Apostolo 16

1E Paulus i havai lakea o Derbe, muri i lakea o Listra, a tanga i made vona a murimuri tara, a rane Timoti. E kinane Timoti a ngatavine o Iuda i luhoi torea e Kristo, pali e tamana a bakovi o Gris. 2E huriki a kabukabu o Listra, o Ikonium ri kavurikea e Timoti. 3E Paulus i ngarua e Timoti ge laho turana, lakea i palea a kulina, a vuhuna e huriki a Iuda ri made vonga ri lohoka vona e tamana a bakovi o Gris. 4Na tahuna to laho lae na maka tanga, to vakalongo e huriki a tara ne Kristo vona a maka vinara i rata e huriki a apostolo, a bakovi dagi o Ierusalem ne ria ri gi muri mai. 5Na naro iea kunana, ni vakatora a niluhoi ne huriki a tara ne Kristo, e huriki ala kupo ri luhoi tora, ri dili na tara ne Kristo na parava lobo. 6E Paulus i laho turane rua, to laho lae na tabeke ne Prigia ne Galesia, a vuhuna a Hanu Kiripiripi i ta kari tou nahea to go vara na ngava na tabeke ne Asia. 7Na tahuna to bele na nagi ne Misia to toni ni dili na tabeke ne Bitinia, pali a Hanune Isu i taki tou nahea to go lokovonga. 8I mavonga, to laho polopolo vona e Misia, to vano to bele o Troas. 9Na rodo iea e Paulus i mahita, i vurena vona a bakovi tara o Masedonia i pesi, i galea, i ta maea, “O valai koea o Masedonia, o kori mia!” 10Muri ne Paulus i vurena, mete kisi puru a maka maki mateu, mete dava ni lakea o Masedonia, a vuhuna mete luhoi a Vure i gale mateu, mete ge vara e huriki vonga na Velenga Kamumu. 11Mete rike na aga o Troas, mete vore kudu a dari, mete bele o Samotres. Na parava muri mete vore lakea o Neapolis. 12Muri mete laho lakea o Pilipai, a tanga dagi e huriki a Rom ri hae na tabeke ne Masedonia. Mete made vonga na parava ranga. 13Na Parava Nimalo mete pagitala na tanga dagi mete lakea na gagana naru. Mete luhoi ta i tahoka a tabeke ni vasileki vonga. Mete matai e huriki a ngatavine ri made vonga, lakea mete made puru mete ta turane ria. 14A ngatavine tara, a rana e Lidia, i made turane ria, i longo a nitane mateu. A tanga vona e Tiatira, a leho vona ni habi a lavalava kuakua ni kona. Ia a ngatavine ni kavurike a Vure, lakea a Bakovi Dagi i vakalohoka ia ge longokilala a ngava e Paulus i taki. 15Lakea ni vahilolo, turane huriki a kabu vona. Muri i taki mateu i ta maea, “Moto luhoi ge iau a murimuri muholi ne Bakovi Dagi, moto valai moto made na ruma nau.” Lakea mete longo, mete made turana. 16Na parava tara, na tahuna mete laho lakea na tabeke ni vasileki, mete masia a vora ngatavine tara i dili vona a hanitu, i ratea i ta muga na maka maki i uka ma i bele ma. E huriki a bakovi ri matakaria ri bole a moni dagi vona a maka ngava i taki. 17A ngatavine iea i muri ne mateu e Paulus, i gale tala, i ta maea, “Ra bakovi nga, a vora na Vure Meli Liu! To vakalongo mua vona a dala a Vure ge korimule mua vona!” 18I rata mavonga na parava i kupo a ngava iea, lakea e Paulus i madihi a hatena, i ngalakapulo, i takia a hanitu, “Na rane Isu Kristo, a taki ioe, o pagitala vona a ngatavine iea!” Malaviriri kunana i ha tala a hanitu. 19Na tahuna e huriki a tahona vora ngatavine ri masia a dala ne ria ni bole a moni i lobo, ri lakavu e Paulus e Sailas, ri turaria rua lakea na mada, ru gu pesi na matane huriki a matakari. 20Ri turari rua na matane huriki a mari ni pelekado, ri ta maea, “A bakovi nga a Iuda, ru piurike e huriki na tanga dagi ne hita. 21Ru tovo e huriki vona a naro i uka ma i ramai a vinara ne hita e huriki a Rom.” 22Lakea e huriki ri vapesihi vonga ri vadili vapopo, ri padi virihi rua na ngava. Lakea e huriki a mari ni pelekado a ngava ri vakuku ni gi kali tala a varakia ne Paulus e Sailas, ni gi lagu. 23Ri lagu hale rua, muri ri voro dili rua na bavi. Lakea ri takia a tagari ge tagari kamumu rua. 24Na tahuna a tagari i longo a ngava iea i turari rua, i ru dili rua na bavi pololilo liu, i kolotata a vahane rua na kai i mava. 25Na kuru rodo e huriki pololilo na bavi ri longo e Paulus e Sailas ru vasileki na Vure, ru kalolo a linge vasileki. 26I bele vakaturutu ngane a vuruke dagi, i polu a butuna bavi. Na tahuna iea kunana a logo na bavi i mata ka, a maka sen ri maparu ne huriki a bakovi pololilo na bavi. 27A tagari i hadongo, i matai a maka logo ri mata ka, i luhoi ta ri ha pali e huriki, lakea i bolea a bainat ta ge koto mulea. 28Pali e Paulus i gale tala, i ta maea, “Naha ni tomo! Mia lobo mi tabana koea.” 29Lakea a tagari i gale na nipara, i nunu dili, i vakulu a tagana, i turume na ngalane Paulus e Sailas. 30Muri i tuli tala rua, i nana, “Marua a bakovi dagi nau, a ra maki ga ratea ga bole a nimahuri vakaroro?” 31Ru koli, ru ta maea, “O luhoi torea e Isu a Bakovi Dagi, lakea a Vure bara i korimule ioe turana e huriki a viri vomu.” 32Muri ru takia na nitane Bakovi Dagi turane huriki na ruma vona. 33Na tahuna iea kunana na rodo, a tagari i vahilolo a harena lebo ne rua. Muri a tagari ni vahilolo turane huriki a kabukabu vona. 34I tuli rua lakea na ruma vona, i vakani rua. I vivi hateka turana e huriki a kabu vona, a vuhuna ngane ri luhoi torea a Vure. 35I palala a hini, lakea a mari na nipelekado i rudu e huriki a tagari ri gi ta maea, “O bole tala na bavi e vikirua nga.” 36Lakea a tagari na bavi i takia e Paulus, “A mari ni pelekado i taki muru gu pagitala. Ngane muru malaga, muru vano na nivalemu.” 37Pali e Paulus i taki e huriki a tagari ri valai, i ta maea, “E huriki a mari ni pelekado a ngava i uka ma ri pelekado maria, pali ri lagu tavula maria na matane huriki lobo, muri ri ru dili maria na bavi. Pali maria a tahotanga ne Rom. A vinara i taki i uka ma ni gi lagu tavula a tahotanga ne Rom. Pali ngane ri ngaru miri gi vano kapiloho? I uka ma ge mavonga! O taki ria ri gi valai ri gi tuli tala maria.” 38Lakea e huriki a tagari ri vano, ri vakalongo e huriki a mari ni pelekado. Na tahuna ri lohoka ne Paulus e Sailas rua a tahotanga ne Rom, ri mangenge. 39Lakea ri lokovonga, ri ta dodo ne rua, ri tuli tala rua, ri taki rua ru gu pe a tanga ne ria. 40Muri e Paulus e Sailas ru lakea na ruma e Lidia, ru vapopo turane huriki a kabukabu, ru vakatora a niluhoi ne ria, muri ru vano.

will be added

X\