1 Petrus 4

1A vuhuna e Kristo i bole a nimadihi na kakaina, mua ngane mu bole a niluhoi vona, mu dava ni bole a nimadihi. E rei a viri i bole a nimadihi na kakaina, i lobo pali ni ratena a naro hale. 2I uka ma ge ramai tabu a ningaru hale na kakaina. Bara i nunu muri mai kunana a ningaru na Vure. 3A hini hosi mu rata a maka naro hale, ngane i lobo. A naro hale nga e huriki i uka ma ri lohoka na Vure ri ngaru ni rata: i manga a naro na molenga, a naro ni ngutu na viri, a naro ni ninu a naru vagole, a naro ni vapopo, ni ninu hateka, a naro ni mole, a naro ni lakea na klab, a naro hale ni kavurike a vure ranga. 4Ri turutu na tahuna mu koi ni turane ria ni rata a naro hale nga, lakea ri harogi mua. 5Pali muri ma, bara ri pesi na matana Viri ge pelekado a narone huriki ri mahuri, e huriki ri mate pali, ri takia i navai ri rata a maka naro ri rata. 6I mavonga, a Velenga Kamumu ni vara pali ne huriki ri mate muga ne Kristo, i bele. Ri mate manga hita lobo bara si mate, pali ngane i mahuri a hanune ria, i manga a Vure. 7A malala i tabukoi ge lobo, i mavonga, mu matakari kamumu a ningaru ne mua, mu matadoko, mu gu kara ni vasileki. 8A maki dagi hateka, mu gu tabana ni vangaru muholi, a vuhuna na tahuna mu vangaru, bara i kavitagu a naro hale i kupo. 9Mu bole dili na ruma ne mua e huriki a turane mua, mu matakari ria, naha ni marikoi. 10Mu matakari kamumu a nitora legelege a Vure i habi ne mua. Mu vakori na nitora nga. 11E rei a viri i moro ni ta, ge ta manga a Vure i habia a ngava vona. E rei a viri i moro ni kori e huriki, ge kori na nitora a Vure i habia vona. Mu rata mavonga, a maki lobo mu rata bara i habi a bagetua na Vure polo ne Isu Kristo. A bagetua lobo, a nitora lobo, ge ne vona kunana vakaroro. 12Mua o huriki a turagu, a maka nitoni dagi bara ri valai, ri toha mua manga a kanono. Naha ni turutu manga a maki maea i uka ma ge bele. 13Na tahuna ri bele, mu vivi, a vuhuna mu bole a maregoa i manga e Kristo i bole a maregoa. Muri bara mu vivi hateka na tahuna a bagetuanga vona i bele kavakava. 14Na tahuna e huriki ri harogi mua a vuhuna mu luhoi torea a rane Kristo, mu vivi, a vuhuna a Hanuna Vure i bagetu hateka i made turane mua. 15Naha ni rabalaki a viri, naha ni panaho, naha ni rata a naro hale, naha ni rahi dili mua na maki na viri tara. A naro nga ri hale. Bara mu rata a maki nga, mu bole a maregoa, i kamumu. 16Pali a viri i bole a maregoa a vuhuna ia a Kristian, nahea ge maruhu. Ge kavurikea a Vure, a vuhuna ni gale ia a viri ne Kristo. 17A parava i bele pali e huriki a tara na Vure ni gi pelekado. A nipelekado ge tubu ne hita, ge bele navai ne huriki i uka ma ri longototo a Velenga Kamumu na Vure? 18A Hinere i ta maea, “I gutu ni korimule e huriki a bakovi malamala. I mavonga, ge bele navai ne huriki a bakovi hale ri marikoi a Vure?” 19I mavonga, e huriki ri bole a maregoa na naro a Vure i vivi vona ri gi tabana ni rata a naro kamumu, ri gi ru mule ria na limana Viri i ratarike a maki lobo. I rata a maki lobo i taki ge rata.

will be added

X\