1 Toonobuunatɨ Jesu fuuhi Galilea muuai onegueehivɨ. Jaabamomoro bu Tiberia onoomuuai. 2 Jaabo dojɨcutɨ sihidɨ miyamɨnaafeehicauhi sihidɨ ejeevanoco omoonɨɨboro iguihuvamoco ubuheesunocoaatyɨmehicauneguiiha. 3 Jaanegui Jesu ifabaɨhallɨvɨ ufuuboroijɨɨbogomɨnaama casɨɨvuubo. 4 Jaasumi fiitɨcuuno judiomɨ jɨɨbaimoPascua iicaujino. 5 Jaanaa Jesu emeecɨubo atyɨmeuhi sihidɨ miyamɨnaaidojɨcutɨ asaaunoco. Jaanegui Felipeque nuubo: ¿Cuucatɨ fɨne machutaacomanaajejirahi jito imachuqui? nooboro. 6 Jillɨ Felipeque nuubo jillɨ diiboco ɨnɨsuubo, ¿mɨllɨ fɨne neejiibo?onoomaño jillɨ omoonɨjinoco imino agaajacuuboro. 7 Jaanegui Felipe nuuhi:Fɨne doscientos denario tɨcovovɨ manaajejirahi, machutaaco. Jaarunofamoovɨro ajashuno ɨɨfetejitɨrahi, nooboro. 8 Jaanegui ijɨɨbogomɨnaatɨ saafi Andre Simon Pedro nahabo Jesuconuuhi: 9 Jineeri icase sase sahusedɨno sebada maahuno, bu miimɨsiicɨtavaabomɨsi icanoma iicase. ¿Mɨllɨ jaano tonoodɨno jinoodɨmomiyamɨnaavɨ ɨfetejirahi? nooboro. 10 Jaanegui Jesu nuuhi: Diitoco monoo icasɨɨcamaaiqui, nooboro.Jaamañeri sihidɨ ñaavahu icauhi. Jaanohallɨvɨ casɨɨcamaaiumo cincomildɨno gaifiimɨ. 11 Jaadɨ Jesu imaahunoco ɨɨcɨuboro Moocaanico graciacoaacɨuboro, toonoco ijɨɨbogomɨnaaco acɨubo. Jaanoco diito imiyamɨnaamaɨfuuhi gɨcɨnɨumoma. Tollɨro bu itaavaco ɨɨfuumo iimuguudɨneheje. 12 Jaanoco amachuumo utuvacuudɨ Jesu nuuhi, ijɨɨbogomɨnaaco: Paryɨmanaanɨ ihatyuuvoco gañɨɨcafototɨno iicaqui, nooboro. 13 Jaanoco ananɨumo gahafusuuhi, jɨiibaiñoco fahuseecɨ, siino miibaicɨicanoco sahusedɨno sebada maahuno iicaunotɨ aatyuvuunoco. 14 JaanoJesu sihidɨ ejeevano ɨɨfusuco eheetavuunoco aatyɨmeumoro diito nuuhi:Miyaanoro jahi jaanɨ Moocaani iimaamɨnaafi jiinɨjehallɨvɨ asaaujiibo,noomoro. 15 Jaamoro Jesuco ɨɨcɨumoro satyuujirumo aivojɨɨbotɨ iheetavequi.Jaanoco agaajacɨuboro iinoro fuubo siino ifabaɨjaagovɨ. 16 Jaanaa mihiijɨcuudɨ ijɨɨbogomɨnaa muuaijaago fuuhi. 17 Jaamoromeenegafaño ɨjɨcamaaiumoro fuumo onegueehi Capernaujaagovɨ. Jaanaacɨvucuuno. Jaarunaa Jesu diitojaa gaseutɨhi. 18 Jaanaa imuuaifa tɨcovaunosihidɨ guibuhuba asaauno. 19 Jaamo ufuumo sahuse juugahusetɨ sano ɨdɨɨnokilometronohachuta icacuumaaca Jesu saauhi nɨfaihuhallɨdɨ ɨgooboro.Jaaboco aatyɨmeumoro sihidɨ igutuumo. 20 Jaarunaa diitoco nuubo:Uujoho; mihiguetejirahana, nooboro. 21 Jaanegui diito diiboco imo imo imeenegafaño gaayɨcɨuhi. Jaadɨgoovano ɨɨfutuumo ufuuhɨgo. Miyamɨnaa Jesuco Guiinehi. 22 Jaano seseevedɨ toonegueehivɨ miyamɨnaa ifitafutuumo gaajauhisagaaro meenega iicaunoco. Jaagafaño Jesu ijɨɨbogomɨnaama footɨnaacadiito iinoro fuumo. 23 Jaanaa bu sagahaje gaseuhi Tiberia cuumitɨ asaauno,jaagahaje cañavuuhi Jesu graciaco aacɨunobuunatɨ maahunoco amachuunofiitɨno. 24 Jaamañovɨ Jesu, ijɨɨbogomɨnaa icano achahaunoco miyamɨnaaaatyɨmeumoro toono imeenenefaño ɨjɨcamaaiumoro fuumo CapernaujaagoJesuco guiinomoro. 25 Jaaboco onogoo muuaivɨ aatyɨmeumoro nuumo: Jɨɨbogomɨnaafi,¿cusumi gasehinɨhi? noomoro. 26 Jaanegui Jesu diitoco iimusuuhi: Miyanotɨro, miyanotɨro amɨɨhaiconeehi: Jillɨ mamachuhinɨmo mutuvahinɨneguiiha uco miguiinehi. Jillɨsihidɨ ejeevanoco eheetavehinɨnoco mimiyaaveneguiiha icatɨno. 27 Jaaneguiifinɨno machutaguiiha mududɨcamaaidino, ifinɨjitɨno fiivoco aacɨnomachutaguiiharo mududɨcamaaje. Toonoco uujoho MiyamɨnaafibadɨIfiivuubo amɨɨhaico aacɨjino. Toonotɨ uujoho Moocaanitɨ asaanocomiyamɨnaa igaajaqui, bu uuvɨ Moocaani igaajataco ificucuuno icano, nooboro. 28 Jaanegui diiboco dilluumo: ¿Mɨllɨ jaanegui momoonɨji Moocaani iijɨcomeheetavequi? noomoro. 29 Jaanegui Jesu diitoco nuuhi: Moocaani imeguehi, diibo ucoagalluuboco amɨɨhai mimiyaavogonoco, nooboro. 30 Jaanegui diiboco nuumo: ¿Eneecata sihidɨ ejeevanoco mɨɨhaicodɨhɨfusu maatyɨmemere ɨco mimiyaaveguequi? 31 Mɨɨro moheedeetemɨhaimachuuhi mana onoonoco sɨcaihɨgovɨ iicausumi, oono Caatɨnɨhaamefaño:Niquejeo maahunoco machusuubo, onoobadɨ, noomoro. 32 Jaanegui Jesu iimusuuhi: Miyanotɨro, miyanotɨro amɨɨhaico neehi:Moise amɨɨhaico niqueje maahuco acɨtɨhi, Guihirubi amɨɨhaico jino miyamaahu niqueje maahuco acɨhi. 33 Jaano jino Moocaani maahu diiboniquejefañotɨ iniitoobo jiinɨjemɨnaaco fiivoco aacɨɨbo, nooboro. 34 Jaanegui nuumo: Aivojɨɨbo, fahiijɨvaro mɨɨhaico toono maahucodaacɨhiica, noomoro. 35 Jaanegui Jesu nuuhi: Uujoho fiivo maahu; tajaa asaamoajebavacuujitɨhi, uco imiyaavogomoco ufucuro adufira aivucuujitɨhi icano. 36 Mɨɨro amɨɨhaico uujoho eneehinɨcuubadɨ: Uco mahatyɨmecuurumo uco mimiyaaveguehicatɨhi. 37 Mɨɨro paryɨ fanooro Guihirubi uco aacɨnotajaa saaji, tollɨro bu tajaa asaamoco uujoho buhɨ gañɨɨjitɨhi. 38 Uujohoniquejefañotɨ niitehinɨtɨhi uuro iimogonoco moonɨqui icatɨno, jillɨ ucoagalluuhinɨɨbo iimogobadɨ moonɨqui saahinɨhi. 39 Jaano jino Guihirubiuco agalluuhinɨɨbo iimogono; Paryɨ diibo uco aacɨmoco saatohobacojeevesutɨɨbo paryɨ famoocoro ufucu niinofucusumi buheetesuji. 40 Jaanojino uco agalluuhinɨɨbo iimogono; Paryɨ famooro miyamɨnaa MoocaaniSeemeneque aatyɨmemere imiyaavogomo ifinɨjitɨno fiivoma iicaqui.Jaamoco uujoho niinofucusumi buheetesuji, nooboro. 41 Jaanegui judiomɨ tɨcovauhi diiboco edejecuumo. Uujoho fiivo maahuniquejefañotɨ iniituubo, unuuneguiiha 42 neehicauhi: ¿Nacu jaanɨ Jesu Joseachi icatɨɨbo? ¿Mɨɨro caani, seejɨ icamoco mɨɨhai magaajahi? ¿Mɨllɨ jaabo:Uujoho niquejefañotɨ niitehi, neehicahi? noomoro. 43 Jaanegui Jesu nuuhi: Musuufenɨ toono amɨɨhai dejecufiraco. 44 Mɨɨhaiñooba tajaa saajitɨrahi Guihirubi uco agalluhinɨɨbo tajaaisɨvatɨruva. Jaamoco uujoho buheetesuji ufucu niinofucu. 45 Mɨɨro,Moocaani iimaamɨnaa aamefaño jillɨ noono: Moocaani famoocorojɨɨbegueji, noonoro. Jaabadɨ famooro Moocaanico uguubuumoro diibotɨagaajamo tajaa saahi. 46 Mɨɨhaiñooba Moocaanico atyɨmetɨhi ɨdɨɨboro uujoho Moocaanitɨasaaubo Moocaanico atyɨmehi. 47 Miyanotɨro, miyanotɨro amɨɨhaico neehi:Uco imiyaavogomo ifinɨjitɨno fiivoma icaji. 48 Uujoho fiivo maahu. 49 Mɨɨroamɨɨhai eedeete manaaco sɨcaihɨgovɨ amachuurumo chuumuuhi. 50 Jaanotɨnaha jino niquejefañotɨ iniitono maahu. Jaanotɨ amachumo guijevetɨmoiicaqui. 51 Uujoho diiburucu jino fiivo maahu iicaabo niquejefañotɨiniitehinɨɨbo. Jaamo uco agaayɨcɨmo ifinɨjitɨno fiivoma icaji. Jaanomaahuco uujoho aacɨno taahucu. Jaanoco uujoho jiinɨjemɨnaahallɨvɨaacɨjino, nooboro. 52 Jaanegui judiomɨ tɨcovauhi sanomɨro iimaacasiumo: ¿Mɨllɨ jaabo jaanɨmɨɨhaico duusujirahi ihuucuco? noomoro. 53 Jaanegui Jesu nuuhi: Miyanotɨro, miyanotɨro amɨɨhaico neehi:Uujoho Miyamɨnaafibadɨ Ifiivuubo uucuco muduutɨhachiijɨ, bu itɨɨjohocomahadutɨhachiijɨ icano fiivoma mihicajitɨhi. 54 Jaanotɨ taahucuco amachuubo, tatyɨɨjohoco aaduubo icano ifinɨjitɨno fiivoma icaji. Jaabocouujoho niinofucu buheetesuji. 55 Jaano tafi miya machuta, tatyɨɨjohomiya adufaihu icano. 56 Jaamo tafiico amachumo, tatyɨɨjohoco aadumoicano uuma icahi. Jaamoma bu uujoho tollɨro icahi. 57 Mɨɨro Moocaaniuco agalluubo ifiima icahi, jaaberi uujoho icahi icano. Jaabadɨro ucoamachuubo uuri icaji. 58 Jino niquejetɨ iniituuno maahu; amɨɨhaicaanimɨhai manaaco amachuumo iguijeveubadɨ iicano icatɨno. Jaanotɨjihɨcatɨ amachumo ifinɨjitɨno fiivoma icaji, nooboro. 59 Jillɨ nuubo Jesu Capernau cuumi sinagogajafaño ɨjɨɨbuguubo. 60 Jaanoco sihidɨ saatoho ijɨɨbogomɨnaa uguubuumoro nuuhi: Aivojihiimaa sihidɨ jeevahi. ¿Mɨɨjoho fɨne gaayɨcɨjirahi? noomoro. 61 Jaanoco Jesu ijɨɨbogomɨnaa onoocasiunoco agaajacɨuboro nuubo:¿Jaano nacu amɨɨhaico imitɨno moonɨhi? 62 ¿Mɨllɨjiru fɨne imi, uujohoMiyamɨnaafibadɨ Ifiivuuboco caamo itɨconɨ iicauhɨgo ofoobocomahatyɨmeruva? 63 Mɨɨro Moocaani Gaija mɨɨnoco fiivoco acɨhi. Jaanotɨmuuhucu jillɨ jihovono. Jaanotɨ naha jino uujoho ihiimaano amɨɨhaijeebɨɨco ifinɨjitɨno fiivoco aacɨjino. 64 Jaarunofaño icamo amɨɨhaitɨ saatoho imiyaavogotɨmo, nooboro. MɨɨroJesu ɨmegavɨro gaajacuuhi imiyaaveguejitɨmoco, bu diiboco igaicaauquiaacɨujiiboco icano. 65 Jaamaño nuubo: Toonegui amɨɨhaico neehinɨhi:Mɨɨhaiñooba tajaa saajitɨrahi Guihirubi tajaa isɨvatɨruva, nooboro. 66 Jaasumitɨro sihidɨ saatoho diibo dojɨcutɨ efeehicaumo diibeditɨudugaavuumoro diiboma fuucuutɨmo. 67 Jaanegui Jesu saatohoijɨɨbogomɨnaa fahuseecɨ motɨhaitɨ miimɨsiicɨ icano iicaumoco nuubo:¿Nacu bu amɨɨhai tollɨro diitobadɨro mefeeji? nooboro. 68 Jaanegui Simon Pedro diiboco iimusuuhi: ¿Aivojɨɨbo, mɨɨjaagobu mɨɨhai mefeejirahi? Mɨɨro ɨɨma icano ifinɨjitɨno fiivo iimaa. 69 Mɨɨromɨɨhai mimiyaaveguehinɨcuuhi. Jaamoro magaajahi ɨɨjoho CristoMoocaani iicaabo Seemene idiicanoco, nooboro. 70 Jaanegui Jesu diitoco nuuhi: Amɨɨhai docedɨmoco uujoho ɨcɨhinɨhi.Jaamo amɨɨhaifañotɨ iicaabo saafi ɨjɨ iicaabo, nooboro. 71 Jillɨ nuubo Juda Iscariote Simon achiditɨ. Jaabo Juda docedɨmooboiicaubo Jesucristoco iguijenɨqui aacɨujiibo.
