Apostolo 26

1Ngane e Agripa i takia e Paulus, “Ngane o ta, o koli a ngava ne huriki ri padi virihi ioe.” Lakea e Paulus i tolokave ria, i ta maea, 2“Hariki Agripa, mona a ngaru ni koli a maka ngavane huriki a Iuda ri padi virihi iau vona. I kamumu hateka a pesi na matamu, 3a vuhuna ioe o lohoka kamumu vona a narone huriki a Iuda, turana maka ngava mi vahehe bala vona. Iau a nana ioe go hatenono go longo kamumu a ngava nau. 4“E huriki a Iuda ri lohoka vona a nimadegu i vakatubu na tahuna a kiroko vona. Ri lohoka vona iau a made turane huriki a kabu nau, muri a lakea o Ierusalem. 5I tabaka ngane ri lohoka nau. Ria bara ri malopi, bara ri vakalongo ioe vona a narogu, i vakatubu na tahuna a dili na tara ne huriki a Pariseo. E huriki a Pariseo, mi rangi e huriki a tara ranga, mi muri mai kamumu a naro na lotu ne huriki a Iuda. 6Ngane a pesi koea go pelekado iau, a vuhuna a luhoi a ngava muholi na Vure i taki e huriki e tubune hita vona hosi i muholi. 7A ngava muholi iea, e huriki a kabu ne mia, ala ravulu a polona i rua, ri ngaru ni bolena na tahuna ri kavurikea a Vure na haro a rodo. O Hariki Agripa, na niluhoi iea kunana e huriki a Iuda ri padi virihi iau na ngava! 8I navai mu pahadaki ta a Vure i keri ni vakamahuri mule e huriki na matenga? 9“I muga, iau tara a luhoi i kamumu ga ratapilea a rane Isu, ra bakovi o Nasaret. 10A rata mavonga o Ierusalem. A bole a nitora ne huriki a prister dagi, a ru dili na bavi e huriki a tara ne Kristo. Muri, na tahuna ni taki ni gi rabalaki ria, iau tara longo ne ria ni gi rabalaki. 11A vakamadihi vakaroro ria pololilo na maka roho na vaponga, a toni ni rata ria ri gi lohopile a niluhoi ne ria. I madihi a hategu ne ria, a matakana ria na maka tanga basi, a vakamadihi ria vonga. 12“Na leho iea kunana e huriki a prister dagi ri rudu iau a sike o Damaskus. 13Na kuru haro na tahuna a laho na dala, a masia a nipara i para valai na hunu. A nipara iea i para dagi hateka na haro, i para halui iau turana e huriki a bakovi ri laho turagu. 14Mia lobo mi boru puru na malala, lakea a longoa a lohona bakovi i ta na nita Hibru i ta maea, ‘Saulus, Saulus! I navai o vakamadihi iau? Ioe o vakamadihi mule ioe na naromu.’ 15“Muri a nana, ‘Bakovi Dagi ioe e rei?’ “Lakea e Bakovi Dagi i koli i ta maea, ‘Iau e Isu, ra viri o vakamadihia. 16Pali ngane o pesi rike, a vuhuna iau a bele vomu ga ru ioe ge ioe a vora nau, go vakalongo e huriki vona a maki o matai nau mona, a maki bara vakasiri ioe vona ma. 17Iau ga korimule ioe ne huriki a viri vomu. Ga korimule ioe ne huriki i uka ma ria a Iuda, re huriki ga rudu ioe ne ria, 18go vakapalala a matane ria, ri gi pe a uvo, ri gi valai na hini i palala, ri gi ha vona a nitora ne Satan, ri gi valai na Vure, i mavonga a Vure bara i puga vuroki a naro hale ne ria, ri gi bole a murine ria turana e huriki ri luhoi a Vure ni vulaki pali.’ 19“I mavonga, o Hariki Agripa, iau i uka ma longotaroa a nivakasiri i valai na hunu. 20A vakatubu ni vakalongo e huriki ri gi pulo a vilone ria, ri gi ramai a Vure, ri gi rata a naro ge vakasiri ria ri mapulo muholi pali. A vakalongo muga e huriki o Damaskus e huriki o Ierusalem. Muri a lakea na tanga lobo na tabeke ne Iudea, muri a lakea ne huriki i uka ma ria a Iuda, a vakalongo ria. 21Lakea e huriki a Iuda ri lakavu iau na roho na Vure, ri ngaru ni rabalaki iau, a vuhuna a rata mavonga. 22Pali a Vure i tuhori iau vakaroro. Ngane a pesi koea, a vakalongo e huriki a matasia, e huriki a bakovi dagi. A vakalongo kunana a ngava ne Moses, e huriki a propet ri takia ge bele. 23A ngava ri takia i maea, ‘E Kristo ge bole a nimadihi, ge mate. Ia bara i muga ne huriki lobo, i pesi rike mule na matenga. Muri ge vakalongo ne huriki a Iuda, ne huriki i uka ma ria a Iuda a nitana nipara.’” 24Na tahuna e Paulus i vakalongo a maka ngava nga, lakea e Pestus i ta puhaki ma ia, i ta maea, “Paulus, ioe o ta manga manga! A lohokanga vomu i rata ioe o manga!” 25Pali e Paulus i koli, i ta maea, “O Pestus, iau i uka ma a manga! A maka ngava a taki i malamala, i muholi. 26Hariki Agripa! Ioe o lohoka vona pali a maka ngava nga, lakea a ta pagapaga i uka ma mangenge. O lohoka vona a maka maki nga, i uka ma i tabuli kapiloho na matamu o na talingamu. O lohoka pali ne ria, a vuhuna a maka maki nga i uka ma ni rata kapiloho. 27Hariki Agripa, o luhoi tora a ngavane huriki a propet? Iau a lohoka vomu, o luhoi ria!” 28Lakea e Agripa i takia e Paulus, “O luhoi go pulo malaviriri a niluhoi nau, ge iau a Kristian?” 29E Paulus i koli i ta maea, “Ge malaviriri, o ge maradoi, a vasileki na Vure, mua lobo mu longo a nitagu mona mu gu manga iau. Pali a sen kunana i uka ma ge kolotata a limane mua!” 30Muri e Agripa a hariki i pesi rike. A matakari, e Bernaisi turane huriki ranga ri pesi rike, 31ri pagitala. Lakea ri vata, ri ta maea, “A bakovi iea, i uka ma i ratea tara maki ge mate vona, o ge dili na bavi vona.” 32Lakea e Agripa i takia e Pestus, i ta maea, “A bakovi iea, i uka ma ge ngaru ni masia e Kaiser, bara o vakapagetalea na bavi.”

will be added

X\