Nita Kapiloho 18

1Muri a matai tabua tara agelo i pe a hunu, i puru valai. I tahoka a nitora dagi. A bagetuanga vona i parai a malala, i ratea i palala hateka. 2I gale tala dagi hateka, i ta maea, “A tanga dagi e Babilon i vurua, i vurua pali! Ngane i made vona kunana e huriki a hanitu, a maka kadirovo hale, a maka maki ri tegi ri hale. 3I bele maea, a vuhuna a tanga lobo na malala ri ninu vona a naru vagole na moleanga vona, ri manga. E huriki a hariki na malala ri mole turana. E huriki a bakovi ni habi a maki ni gi kona, ri bole a moni dagi, a vuhuna i kona ne ria a maki i kupo, a vuhuna i ngaru ni tahoka a mahala i kupo.” 4Muri a longo tabu a lohona viri tara i ta valai na hunu, i ta maea, “Mua e huriki a ngate nau, mu ha taroa a tanga iea, ma mu gu ramai a naro hale vona, mu gu bole a vuranga turana. 5A naro hale vona i lolo rike hateka, i padoi a hunu. A Vure i uka ma i longo kaburungi. 6Mu rata virihi ia, i manga a hini i rata virihi e huriki ranga. Mu koli balaka rua a naro hale vona. Mu guru puru na kikei na vain vona a vain i vagole hateka na vain i habi ne huriki ranga. 7I vakabagetu mule ia, i pitei na mahala dagi vona. I mavonga, mu vakamadihia, mu ratea ge dedo. Mu rata mavonga, a vuhuna i taki mulea, i ta maea, ‘Iau a hariki ngatavine. Iau, i uka ma a havuri. I uka ma ge bele nau a vuranga, ga dedo.’ 8I mavonga, a vuranga i kupo ge bele vona na parava i taku kunana. A matenga, a nidedo, a vitoloa ge bele vona. A kanono ge gutu parinea, ge lobo, a vuhuna a viri i pelekadoa i gao hateka, ra Vure, a Bakovi Dagi.” 9“E huriki a hariki na malala, ra ri mole turana, ri vivi ni muri mai a ningaru hale lobo na kakaine ria turana, bara ri tangi, ri haloho na tahuna ri masia a pokona kanono vona. 10Bara ri mangenge na nimadihi dagi hateka i bolea, ri pesi basi, ri ta maea, “‘Omo! O tanga dagi-o, ra tanga kamumu e Babilon! A Vure i pelekado ioe, o lobo maki tavula-o.’ 11“E huriki a bakovi ri habi a mahala ni kona, ri tangi ngane. E rei ge kona ngane a mahala ne ria? 12E rei ge kona a gol, a silva, a kedo mata kamumu, a meki, a lavalava a mapana i dagi, a lavalava kuakua, a lavalava vururu ne ria. E rei ge kona a kai manginoro, a maki ni rata na togana elepen, a maki ni rata na kai a mapana i dagi, a maki ni rata na bras, a aen, a kedo padikuku ne ria? 13E rei ge kona a kulina kai manginoro ni kuku vona, a insens, a vain, a vel, a plaoa, a vit, a bulmakau, a sipsip, a hos, a karis, a vorakato. E rei ge kona ngane? 14“Bara ri ta maea, ‘A maki kamumu o ngaru hateka na hatemu ni bole, ngane i tabuli basi vomu. A maka mahala o vakabagetu mule ioe vona ri velu pali, i uka ma ni gi matai tabu!’ 15E huriki ri habi a maka maki nga ni kona, re huriki ri bole a mahala i kupo na tanga dagi iea, bara ri mangenge na nimadihi dagi i bolea, bara ri pesi basi, ri dedo, ri tangi maea, 16“‘Omo! A tanga kamumu-o, e huriki ri made vona ri rodo a varakia kamumu hateka, a lavalava kuakua, a lavalava vururu. O vakabagetu mule ioe na gol, na kedo mata kamumu, a meki! 17Pali malaviriri kunana, a mahala lobo vona i lobo liu.’ “E huriki a bakovi ni vakanunu a sip, e huriki a taho dari, ra ri leho na dari, bara ri pesi basi, 18ri tangi dagi, ri matanono mavonga a pokona tanga dagi iea, ri ta maea, ‘I uka tabu tara tanga ge kamumu manga a tanga iea.’ 19Bara ri dua, ri voro langa na gine ria a habulo, ri haloho, ri tangi dagi, ri ta maea, “‘Omo! A tanga kamumu-o! E huriki a tahona aga ri bole a mahala i kupo vona! Pali malaviriri kunana i vurua, i ngeki. 20Mua e huriki mu made na hunu, mu vivi! Mua e huriki a tara na Vure, e huriki a apostolo, e huriki a propet, mu vivi, a vuhuna a Vure i ratapilea a tanga iea, a vuhuna ri rata hale mua!” 21Muri a agelo hateka i bole rikea a kedo dagi, i manga a kedo ni ubi vila a vit vona. I bolea, i voro purua na dari, i ta maea, “A tanga dagi e Babilon tara, ni gi voro puru hale, i uka ma ni gi matai tabu. 22A nangina gita, a pinoli, a tavure, a kalova i uka ma ni gi longo tabu pololilo vomu. E huriki a mari ni rata a maki i uka ma ni gi matai tabu pololilo vomu. A nangina kedo ni ubi vila a vit i uka ma ni gi longo tabu pololilo vomu. 23A nipara i uka ma ge parai tabu ioe. A lohona bakovi a ngatavine ru parangi karaba i uka ma ni gi longo tabu pololilo vomu. E huriki a bakovi vomu ni habi a maki ni kona, ri dagi hateka ne huriki lobo na malala, o tami e huriki lobo na malala na muto vomu. 24Pali a Vure i matai pololilo vona a darane huriki a propet, e huriki a tara na Vure, e huriki lobo ni rabalaki na malala.”

will be added

X\