Mateo 9

1Muri e Isu i rike na aga, i pasi polo na darilomu, i bele na tanga vona. 2Na tahuna i made vonga, e huriki a bakovi ranga ri kaloho vilia vona a bakovi i mate a vahana, i mahita na moke. Na tahuna i matai ria ri luhoi tora ia, i takia a vaha mate, “O tugu. Naha ni luhoi lege. A puga vuroki a naro hale vomu.” 3Lakea e huriki a mari na vinara na lotu ri luhoi maea, “Ra bakovi iea, i hale hateka, i pahaluhoi ta ia a Vure.” 4E Isu i lohoka na niluhoi ne ria, lakea i ta maea, “I navai mu luhoi hale? 5I vai a ngava kavakava ga takia? Ga ta maea, ‘A puga vuroki a naro hale vomu,’ o ga ta maea, ‘O pesi rike o laho?’ 6Pali ngane ga vakasiri mua, a Tuna Bakovi i tahoka a nitora koea na malala ni puga vuroki a naro hale.” Muri i takia a vaha mate, i ta maea, “O pesi rike, o bolea a moke vomu, o lakea na tanga.” 7Lakea i pesi rike, i lakea na tanga. 8Na tahuna e huriki ri masia a naro iea, ria lobo ri mangenge, lakea ri kavurikea a Vure, ra viri i habi a nitora. 9Muri e Isu i malaga, i laho lokovonga. I masia a bakovi tara, a rana e Mateo, i mamade na roho na takis. Lakea e Isu i takia, “O muri nau.” Lakea e Mateo i pesi rike, i muri maia. 10Muri e Isu i vano, i kani na ruma ne Mateo. E huriki a bakovi ni bole a takis, e huriki a bakovi hale, ri valai, ri kani turane Isu, e huriki a murimuri vona. 11Na tahuna e huriki a Pariseo ri masia, ri nana e huriki a murimuri vona, ri ta maea, “I navai a mari ni tovo ne mua i kani turana e huriki a bakovi ni bole a takis, e huriki a bakovi hale?” 12Na tahuna e Isu i longoa a ninana iea, i ta maea, “E huriki i uka ma ri giloa i uka ma ri gi matai a dokta. E huriki ri giloa kunana bara ri masia. 13Mu vano mu luhoi kado taroa a nitana Vure iea: ‘I uka ma a ngaru a nihabi. A ngaru a rabu ni dodo.’ Iau a valai i uka ma ga gale mua e huriki mu luhoi ta mu malamala mu gu pulo a vilone mua. A valai ga gale e huriki ri naro hale ri gi pulo a vilone ria.” 14Muri e huriki a murimuri ne Ioanes ri valai, ri nanea e Isu, “I navai mia turana e huriki a Pariseo mi peremu, pali e huriki a murimuri vomu i uka ma ri peremu?” 15E Isu i koli, i ta maea, “Ri gi tangi navai e huriki ri valai na habu na parangia? Pali na tahuna a bakovi i parangi karaba ni tuli tala ne ria, bara ri peremu. 16“I uka ma si gi bolea a mavidana lavalava karaba si gi rahi karia a hini i marape na matutu na varakia. Bara si rata mavonga, na tahuna si loi a varakia, a mavidana lavalava karaba bara i hoho, i turapea a matutuna varakia, muri bara i ratea a hini mavida i ngavaka. 17I uka ma si gi guru dili a vain karaba na matutuna buroi ni rata na kulina meme. Bara si rata mavonga, bara i mapoda a kulina meme, i maguru tala a vain. A vain karaba bara ni guru dili na buroi karaba, lakea a vain, a buroi bara ru kamumu varago.” 18I uka ma i vakalobo ma a nitana, i valai tara matakari na roho na vaponga, i turume puru na ngalane Isu i togoa, i ta maea, “E tugu a ngatavine i mate ngane kunana. O valai o padoia, ge mahuri mule.” 19Lakea e Isu i pesi rike i vano turana. E huriki a murimuri vona, ria ranga ri lokovonga. 20Na tahuna ri lalaho lokovonga, a ngatavine tara, i pori vona a dara na pida i ravulu a polona i rua, i laho valai muri ne Isu, i padoi a ngutuna varakia vona. 21I rata mavonga, a vuhuna i luhoi maea, “Iau ga padoi kunanea a varakia vona, bara tavaga.” 22Ngane e Isu i matagege, i masia, i ta maea, “Naha ni luhoi lege. O tavaga a vuhuna o luhoi tora iau.” Malaviriri kunana, i lobo a gilanga vona. 23Na tahuna e Isu i bele na ruma na mata­kari, i matai e huriki ri haloho, 24lakea i taki ria, “Mu ha. A koma i uka ma i mate. I mahita kunana.” Lakea ri nongo vakia. 25Ni tono tala lobo e huriki, muri i dili, i nugua a limana a koma ngatavine, lakea i mahuri mule. 26A velengana ni longo na tanga lobo na tabeke iea. 27E Isu i malaga tabu, i laho lokovonga. Lakea a bakovi ala rua ru kepa, ru muri vona ru gale tala, ru ta maea, “O hamone Davit, o dodo maria.” 28Na tahuna i dili na ruma, a kepa nga ru valai vona, lakea i nana rua, “Muru luhoi iau a kara ni vakamatapara marua?” Lakea ru koli, “Bakovi Dagi, i muholi.” 29Muri i padoi a matane rua i ta maea, “Ge bele manga a hini muru luhoi ge bele.” 30Lakea ru mata para. E Isu i taki tora rua, i ta maea, “Naha ni vakalongoa tara viri na maki i bele ne marua.” 31Pali ru vano, ru vakalongo lae na tabeke iea a maki i bele ne rua. 32Na tahuna ru vano, a bakovi i dili vona a hanitu, i ngavarubu, ni tuli valai ne Isu. 33Lakea e Isu i lili talea a hanitu. Muri a bakovi iea i vakatubu ni ta. E huriki ri made turane Isu ri turutu, ri ta maea, “I uka tara maki maea ge bele hosi o Israel!” 34Pali e huriki a Pariseo ri ta maea, “I lili tala e huriki a hanitu na nitora na hariki na hanitu.” 35E Isu i lakea na tanga dagi, a tanga kiroko lobo, i tovo e huriki pololilo na roho na vaponga. I vara e huriki na Velenga Kamumu na harikianga na Vure. I vakamahuri e huriki lobo ri giloa. 36Na tahuna i matai e huriki, i dodo ria, a vuhuna a niluhoi ne ria i varoru, ri uka nitora. Ri manga a maka sipsip ri uka matakari. 37Muri i taki e huriki a muri­muri vona, “A maki ni kani na hania i kupo hateka, pali e huriki a bakovi ni mirio i uka ma ri ala kupo hateka. 38Lakea mu nanea a tahona hania ge rudu valai tabu ranga bakovi ri gi mirio.”

will be added

X\