tara viri ge lohoka vona. A viri i bole a kedo iea, ia kikeri ge lohoka vona a rana karaba iea.” 18Muri i ta tabu, i ta maea, “O here lakea na agelo ne huriki a tara na Vure o Tiatira, o here maea: A ngava iea i valai na Tuna Vure. A matana i para manga a huvina kanono. A vahana ru para manga a bras ni ravu, lakea i para hateka. 19Iau a lohoka na narone mua. Mu vangaru, mu luhoi tora iau, mu vakori, mu hatenono na maregoa. I muga a narone mua i kamumu, pali ngane i kamumu hateka. 20Pali iau a tahoka a ngava ne mua, a vuhuna i uka ma mu ta pupukaria ra ngatavine e Iesebel. I taki ta ia a propet, i tovo e huriki a vora nau, i tuli ria ri gi mole, ri gi kani a kinani ni habi lakea ne huriki a nitamina vure. 21A habi a parava ranga ge pulo a vilona, pali i koi ni pulo a vilona, a vuhuna i ngaru hateka a naro hale vona ni ngoi. 22Mu longo! Iau ga habi a gilanga dagi vona. E huriki lobo ri mole turana, ria i uka ma ri gi pulo a vilone ria, ga habi a maregoa dagi ne ria. 23Ga rabalaki e huriki e tuna. Na naro iea, e huriki a tara na Vure lobo ri gi lohoka vona, iau a viri a lohoka na niluhoi, na ningaru ne huriki lobo. Ga habi a mapane mua, i muri mai a narone mua. 24Pali e huriki ranga ne mua o Tiatira, i uka ma mu muri mai a nitovo hale iea. I uka ma mu tovo na maki ni gale a nitovo dagi ne Satan. A taki mua, i uka ma ga habi tara nimava ne mua. 25Mu nugu tata kunana a niluhoi ne mua, ge harena na parava ga valai vona. 26E huriki ri mulangi na vabinga, ri muri mai a narogu ge vano ge harena na tahuna ri mate, iau ga habi ne ria a nitora, ri gi matakari e huriki lobo i uka ma ria a Iuda. 27‘Ri gi matakari tora hateka, ri gi ratapile e huriki a pile ne ria, i manga a viri i bipoda a ulo, i mapua kesi.’ Ri gi matakari mavonga a vuhuna e Tata i habi nau a nitora ni matakari. 28Muri ga habi ne ria a hada e Lagavago. 29E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure.”

will be added

X\