1 Na tahuna e Apolos i made vonga o Korin, e Paulus i laho pololilo, i vano, i bele o Epesus. Na tahuna i bele vonga i matavisi e huriki a murimuri ranga. 2 Lakea i nana ria, “Na tahuna mu luhoi torea e Kristo, mu bole a Hanu Kiripiripi, o i uka?” Ri koli ria ri ta maea, “I uka ma mi lohoka vona a Hanu Kiripiripi.” 3 Lakea e Paulus i nana tabu, “Pali a hilova navai mu bolea?” Ri koli, ri ta maea, “A hilova e Ioanes i tovo mia vona.” 4 Lakea e Paulus i ta maea, “E Ioanes i vahilolo e huriki, ri gi pulo a vilone ria. I taki ria ri gi luhoi torea a viri ta ge valai muri vona, re Isu.” 5 Na tahuna ri longoa a ngava iea, ni vahilolo ria na rana e Isu a Bakovi Dagi. 6 Muri e Paulus i ru langa a limana ne ria, lakea a Hanu Kiripiripi i puru ne ria, ri ta na tabele tebi, ri ta propet. 7 Re huriki a bakovi nga ri ala ravulu a polona i rua. 8 Muri e Paulus i dili na roho na vaponga, i ta pagapaga vonga na Velenga Kamumu na keva i tolu. I ta turane ria, i vakalongo ria vona na harikianga na Vure. 9 Pali i ranga ne ria ri putu ngingi, ri tabana i uka ma ri luhoi tora, ri ta hale na dala ne Isu na matane huriki. Lakea e Paulus i hataro ria, i tuli e huriki a murimuri, i vano i vara na parava lobo na roho na nitovo ne Tiranus. 10 E Paulus i made vonga na pida i rua, i vara ria vonga, lakea e huriki lobo na tabeke ne Asia ri longoa a nitana Bakovi Dagi. E huriki a Iuda, e huriki a Grik. 11 A Vure i rata maka nivakasiri dagi na limane Paulus. 12 A nitora na Vure i dagi hateka vona, e huriki bara ri bole a lavalava kiroko, a varakia e Paulus i padoi, bara ri ru langa ne huriki ri giloa, lakea bara ri tavaga, e huriki a hanitu ri ha tala ne ria. 13 Muri e huriki a Iuda ranga, a leho ne ria ni laho viliha ni lili tala e huriki a hanitu, ri masia a nitora na rane Isu a Bakovi Dagi. Lakea ri ngaru ni leho vona a rane Isu, ri taki e huriki a hanitu, ri ta maea, “A taki ioe na rana e Isu Kristo, ra viri i vara vona e Paulus, o ha tala!” 14 E huriki e tune Skeva ala polorua ri ratea a naro iea. E Skeva ia a prister dagi ne huriki a Iuda. 15 Na parava tara ri ratea a ngava iea, lakea a hanitu tara i koli, i ta maea, “A lohoka vona e Isu. A lohoka vona e Paulus. Pali mua, mua e rei?” 16 Muri a bakovi i dili vona hanitu i vuli puru ria, i ratapile ria. I mavuka a varakia ne ria, ri vadarivu, ri ha tala na roho. 17 E huriki a Iuda, e huriki a Grik o Epesus ri longoa a maki i bele, lakea ri mangenge, ri kavurikea a rane Isu, a Bakovi Dagi. 18 E huriki ri luhoi torea e Kristo, e huriki ala kupo ri taki tala a naro hale ne ria na matane huriki. 19 E huriki ranga ne ria, a bakovi na muto, ri bole valai a maka puhu ne ria, ri rungani na matane huriki lobo. A mapana maka puhu ri rungani, a kedo silva i 50,000. 20 I mavonga, a nitane Bakovi Dagi i rere, e huriki ala kupo ri longoa, ri longo maia. 21 Muri e Paulus i ngaru ni laho lakea o Masedonia, o Akaia muri ge lakea o Ierusalem. Lakea i ta maea, “Ga lakea taro o Ierusalem, muri a Vure i ngaru iau ga lakea o Rom.” 22 I rudu taro a bolekori vona, e Timoti e Erastus, ru gu muga lakea o Masedonia. Pali i made mule taro vonga na tabeke ne Asia ia. 23 Na tahuna iea e huriki a bakovi ranga ri marikoi vona a dala ne Bakovi Dagi, lakea ri piurike a hatene huriki. 24 A bakovi tara, a rana e Demitrius, a mari ni rata a maki na silva. Ia a bakovi ni rata na silva a goroto kiroko na vure ngatavine e Artemis. I habi a leho dagi ne huriki a mari turana, ri bole a moni dagi ni rata a maka goroto nga. 25 I gale palupu e huriki nga, turana e huriki ranga ri rata a leho maea, lakea i taki ria, “Mua o huriki a turagu, mu lohoka vona si vakabele a moni dagi vona a leho si ratea. 26 Pali ngane mu longo, mu matai a naro e Paulus i rata. I taki e huriki, lakea ri pulo a narone ria. I taki e huriki a vure ni rata na limana bakovi, i uka ma ria a vure muholi. I uka ma i rata koea o Epesus kunana. I rata na tanga lobo o Asia. 27 I mavonga, i mata manga e huriki bara ri biu a leho ne hita, bara ri biu tabu a roho ni vasileki na vure dagi ne hita, a vure ngatavine e Artemis, bara ri luhoia ta a maki tavula. Lakea ra vure ngatavine, e huriki lobo o Asia, e huriki lobo na malala ri kavurikea, i uka ma ge dagi tabu a rana.” 28 Na tahuna ri longoa a ngava iea, i madihi a hatene ria, ri vakatubu ni gale tala dagi, ri ta maea, “E Artemis, a vure ngatavine ne Epesus, i dagi hateka!” 29 Lakea e huriki lobo na tanga dagi, i varoru a niluhoi ne ria, ri roro lae. Ri turari e Gaius, e Aristakus, ra bakovi o Masedonia ala rua ru laho turane Paulus. Ria lobo ri nunu lakea na roho na vaponga ne huriki a Grik. 30 E Paulus i ngaru ni dili ge ta turane ria, pali e huriki a murimuri ri hatekakaria. 31 E huriki a matakari ranga ne Asia ri ngarua e Paulus. Ria ranga ri rudu a ngava vona, ri takia nahea ge dili na roho na vaponga. 32 E huriki pololilo na roho na vaponga ri varoru. E huriki ranga ri kulugou na maki tara. E huriki ranga ri kulugou na maki ranga, a vuhuna ria lobo i uka ma ri lohoka vona i navai ri lokovonga. 33 E huriki a Iuda ri tugua e Aleksander i lokomuga, lakea e huriki ranga vonga ri takia ge ta. Lakea e Aleksander i tolokave ria ri gi longo valai ri gi longo a ngava ge taki. 34 Pali ri matakilaka vona ia a Iuda, lakea ri gale dagi tabaka, i manga na kilala i rua, ri ta maea, “E Artemis ne Epesus i dagi hateka!” 35 Muri a sekreteri ne Epesus i taki e huriki ri gi vulai, lakea i ta maea, “Mua o huriki a bakovi o Epesus. Mu lohoka vona e Epesus i matakari a roho na vure ngatavine e Artemis turana kedo i boru valai na hunu, ra kedo si kavurikea. 36 A ngava iea i muholi. I uka tara viri ge gegea. I mavonga mu vulai, naha ni rata viliha. 37 Re huriki a bakovi mu turari valai koea, i uka ma ru takia tara ngava ge hale na vure ngatavine. I uka ma ru panahoa tara maki na roho ni vasileki vona. 38 Pali e Demitrius, e huriki e turana, bara ri tahoka a ngava, ri gi lakea na murina ni vapelekado, e huriki a mari ni pelekado a ngava ri gi longo a ngava ne ria. 39 Pali mua, bara mu tahoka tara ngava mu gu pelekadoa, mu taki tala na vaponga ne huriki na tanga dagi ri gi pelekadoa. 40 A ta mavonga, a vuhuna e huriki a matakari o Rom bara ri masia a rongova i bele mona, bara ri luhoi hita ta si vaubi. Ra rongova mona i uka vuhuna. Bara si keri ni tuveve a pelegona.” 41 I taki lobo a ngava nga, muri i tono tala ria, ri vano.
