2 Korin 12

1Ra hini a bibi rike mule iau bara i uka kanena, pali ga ta lokovonga. Ga vakalongo mua vona a vuregu, a maki e Bakovi Dagi i vakasiri a viri vona. 2A lohoka vona tara bakovi i rihi e Kristo. Na pida i ravulu a polona i va (14) i lokovonga pali, a Vure i bole sikea na hunu. Na tahuna i sike lakea, i uka ma a lohoka vona, ia muholi, o i vurena kunana. A Vure i lohoka vona. 3Ra bakovi iea, ia muholi i sike na paradiso, o i vurena kunana, i uka ma a lohoka vona, a Vure i lohoka. Pali iau a lohoka vona 4ni bole sike na hunu. I longo a maka maki, a ngavane hita i keri ni tuveve. A Vure tara i takia nahea ge tuveve polo. 5A maki iea i bele, i kamumu ga bibi vona, pali i uka ma ga ratea. A maki bara bibi rike mule iau vona kunana, a hini iau a uka nitora. 6Pali iau bara bibi rike mule iau, i uka ma ga manga, a vuhuna a ngavagu bara a ngava muholi. Pali i uka ma ga bibi rike mule iau, a vuhuna a koi e huriki ri gi pelekado iau na vuregu. A ngaru ri gi pelekado iau na maki a taki, na maki a rata. 7Ni habi nau a maregoa, i uka ma ga gigi tora vona a maki a Vure i vakasiri nau. A vinuru ne Satan i rata iau, i uka ma ga gigi tora. 8Balaka tolu a nana torea e Bakovi Dagi ge bole vurokia a maregoa iea, 9pali i koli, i ta maea, “I uka. A naro kamumu nau ge kara ioe, a vuhuna na tahuna o uka a nitora, a nitora nau pololilo vomu i bele kavakava.” I mavonga, ngane a vivi ni bibi rike mule iau vona a hini a uka nitora, lakea a nitora ne Kristo ge tabuli pololilo nau. 10I mavonga a vivi kunana na tahuna a uka a nitora, e huriki ri harogi iau, a bole a maregoa, e huriki ri vakamadihi iau, a bole a nimadihi na rane Kristo. A vivi kunana, a vuhuna na tahuna a uka a nitora, a Vure i kori iau na nitora vona. 11Iau a ta manga a manga, pali mua kunana mu rata iau a ta manga a manga, a vuhuna i uka ma mu ta kamumu mai iau. Mua bara mu ta kamumu mai iau, a vuhuna re huriki mu taki ta ria a apostolo kamumu hateka, i uka ma ri rangi iau, ra iau a bakovi tavula. 12Na tahuna a made turane mua, a hatenono ne mua, a vakasiri ne mua, ne iau a apostolo muholi. A rata a maka niva­kasiri, a maki ni turutu vona, a vaka­siri a nitora dagi. 13I navai? Mu luhoi a rata kamumu e huriki a tara na Vure na tanga ranga, pali mua i uka ma a rata kamumu mua? I navai a hini mavonga? A bole a moni ne ria, pali i uka ma a bole a moni ne mua. Mu puga vuroki a naro hale nau! 14A made turane mua balaka rua pali. Ngane ga lakene tabu, ga made turane mua. I uka ma ga vakapae mua, ga nongi a moni. I uka ma a ngaru a moni ne mua. A ngaru mua. A koma i uka ma ge matakaria e tamana. E tamana bara i matakaria a koma. 15Iau a vivi ni habi lobo ne mua a maki nau, ga kori a hanune mua. A vivi kunana ni kori mua na nitora lobo nau. Iau a ngaru hateka mua, pali mua i uka ma mu ngaru hateka iau. 16Mu lohoka vona i uka ma a vakapae mua, ga bole a moni ne mua. Pali mu taki ta a tami mua, a bole a moni ne mua. 17Na tahuna a rudu lakene e huriki a turagu, i uka ma ri bole a maki ne mua. 18Na tahuna a rudu lakenea e Titus, a rudu tabua e turane hita tara i tungaria. Pali e Titus, i uka ma i bole a moni ne mua, a vuhuna a niluhoi, a narone maria e Titus i taku kunana. 19Mu luhoi navai, iau a herea a raukea iea ne vona ni tagari iau? I uka. Iau a rihi e Kristo, a herea a raukea iea na matana Vure ga vakatora a niluhoi ne mua. A maki lobo a rata ne vona ni vakatora mua kunana, mua e huriki a turagu. 20Iau ga lakene, pali a mangenge, ma ga matai mua mu gu naro tebi na naro a ngaru ta mu gu rata. Lakea mua ranga, bara mu matai iau i mapulo a narogu. A mangenge ga matai mua mu gu vahehe, mu gu vamasigoro, mu gu vatahate, mu gu vapida lae, mu gu vapadimomo, mu gu ta tavulavula, mu gu putu ngingi, mu gu rata viliha. 21A mangenge vona a Vure nau, ma ge vakakiroko iau na matane mua, bara tangi hateka a vuhuna e huriki ri rata a rabu hale muga, i uka ma ri pulo ma a vilone ria. Re huriki ri rata a naro na molenga.

will be added

X\