2 Korin 1

1Iau, e Paulus, a apostolo ne Isu Kristo, na ningaru na Vure. Maria e Timoti, a turane hita, miri herea a raukea iea. I lakea ne mua e huriki a tara na Vure mu made o Korin, turana e huriki a tara na Vure ri made na tabeke lobo ne Akaia. 2A Vure, e tamane hita, turana e Bakovi Dagi e Isu Kristo, ru gu rata kamumu mua, ru gu habi a nivalemu ne mua. 3Si gi kavurikea a Vure, e Tamane Bakovi Dagi ne hita, e Isu Kristo, e Tamane hita i dodo hita, a Vure i luke hita. 4I luke maria na tahuna miri bole a maregoa, lakea maria ranga, bara miri luke e huriki ranga ri bole a maregoa na naro a Vure i luke maria vona. 5Miri bole a nimadihi i kupo a vuhuna miri rihi e Kristo. I mavonga, e Kristo bara i luke hateka maria. 6Na tahuna miri bole a maregoa, bara i kori mua, ni gi luke mua, ni gi korimule mua. Na tahuna a Vure i luke maria, bara i kori mua, ni gi luke mua. Mua ranga mu hatakia na tahuna mu hatenono, mu kaloho a nimadihi, ra maka nimadihi miri bole pali. 7Miri lohoka muholi vona, a Vure ge luke mua i manga a hini i luke maria, a vuhuna mu bole a nimadihi i manga maria miri bole a nimadihi. 8Mua o huriki a turagu, a ngaru mu gu lohoka vona a nimadihi a bolea o Asia. A nimadihi a bolea i dagi hateka, a keri ni kalohoa, lakea a luhoi ta ga mate. 9I muholi, a luhoi ta ga mate. I bele mavonga, i uka ma ga luhoi tora mule iau. Ga luhoi torea a Vure, ra Vure i vakamahuri mule na matenga e huriki ri mate pali. 10I korimule iau vona a maregoa dagi iea. Muri ma, tabu, bara i korimule iau. A luhoi torea, ge korimule iau vakaroro. 11Mua ranga, mu kori iau, mu vasileki. Bara mu rata mavonga, e huriki ala kupo bara ri kavurikea a Vure na hini i longo a nivasileki ne huriki ala kupo, i vakabagetu iau. 12A vivi vona a hini a hategu i uka ma i hataki hale vona tara maki a ratea. A nimadegu, a Vure i rata iau a made malamala. A maki lobo a rata, i uka ma a tami e huriki. I uka ma a luhoi tora a lohokanga na bakovi. A luhoi torea a naro kamumu na Vure. A naro nga a rata na matane huriki na malala. A rata hateka na matane mua. 13A ngava a here mu gi, mu longokilala kunana. A ngaru mu gu longokilala liu, 14i manga a hini mu longokilala popote pali. Muri ma na tahuna a Bakovi Dagi e Isu ge hamule valai, bara mu vivi nau, ge manga a hini iau a vivi ne mua. 15A lohoka vona, lakea ta ga lakene taro ne mua, ga matai mua balaka rua. 16Ta ga lakene ne mua muga ni lakea o Masedonia. Muri ta ga made tabu turane mua na tahuna a hamule valai o Masedonia, mu gu kori iau, ga hamule lakea o Iudea. 17Ra mua, mu luhoi iau ta iau a viri ni pulo tavula a nitagu a ta maea? Mu luhoi iau, ta a ramai a naro na malala a rata puru a dalagu, a ta rua, a ta maea, “Ga lakene, i uka ma ga lakene?” 18A Vure i ramai vakaroro a ngava i taki. Iau tara, na tahuna a taki ga rata a maki, i uka ma ga pulo tavula a ngavagu. 19E Isu Kristo, a Tuna Vure, ra viri mateu e Sailas, e Timoti mete vakalongo mua vona, i uka ma i pulo lae a ngavana. E Isu i ramai vakaroro a ngava i taki. 20A maki lobo a Vure i ta muholi vona ri bele muholi ne Isu. I mavonga si gi kavurike poloa ne Isu a Vure, si taki i muholi si kavurikea. 21A Vure kunana a viri i rata hita si pesi tora ni rihi e Kristo. I vulaki hita, 22i rua a kilakila ne hita, i vakasiri hita ne vona. I habi ne hita a Hanuna, ge made na hatene hita, i vakasiri manga i muholi hateka ge konamule hita. 23A Vure i lohoka nau, iau a ta muholi na matana. I uka ma a lakene tabu o Korin, a vuhuna a koi ni vakamadihi mua. 24I uka ma mete rata polo muga muga mete ge taki mua mu gu luhoi navai. Mete leho palupu turane mua, mu gu vivi, mu gu pesi tora na niluhoi tora.

will be added

X\