1 Ioanes 5

1E huriki ri takia a Vure i rudu vilia e Isu ge korimule hita, ria a tuna Vure. E huriki ri ngarua e Tamana bara ri ngaru tabu e huriki e tuna. 2Na tahuna si ngarua a Vure, si longototo a vinara vona, si vakasiri manga si ngaru e huriki a tuna Vure. 3E huriki ri ngarua a Vure ri longototo a vinara vona. Pali a maka vinara na Vure, i uka ma ri habi a maregoa ne hita. 4Hita e huriki a tuna Vure, si rangi a maka nitoni na malala, a vuhuna si luhoi torea a Vure. 5E rei a viri i rangi a maka nitoni na malala? A bakovi i lohoka vona e Isu ia a Tuna Vure i rangi a maka nitoni na malala. 6A Vure i rudu vilia e Isu Kristo ge puru valai na malala. A Vure i vakasiri i rudua na tahuna e Isu ni vahilolo na naru. I vakasiri tabu na tahuna e Isu i mate na kai tavalavala, i tua a darana. A Hanu Kiripiripi i vakalongo hita vona i muholi, a vuhuna a Hanu Kiripiripi ia a vuhuna ngava muholi. 7A maki i tolu to vakalongo hita ne Isu i valai na Vure. 8A maki i tolu nga: a Hanu Kiripiripi, a naru, a dara. To vakalongo palupu a ngava i taku. 9Si longo mai a ngavane huriki a bakovi tavula. Pali a ngavana Vure i muholi hateka. I vakalongo hita pali ne Tuna, i mavonga si gi longo maia. 10E huriki ri luhoi torea a Tuna Vure, ri lohoka na hatene ria i muholi ia a Tuna Vure. E rei a viri i uka ma i luhoi torea a Tuna Vure, i manga i galea a Vure a bakovi na taminga, a vuhuna i uka ma i longo mai a ngava a Vure i vaka­longo hita vona e Tuna. 11A ngava a Vure i vakalongo hita vona i maea, ge habi ne hita a nimahuri vakaroro. A nimahuri vakaroro iea i valai ne Tuna. 12E rei a viri i laho turana Tuna Vure bara i tahoka a nimahuri vakaroro. Pali e rei a viri i uka ma i laho turana Tuna Vure i uka ma ge tahoka a nimahuri vakaroro. 13Iau a here a ngava nga lakene mua e huriki mu luhoi torea a rana Tuna Vure, mu gu lohoka vona mu tahoka a nimahuri vakaroro. 14Na tahuna si takia vona tara maki, pali a maki si nana vona i ramai a ningaru vona, si lohoka vona bara i longo. 15Na naro iea, si lohoka vona i longo a ninana ne hita. A ra maki si nanea vona, bara i habi kunanea. 16Na tahuna mu matai e turane hita tara i rata a naro hale, ra i uka ma i vakabele a matenga, mu vasileki vona, lakea a Vure ge habi a nimahuri vakaroro vona. Pali e huriki ranga, a naro hale ri ratea bara i vakabele a matenga. I uka ma a taki mu gu vasileki ne huriki ngi. 17A naro hale lobo ri hale. Pali a naro hale ranga i uka ma ri vakabele a matenga. 18Si lohoka vona e huriki a tuna Vure i uka ma ri ramai tabu a naro hale. E Satan i keri ni padoi ria, a vuhuna a Tuna Vure i matakari ria. 19Hita e huriki a ngate na Vure. Pali e huriki ranga, a nitora ne Satan i matakari ria. 20A Tuna Vure i valai, i vakapalala a gine hita, si gi lohoka vona a Viri Muholi. Si rihia e Tuna, re Isu Kristo, a Bakovi Muholi. Ia a Vure Muholi. Ia a vuhuna a nimahuri vakaroro. 21Mua e huriki e tugu, mu malele ha na maka vure taminga.

will be added

X\