1 Ioanes 2

1Mua e huriki e tugu, a here lakene ne mua a nita iea, nahea mu gu rata a naro hale. Pali a viri tara ge rata a naro hale, si tahoka a Viri i made turane Tamana, i takia ge puga vuroki a naro hale si rata. Ra viri iea, e Isu Kristo a Viri malamala. 2Ia kunana a dala ne hita, ge puga vuroki a naro hale ne hita. I uka ma a dala ne hita kunana. Ia a dala ne huriki lobo na malala. 3Si gi matakilaka navai na viri i lohoka na Vure? A viri i lohoka na Vure bara i longototo a vinara vona. 4E rei a viri i taki ta i lohoka na Vure, pali i uka ma i longo mai a vinara vona, a bakovi iea a bakovi na taminga. I marikoi na nita muholi. 5Pali e rei a viri i longototoa a nitana Vure, ia i ngaru muholia a Vure. A kilakila na viri i madoko turana Vure i maea, 6a viri i madoko turana Vure bara i laho manga e Kristo i laho. 7Mua e huriki a turagu, a vinara a vakalongo mua vona i uka ma a vinara karaba. A vinara a vakalongo mua vona a vinara hosi, mu lohoka vona pali. A vinara hosi a ngava mu longoa pali. 8I muholi, a vinara iea, a vinara hosi. Pali a vinara iea, ia tara, a vinara karaba. A narone Kristo i vakasiri a vinara iea i muholi. A narone mua ranga, i vakasiri i muholi, a vuhuna a uvo i vakatubu ni lobo, a nipara muholi i para pali. 9E rei a bakovi i taki ta i laho na hini palala, pali i marikoi ne turana, a bakovi iea i tabana ni made na uvo. 10A viri i ngarua e turana, i made na hini palala. I uka naro ge sibo vona ge boru. 11Pali e rei a viri i marikoi e turana, a viri iea i made na uvo, i laho na uvo. I ruru, a vuhuna i uvo a matana. 12Mua e huriki e tugu, a here lakea ne mua, a vuhuna a Vure i puga vuroki na rane Kristo a naro hale ne mua. 13Mua e huriki a tamana koma, a here lakea ne mua a vuhuna mu lohoka vona e Kristo, ra Viri i made hosi, muga na maki lobo ni ratarike. Mua e huriki a riau, a here lakea ne mua a vuhuna mu rangia pali e Satan. Mua e huriki e tugu, a here lakea ne mua a vuhuna mu lohoka vona e Tamane hita. 14Mua e huriki a tamana koma, a here lakea ne mua a vuhuna mu lohoka vona a Viri i made hosi, muga na maki lobo ni ratarike. Mua e huriki a riau, a here lakea ne mua a vuhuna mu pesi tora ni luhoi torea a Vure, mu loho doko vona a nitana Vure mu rangia pali e Satan. 15Naha ni ngaru a naro na malala. Naha ni ngaru a maka maki na malala. E rei a viri i ngaru a maka maki na malala, i uka ma i ngarua e Tamane hita. 16A maki lobo na malala, i manga a ningaru hale na kakaine hita, a ningutu na maki na viri tara, a naro na viri i bibi rike mule ia na hini i tahoka a mahala i kupo, a naro nga i uka ma ri valai ne Tamane hita. Ria a naro na malala. 17E huriki a bakovi a ngatavine na malala bara ri velu. A ningaru lobo na malala bara ri lobo. Pali e rei a viri i ratea a ningaru ne Tamane Hita, bara i made vakaroro. 18Mua e huriki e tugu, ngane a nilobo­na parava i tabukoi. Mu longo pali vona a pile ne Kristo ge valai na nilobona parava. Mona e huriki a pile ne Kristo ala kupo ri bele pali. I mavonga, ngane si lohoka vona, a nilobona parava i tabukoi. 19Ranga e huriki a pile ne Kristo, muga ri dili turane hita, pali i uka ma ria e huriki e turane hita muholi. Bara ria e turane hita muholi, i uka ma ri gi ha taro hita, bara ri tabana ni made turane hita. Pali ri ha taro hita pali, i vakasiri manga i uka ma ria a turane hita muholi. 20Pali mua, a Viri Malamala i habi ne mua a Hanu Kiripiripi. Mu tahoka a lohokanga. 21A here lakea ne mua a vuhuna mu lohoka vona a ngava muholi. A ngava muholi i uka ma ge vakabele a ngava taminga. 22E rei a viri i takia e Isu, ta a Vure i uka ma i rudua ge korimule e huriki, a viri iea a bakovi na taminga. Ia a pile ne Kristo. I ngalahere varago ne Tamana, ne Tuna. 23A viri i ngalahere na Tuna Vure, i ngalahere ne Tamana. A viri i luhoi torea a Tuna Vure, i luhoi torea e Tamana. 24A ngava mu longo muga, mu loho doko vona. Na tahuna mu rata mavonga, bara mu rihi e Tuna, e Tamana. 25E Isu i ta muholi ne hita ge habi ne hita a nimahuri vakaroro. 26A ngava nga, a here virihi e huriki a bakovi ri ngaru ni tami mua. 27Pali mua, e Kristo i habi pali ne mua a Hanu Kiripiripi, i made turane mua. A Hanu Kiripiripi i tovo mua na maki lobo, lakea i uka ma ge tovo mua tara viri. I muholi hateka a hini i tovo mua vona, ra mu gu rihi e Kristo. I mavonga mu rihia. 28Mua e huriki e tugu, mu rihi e Kristo. Mu rata mavonga, i uka ma mu gu maruhu na tahuna ge hamule valai. 29E Kristo i malamala. I mavonga, e huriki ri ramai a naro malamala, ria e huriki a tuna Vure.

will be added

X\