1 Timoti 3

1A ngava i muholi hateka, i maea: A viri i ngaru hateka ge ia a matakari na lotu, i ngaru a leho kamumu. 2I mavonga, a viri ni ru ge ia a matakari, ge muri mai kunana a naro kamumu, bara ni keri ni padi virihia na naro hale. E girihina ge taku kunana. Nahea ge ramai a ningaru tavulavula vona. Nahea ge rata tavula a maki, ge ramai a niluhoi kamumu. E huriki ri gi togoa. Ge matakari kamumu e huriki ri valai na ruma vona. Ge lohoka ni tovo e huriki na nitana Vure. 3Nahea ge ia a bakovi ni ninu. Nahea ge hinihatena ni rata a vabinga, ge made madoru. Nahea ge ia a bakovi ni vahehe. Nahea ge ngaru hateka a mahala. 4Ge matakari kamumu e girihina e tuna mai. Ge tovo e huriki e tuna ri gi longototo a ngavana, ri gi togoa. 5A bakovi i uka ma i matakari kamumu a kabu vona, ge matakari navai e huriki a tara na Vure? 6A bakovi i pulo karaba a vilona, nahea ni gi ru ge ia a matakari. Ma ge bibi rike mule ia, muri bara i vurua vona a naro hale i rata, i manga hosi e Satan i vurua vona a naro hale vona. 7A bakovi i ngaru ni matakari a tara ne Kristo, ge kamumu a narona, lakea e huriki i uka ma ri lohoka na Vure, ri gi togoa. Ia i uka ma ni gi togo, bara ni harogi pile, i puru na hoa ne Satan. 8I mavonga kunana e huriki a vora na lotu. E huriki ri gi togo ria. Nahea ri gi ngava naru. Nahea ge vakavora ria a naru vagole. Nahea ri gi ngaru hateka a moni. 9A niluhoi ne ria ge kamumu kunana ri gi muri mai a ngava muholi a Vure i vakasiri ne hita. 10O toni taro a vilone ria. Na tahuna o matai ri leho kamumu, o ru ria ge ria a vora na lotu. 11E huriki a ngatavine ranga, e huriki ri gi togo ria. Nahea ri gi padimomo. Nahea ri gi ninu a naru vagole, ri gi manga. Ri gi rata kamumu a leho lobo ni habi ne ria. 12A vora na lotu ge tahoka e girihina i taku kunana, ge matakari kamumu e huriki e tuna. 13E huriki a vora na lotu ri rata a leho kamumu bara ni togo, ni kavurike, bara ri pesi tora na niluhoi torea e Isu Kristo. 14- 15A ngaru ni lakene, ga matai ioe. Pali a herea a raukea iea, go gia, ma ga keri ni lakene malaviriri. O gia, lakea mua e huriki a tara na Vure bara mu lohoka vona a ra naro kamumu mu gu varata vona. Hita a roho na Vure mahuri. Si manga a butu a vola, si kalohoa na ngava muholi. 16I muholi hateka, a ngava na naro na Vure i kamumu hateka. Ra ngava iea hosi i kapiloho, pali ngane ni taki tala pali ne hita. A ngava iea i maea: E Kristo ni poda, i bele manga a bakovi. A Hanu Kiripiripi i vakasiri a narona i kamumu. E huriki a agelo ri masia. A velengana ni vakalongo na tanga lobo na malala. E huriki ranga koea na malala ri luhoi torea. Ni bole sike na hunu, i bole a bagetuanga.

will be added

X\