1 Ioanes 3

1E Tamane hita i ngaru hateka hita, i gale hita e huriki e tuna. Ngane hita e huriki e tuna. E huriki a bakovi a ngatavine na malala i uka ma ri matakilala hita, a vuhuna i uka ma ri matakilalea a Vure. 2Mua e huriki a turagu, ngane hita e huriki a tuna Vure. I uka ma si lohoka vona a kakaine hita ge mata navai muri ma. Pali si lohoka vona a ngava nga: na tahuna i hamule valai, bara si mapulo, si manga ia, a vuhuna si masia na matane hita, i mata navai. 3E rei a viri i pasimata ni masia, bara i ramai a naro malamala, i manga e Kristo i malamala. 4A viri i rata vakaroro a naro hale, i putu puru vakaroro a vinara. A naro ni putu puru a vinara ni gale a naro hale. 5Mu lohoka vona, e Kristo, i uka liu a naro hale ge ratea. I valai ge puga vuroki a naro hale. 6Pali e rei a viri i rihi e Kristo, i uka ma ge ramai tabu a naro hale. E huriki ri rata vakaroro a naro hale i uka ma ri lohoka ne Kristo, i uka ma ri matakilalea. 7Mua e huriki e tugu, mu matadoko, ma ge tami mua a viri tara. E rei a viri i ramai a naro malamala, ia a bakovi malamala, i manga e Kristo. 8Pali e rei a viri i ramai vakaroro a naro hale, ia a bakovi ne Satan, a vuhuna e Satan i ramai a naro hale, i vakatubu hosi na nidoko na hunu a malala. A Tuna Vure i puru valai koea na malala ge vakalobo a leho ne Satan. 9E rei a viri ni gale a tuna Vure i uka ma ge ramai tabu a naro hale, a vuhuna i bole pali a vilona Vure. Bara i keri ni ramai a naro hale, a vuhuna i bele manga a tuna Vure ngane. 10Na naro iea bara mu matakilaka vona e rei e huriki a tuna Vure, e rei e huriki e tune Satan. E rei a viri i uka ma i ramai a naro kamumu, i uka ma i valai na Vure. A viri i marikoi e turana, ia tara i uka ma i valai na Vure. 11A ngava ni vara paru hosi i maea, “Mu vangaru.” 12Nahea si gi naro manga e Kain. Ia a bakovi ne Satan, lakea i rabalakia e tarina, i mate. I rabalakia a vuhuna a narona i hale, a narone tarina i malamala. 13Mua e huriki a turagu, naha ni turutu na tahuna e huriki na malala ri marikoi mua. 14Si lohoka vona, si ha taro pali a dala na matenga, si bole a nimahuri, a vuhuna si vangaru. E rei a viri i uka ma i ngarua e turana i tabana ni laho na dala na matenga. 15E rei a viri i marikoi e turana, i manga a mari ni rabalaki a viri. Pali mu lohoka vona, e rei a viri i rabalaki a viri i uka ma i bole a nimahuri vakaroro. 16E Kristo i vakasiria ne hita a naro ni vangaru muholi. I mate na murine hita. I mavonga, hita ranga, i kamumu si gi ramai a narone Kristo, si gi lohopile mule hita, si gi vatuhori. 17Pali a bakovi tara ge tahoka a mahala na malala, i matai e turana i bala a maki, pali i uka ma i dodoa, i uka ma i tuhoria, ngane a ningaru na Vure i uka ma i tabuli na hatena. 18Mua e huriki e tugu, nahea si gi taki kunana si vangaru. Si gi vangaru muholi, si gi vakasiri na narone hita. 19Na tahuna si vangaru, si lohoka vona si ramai a ngava muholi. I mavonga i luke a hatene hita na matana Vure. 20Na tahuna si hataki manga si rare na matana Vure, si lohoka vona a Vure i rangi a niluhoi iea. I lohoka na maki lobo. 21Pali na tahuna i uka ma si hataki manga si rare na matana Vure, si lohoka vona a Vure ge longo hita na tahuna si vasileki. 22A ra maki si takia vona, bara i habi, a vuhuna si longototo a vinara vona, si rata a naro i vivi vona. 23A vinara vona i maea, si gi luhoi torea a rane Tuna, e Isu Kristo, si gi vangaru, i manga a hini i vakuku hita vona. 24E huriki ri longototo a vinara vona ri rihi ia. Ia tara i rihi ria. Si lohoka vona si rihi a Vure, a vuhuna i habi ne hita a Hanu Kiripiripi.

will be added

X\